ខេត្តព្រៃវែង ៖ មន្ត្រីយោធាកងវិស្វកម្មក្រសួងការពារជាតិម្នាក់ បានលើកគ្នាប្រមាណជា ១០នាក់ ទៅកាប់និងវាយប្រជាពលរដ្ឋដល់ផ្ទះ បង្កការភ្ញាក់ផ្អើលដល់កម្លាំងនគរបាលស្រុកពាមជរ ចុះទៅអន្តរាគមន៍ចាប់ខ្លួនបានម្នាក់ ចំណែកបក្ខពួកផ្សេងទៀតនាំគ្នារត់គេចខ្លួនបាត់អស់ កាលពីវេលាម៉ោង ២ និង៣០នាទីរសៀល ថ្ងៃទី២៣ ខែមករា ឆ្នាំ២០២០ នៅភូមិពងទឹក ឃុំក្រាំងតាយ៉ង ស្រុកពាមជរ ខេត្តព្រៃវែង ។
លោកវរសេនីយ៍ឯក ជា ហេង អធិការនគរបាលស្រុកពាមជរ បានឲ្យដឹងថា កម្លាំងសមត្ថកិច្ចបានចាប់ខ្លួនជនដៃដល់ម្នាក់ឈ្មោះ សោ សុផល ហៅស្វិត ភេទប្រុស អាយុ២៦ឆ្នាំ ជាមន្ត្រីយោធា នៃកងវិស្វកម្មក្រសួងការពារជាតិ ហើយបានប្រគល់ជូនប៉ុស្តិ៍រដ្ឋបាលឃុំក្រាំងតាយ៉ង ។
ប្រភពបញ្ជាក់ថា រឿងដែលឈានដល់ប្រើអំពើហិង្សានេះ គឺកាលពីយប់ថ្ងៃទី២២ ខែកុម្ភៈ ឆ្នាំ២០២០ កន្លងទៅនេះ មានកម្មវិធី ខនសឺតមួយ ស្ថិតនៅភូមិតាហ៊ុយ ឃុំកំពង់ប្រសាទ ជាប់ព្រំប្រទល់ និងឃុំក្រាំងតាយ៉ង ។ ក្នុងពិធីនោះផឹកស៊ីរហូតទាស់សម្តីគ្នាបន្តិចបន្តួច ។ លុះដល់ព្រឹកឡើងភាគីទាំងពីរ បានដឹកដីតាមផ្លូវតែមួយ ដោយក្រុមប្រជាពលរដ្ឋក៏មានរថយន្តដឹកដីដែរ ហើយក៏បានសួរឌឺដងដាក់គ្នាជាមួយក្រុមជនដៃដល់ថា យប់មិញមានរឿងអី? ទើបបង្កជាហិង្សាដាក់គ្នា ខណៈដែលក្រុមកងវិស្វកម្មលើកគ្នាប្រមាណជា១០នាក់ ប្រដាប់ដោយកាំបិត ; ដំបង ដេញវាយក្រុមប្រជាពលរដ្ឋ រហូតមកដល់ផ្ទះបង្កការភ័យខ្លាចដល់អ្នកភូមិ បានរាយការណ៍ប្រាប់អជ្ញាធរមានសមត្ថកិច្ច ចុះមកជួយធ្វើអន្តរាគមន៍តែម្តង ។
