ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៤ ខែកុម្ភៈ ឆ្នាំ២០២០នេះ បានដាក់ចេញនូវវិធានការបន្ទាន់នានា ដើម្បីជួយដល់កម្មករ និយោជិតក្នុងវិស័យកាត់ដេរ ដែលទទួលផលប៉ះពាល់ ដោយការខ្វះខាតវត្ថុធាតុដើមសម្រាប់ផលិត នឹងទទួលបានការឧបត្ថម្ភប្រាក់ចំនួន១២០ដុល្លារ សម្រាប់រយៈពេល៦ខែ និងលើកពន្ធផ្ទះសំណាក់សណ្ឋាគារនៅខេត្តសៀមរាប ។
ថ្លែងសារពិសេសមួយ ជូនជនជាតិខ្មែរទាំងអស់ ពាក់ព័ន្ធស្ថានភាពថ្មីៗចុងក្រោយ នៅព្រឹកថ្ងៃទី២៤ ខែកុម្ភៈនេះ នៅវិមានសន្តិភាពសម្តេចតេជោ ហ៊ុន សែន បានថ្លែងថា «សម្រាប់រោងចក្រ សហគ្រាស ដែលផ្អាកសកម្មភាពផលិតរយៈពេលខ្លី ដោយខ្វះខាតវត្ថុធាតុដើម រោងចក្រ សហគ្រាស ត្រូវចេញប្រាក់ខែចំនួន៤០ភាគរយ នៃប្រាក់ខែអប្បរមារបស់កម្មករនិយោជិត ដែលមានចំនួន១៩០ដុល្លារអាមេរិក សម្រាប់ឆ្នាំ២០២០ ខណៈរាជរដ្ឋាភិបាលនឹងចូលរួមចំណែក២០ភាគរយ នៃប្រាក់ខែអប្បរមាបន្ថែម សរុប៦០ភាគរយ នៃប្រាក់ខែអប្បបរមា ដែលប្រហែលជា១២០ដុល្លារក្នុង១ខែ។ ដើម្បីបានទទួលនៅការឧបត្ថម្ភនេះ ក្មួយៗជាកម្មករ និយោជិត ត្រូវចូលរួមវគ្គបណ្តុះបណ្តាលខ្លីៗ រវាងពី១ទៅ២សប្តាហ៍ ដែលរៀបចំដោយក្រសួងការងារ និងបណ្តុះបណ្តាលវិជ្ជាជីវៈ»។
សម្តេចតេជោបន្តថា រាជរដ្ឋាភិបាលក៏មានផ្តល់សេវាជួយរកការងារឲ្យកម្មករធ្វើ តាមរយៈទីភ្នាក់ងារមុខរបរ (NEA) ដែលអាចជំរុញកម្មករ-និយោជិត ដែលបាត់បង់ការងារឲ្យចាប់យកការងារបានឆាប់រហ័សផងដែរ។ ជាមួយគ្នានេះ រាជរដ្ឋាភិបាល បានអនុញ្ញាតឲ្យរោងចក្រ មិនបង់ប្រាក់វិភាគទានធានារ៉ាប់រងរបបហានីភ័យការងារ និងថែទាំងសុខភាព (បសស) ក្នុងកំឡុងពេលរោងចក្រព្យួរអាជីវកម្មនោះទេ។
ដោយមិននិយាយពីEBAសម្តេចតេជោ ហ៊ុន សែន បានថ្លែងបញ្ជាក់ថា ការផ្ទុះឡើងនៃជំងឺ COVID-19 ផលប៉ះពាល់ដល់ផ្នែកសំខាន់ៗរបស់កម្ពុជា ៖«ដូចប្រទេសដទៃទៀតនៅក្នុងតំបន់ ជំងឺ COVID-19 នេះ ក៏មានផលប៉ះពាល់មកលើវិស័យសំខាន់ៗនៃសេដ្ឋកិច្ចកម្ពុជាដែរ ដែលក្នុងនោះ តាមការវាយតម្លៃបឋម មានវិស័យពីរងផងប៉ះពាល់ធ្ងន់ជាងគេ គឺទី១៖ វិស័យទេសចរណ៍ ដោយមូលហេតុ អ្នកទេសចរមានការភ័យខ្លាចលែងហ៊ានធ្វើដំណើរកម្សាន្ត និងការបិទជើងយន្តហោះ និងទី២៖ វិស័យកាត់ដេរ ដោយសារការខ្វះវត្ថុធាតុដើម ត្បិតរោងចក្រមួយចំនួននៅប្រទេសចិន មិនទាន់បើកដំណើរការឡើងវិញជាប្រក្រតី»។
ដើម្បីជាផ្នែកមួយជួយស្រោចស្រង់ ដល់វិស័យទេសចរណ៍ ក្នុងខេត្តសៀមរាប សម្តេចតេជោ នាយករដ្ឋមន្ត្រីនៃកម្ពុជា បានសម្រេចលើកលែងនូវការបង់ពន្ធប្រចាំខែគ្រប់ប្រភេទរបស់សណ្ឋាគារ និងផ្ទះសំណាក់ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្ម ក្នុងខេត្តសៀមរាប រយៈពេល៤ខែ ចាប់អនុវត្តន៍ពីខែកុម្ភៈ ដល់ខែឧសភា ឆ្នាំ២០២០។
សម្តេចតេជោ ហ៊ុន សែន បានថ្លែងថាទៀតថា អាជីវកម្មសណ្ឋាគារនិងផ្ទះសំណាក់ នៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញ សម្រាប់គ្រប់គ្រងអាការលើតម្លៃបន្ថែម (E-VAT) ជារៀងរាល់ខែ ក្នុងរយៈពេលលើកលែងពន្ធនេះ។
សម្តេចតេជោ ហ៊ុន សែន ៖ «ការលើកលែងពន្ធនេះ គឺមានន័យថារដ្ឋទទួលបង់ពន្ធជំនួស ព្រោះយើងធ្លាប់បានបង់ពន្ធហើយ នៅទីនេះ ប្រើពាក្យលើកលែងការបង់ពន្ធដើម្បីឲ្យស្រួលស្តាប់ ប៉ុន្តែធាតុពិតរបស់វាគឺរដ្ឋបង់ពន្ធជំនួស ហើយអ្វីដែលយើងធ្វើនៅពេលនេះ មិនគ្របដណ្តប់ទូទៅនោះទេ អ្វីដែលសំខាន់ គឺយើងធ្វើនៅខេត្តសៀមរាប ដែលជាខេត្តមួយភ្ញៀវទេសចរបរទេសធ្លាប់មកកាន់ទីនោះ ប៉ុន្តែឥឡូវនេះភ្ញៀវទេសចរមកកាន់ទីនោះ គឺធ្លាក់ចុះដល់កម្រិតមួយយ៉ាងខ្លាំង»។
ក្រៅពីវិធានការលើកលែងផ្នែកពន្ធនេះ មានវិធានការមួយចំនួនទៀត ត្រូវបានដាក់ចេញដោយសម្តេចតេជោ ហ៊ុន សែន ដើម្បីស្រោចស្រង់វិស័យទេសចរណ៍ រួមមានការជ្រើសរើសយកខេត្តសៀមរាប សម្រាប់រៀបចំកិច្ចប្រជុំផ្សេងៗ, ជំរុញឲ្យក្រសួងទេសចរណ៍ និងស្ថាប័នពាក់ព័ន្ធ បើកយុទ្ធនាការរៀបចំសកម្មភាព និងព្រឹត្តិការណ៍ទាក់ទាញផ្សេងៗក្នុងខេត្តសៀមរាប, ការបង្កើនចំនួនថ្ងៃចូលទស្សនាតំបន់អង្គរ ជូនភ្ញៀវទេសចរ ដែលទិញសំបុត្រចូលទស្សនា និងបណ្តុះបណ្តាលជំនាញជូនដល់កម្មករ និងយោជិត ដែលបាត់បង់ការងារក្នុងវិស័យទេសចរណ៍ជាដើម។
