ភ្នំពេញ ៖ ផ្ទុះរឿងពុករលួយឆបោករវាងភិបាលរងខណ្ឌមានជ័យ ឌី រ័ត្នខេមរុណ និងឧត្តមសេនីយ៏ត្រី ខេន សុវណ្ណ មេបញ្ជាការរងអាវុធហត្ថរាជធានីភ្នំពេញ ពីបទឆបោក ពាក់ព័ន្ធ នឹងករណីរត់ការយកតំណែងរដ្ឋលេខាធិការ ឲ្យលោក ប្រាក់ ប្រាកដ អតីតអគ្គនាយកទឹកស្អាតក្រសួងឧស្សាហកម្មនិងសិប្បកម្ម។
លោក ឌី រ័ត្នខេមរុណអាយុ៣៩ឆ្នាំជា អភិបាលរងខណ្ឌមានជ័យ និងលោកឧត្តមសេនីយ៏ត្រី ខេន សុវណ្ណអាយុ៥២ឆ្នាំជា មេបញ្ជាការរងកងរាជអាវុធហត្ថរាជធានីភ្នំពាណិជ្ជករនិងពាណិជ្ជករម្នាក់ឈ្មោះ លី សុជាតិអាយុ៤០ឆ្នាំ ត្រូវបានលោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី៧ ខែកុម្ភៈ ឆ្នាំ២០២០ សម្រេចធ្វើចោទប្រកាន់ជាផ្លូវការលើអ្នកទាំង៣រូបពីបទ “ឆបោកមានស្ថានទម្ងន់ទោស” តាមមាត្រា៣៧៧និងមាត្រា៣៨០នៃក្រមព្រហ្មទណ្ឌ និង ចោទប្រកាន់លោក លី សុជាតិ ជាអាជីវករ ពីបទ “ឆបោក” តាមមាត្រា៣៧៧និងមាត្រា៣៧៨ នៃក្រមព្រហ្មទណ្ឌ។
ប្រភពព័ត៌មានបានឲ្យដឹងថា លោក ប្រាក់ ប្រាកដ អតីតអគ្គនាយក នៃអគ្គនាយកដ្ឋានទឹកស្អាត ក្រសួងឧស្សាហកម្ម និងសិប្បកម្ម បានប្ដឹង ក្នុងរឿងក្ដីឆបោកនេះ ចុះថ្ងៃទី០៣ ខែមករា ឆ្នាំ២០២០ ចូលអយ្យការអមសាលាដំបូង។
មូលហេតុគឺថា កាលពីថ្ងៃទី២៨ ខែធ្នូ ឆ្នាំ២០១៨ ឈ្មោះលី សុជាតិ ឈ្មោះ ខេន សុវណ្ណ និងឈ្មោះ ឌី រ័ត្នខេមរុណ បានណាត់ជនរងគ្រោះឲ្យទៅជួបនៅភោជនីយដ្ឋាននាគក្រហម ទល់មុខស្នាក់ការកាកបាទក្រហមកម្ពុជា ដើម្បីនិយាយធានារឿងរត់ការឡើងតំណែងពាក់ព័ន្ធ នឹងករណីរត់ការយកតំណែងរដ្ឋលេខាធិការក្រសួងឧស្សារហកម្ម និងសិប្បកម្មឲ្យខ្លួន ក្នុងតម្លៃ៣០ម៉ឺនដុល្លារ។
បន្ទាប់ពីនិយាយ ត្រូវគ្នាគ្រប់លក្ខខណ្ឌរួចមក ឈ្មោះខេន សុវណ្ណ និងឈ្មោះឌី រ័ត្នខេមរុណ បានឲ្យឈ្មោះ លី សុជាតិ ទៅទទួលប្រាក់ពីជនរងគ្រោះចំនួន១២ម៉ឺនដុល្លារ នៅធនាគារ FTB ក្បែរផ្សារធំថ្មី និងបានតម្រូវឲ្យជនរងគ្រោះដាក់ប្លង់ដី និងប្លង់ផ្ទះចំនួន៣កន្លែង យកទៅទុកនៅឈ្មោះ ឌី រ័ត្នខេមរុណ ជាប្រាក់កក់មុន និងជាទ្រព្យធានាបន្ថែម។លុះដល់ថ្ងៃទី២២ ខែមីនា ឆ្នាំ២០១៩ ឈ្មោះខេន សុវណ្ណ ក៏បានឲ្យជនរងគ្រោះ យកប្រាក់សុទ្ធចំនួន៤ម៉ឺនដុល្លារ និងបានតម្រូវឲ្យជនរងគ្រោះតម្កល់សែកមួយសន្លឹកទៀតរបស់ធនាគារFTB មានទឹកប្រាក់ចំនួន១៤ម៉ឺនដុល្លារ មកឲ្យខ្លួននៅចំណុចភោជនដ្ឋាននាគក្រហម ដើម្បីឲ្យគ្រប់ចំនួន៣០ម៉ឺនដុល្លារអាមេរិក ដែលបានព្រមព្រៀងគ្នាកន្លងមក។
ដូច្នេះទឹកប្រាក់សុទ្ធ ដែលអ្នកទាំង៣បានទទួលពីជនរងគ្រោះចំនួន១៦ម៉ឺនដុល្លារអាមេរិក។ ក្រោយមកដោយសារការរត់ការមិនបានសម្រេច ឈ្មោះខេន សុវណ្ណ ក៏បានទាក់ទងឈ្មោះឌី រ័ត្នខេមរុណ ឲ្យយកប្លង់ដី ប្លង់ផ្ទះចំនួន៣ប្លង់ដែកកក់ទុកយកមកប្រគល់ឲ្យជនរងគ្រោះវិញនៅចំណុចភោជនីយដ្ឋានដាវ ស្ថិតក្នុងសង្កាត់បឹងកេងកង ខណ្ឌបឹងកេងកង។ បន្ទាប់មកឈ្មោះខេន សុវណ្ណ និងឌី រ័ត្នខេមរុណ ក៏បានឲ្យឈ្មោះលី សុជាតិ យកប្រាក់ចំនួន៧ម៉ឺនដុល្លារទៅប្រគល់ឲ្យជនរងគ្រោះវិញផងដែរ នៅសល់៩ម៉ឺនដុល្លារទៀត អ្នកទាំង៣បានប្រើល្បិចភូតកុហកជនរងគ្រោះថា ប្រាក់ដែលនៅសល់នៅអ្នកនេះ អ្នកនោះរហូតមក ទើបដល់ថ្ងៃទី០៣ ខែមករា ឆ្នាំ២០២០ ជនរងគ្រោះក៏បានដាក់ពាក្យប្ដឹងមកអយ្យការអមសាលាដំបូង ដើម្បីចាត់ការអ្នកទាំង៣តាមច្បាប់។
រឿងរកស៊ីឡឿងបុណ្យមួយនេះ មិនទាន់អាចសុំបញ្ជាក់ពីលោកឌី រ័ត្នខេមរុណ ជាអភិបាលរងខណ្ឌមានជ័យ បាននៅឡើយទេ។ ចំណែកលោកខេន សុវណ្ណ មេបញ្ជាការរងកងរាជអាវុធហត្ថរាជធានីភ្នំពេញ និងលោក លី សុជាតិ ក៏ពុំអាចសុំការបំភ្លឺបានដែរ។
ប្រភពកាសែតផែនដីថ្មី
