រតនៈគីរី ៖ រថយន្តមួយគ្រឿងម៉ាក ហាយឡេនឌឺរ ដែលជាកម្មសិទ្ធរបស់អ្នកនិពន្ធម្នាក់ក្នុងក្រុមភ្លេងក្ន “ចចកសមុទ្រ” ដែលគេស្គាល់ថាជាអ្នកនិពន្ធបទភ្លេងបទចម្រៀងកំពុងល្បីរបស់លោកព្រាប សុវត្ថិ “កូនយំល្វើយៗ” ត្រូវភ្លើងឆាបឆេះនៅលើដងផ្លូវរហូតដល់ផ្ទុះឆេះខូចខាតរថយន្តទាំងស្រុងនៅក្នុងទីតាំងភូមិសាស្ត្រនៃភូមិព្រួក ឃុំបាតាង ស្រុកលំផាត់ ខេត្តរតនគិរី។
មិនមានអ្នករបួសនោះ ឬស្លា.ប់ក្នុងហេតុការណ៍នេះទេ ប៉ុន្តែ បើតាមលោកចក់ដែលជាម្ចាស់បាន ឆ្លើយប្រាប់ប្រិយមិត្តរបស់លោកនៅលើបណ្ដាញសង្គម បណ្ដាលមកពីបែកកង់ ហើយរថយន្តបានក្រឡាប់១ត្រឡប់ រួចក៏បានផ្ទុះឆេះតែម្ដង។ ម្ចាស់រថយន្តបានពោលដោយការសោកស្ដាយចំពោះទ្រព្យដែលបាត់បង់ទៅ ព្រោះជាកម្លាំងញើសឈាមរបស់លោកប្រឹងប្រែងទាំងយប់ទាំងថ្ងៃ“ហេតុអ្វីរឿងបែបនេះកើតមកលើខ្ញុំចឹង កំលាំងញើសឈាមខ្ញុំខំធ្វើការទាំងយប់ទាំងថ្ងៃទម្រាំតែបានប៉ុណ្ណេះ ឥឡូវប្រែរលាយអស់មួយរំពេច”។
ប្រិយមិត្តស្គាល់លោកជាច្រើនបានចូលរួមសោកស្ដាយ និងលោកទឹកចិត្តលោក ចំពោះការខាតបាត់បង់ ដោយពួកគេលើកឡើងថា “ឲ្យតែជីវិតគង់ ទ្រព្យបង់អាចរកបានវិញទេ”។ លោក សុខ ជំនោរ អតីតអ្នកនិពន្ធរបស់ហង្សមាស ក៏បានចូលរួមលើកទឹកចិត្តលោកចក់ដែរ ក្នុងនោះ លោកថែមទាំងសង្ឃឹមថា មិត្តភ័ក្តិ ពិសេសតារាចម្រៀងដែលធ្លាប់ធ្វើការជាមួយលោក ចក់ ជួយឈឺឆ្អាលចំពោះគ្រោះថ្នាក់របស់អ្នកនិពន្ធបទភ្លេងនាគ្រានេះផង។
