ភ្នំពេញ៖ នៅថ្ងៃទី ១៨ ខែ សីហា ឆ្នាំ ២០១៦នេះ ក្រុមអធិការកិច្ចក្រសួងរ៉ែនិងថាមពល ដឹកនាំដោយលោក ឌិត ទីណា រដ្ឋលេខាធិការ និងឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ អគ្គស្នងការដ្ឋាននគរបាលជាតិ នៃក្រសួងមហាផ្ទៃ បានចុះប្រតិបត្តិការល្បាតចល័តត្រួតពិនិត្យរថយន្តដឹកដី ថ្ម ខ្សាច់ ដែលខុសបច្ចេកទេស មិនគ្របឲ្យបានត្រឹមត្រូវតាមការណែនាំរបស់ក្រសួងរ៉ែ និងថាមពល ធ្វើឲ្យជ្រុះរាយប៉ាយលើដងផ្លូវ និងរំខានដល់ការរស់នៅរបស់ប្រជាពលរដ្ឋ និងផលប្រយោជន៍សាធារណៈ ខណៈបច្ចេកទេសមិនគ្រប់គ្រាន់ សំបកកង់សឹករិចរិល សំពីង សំពោង ពុំមានវិញ្ញាបនបត្រត្រួតពិនិត្យលក្ខណៈច្ចេកទេស និងប្រកបអាជីវកម្ម និងបណ្ណបើកបរបានត្រឹមត្រូវ។
ដោយនៅក្នុងប្រតិបត្តិការនេះនេះ នគរបាលចរាចរណ៍ រួមជាមួយក្រសួងរ៉ែ និងថាមពល បានចុះឃាត់រថយន្តដឹក ថ្ម ខ្សាច់ ចំនួន៧គ្រឿង ធ្វើការអប់រំណែនាំ កែតម្រូវ និងពិន័យតាមច្បាប់ស្តីពីចរាចរណ៍ផ្លូវគោក ត្រង់មាត្រា៥៦ មាត្រា៥៧ និងមាត្រា៦៦ ជាមួយគ្នានោះដែរ ក្រសួងរ៉ែនិងថាមបានសម្រេចផ្អាកសកម្មភាព ទីតាំងរណ្តៅដីចំនួនពីរកន្លែងនៅស្រុកកណ្តាលស្ទឹង និងស្រុកពញាឮ ខេត្តកណ្តាល។
សូមបញ្ជាក់ផងដែរថាកាលពីថ្ងៃទី០៨ ខែកក្ដដា ឆ្នាំ២០១៦ កន្លងទៅថ្មីៗនេះ ដោយសារបញ្ហាកង្វល់ទាំងនេះហើយទើប សម្ដេច ក្រឡាហោម ស ខេង បានសម្រេចបង្កើតឲ្យមាន ក្រុមការងារចំនួន០៧ក្រុម ឲ្យចុះសហការបំពេញភារកិច្ច តាមបណ្ដារាជធានី-ខេត្ត ក្នុងគោលដៅធ្វើយ៉ាងណារួមចំណែកកាត់បន្ថយគ្រោះថ្នាក់ និងទប់ស្កាត់រាល់បទល្មើសចរាចរណ៍ ផ្លូវគោកឲ្យកាន់តែមានប្រសិទ្ធិភាព។
ក្នុងនាមនាយកដ្ឋាននគរបាលចរាចរណ៍ និងសណ្តាប់ធ្នាប់ សូមអំពាវនាវទទូចហើយទទូចទៀតដល់បងប្អូនអជីវករ ដឹកដី ថ្ម ខ្សាច់ គ្រួស សូមចូលរួមគោរពច្បាប់ស្តីពីចរាចរណ៍ផ្លូវគោក និងអនុវត្តតាមការណែនាំរបស់ក្រសួងរ៉ែ និងថាមពលទាំងអស់គ្នាផង បើនៅតែមិនគោរព ក្នុងនាមអាជ្ញាធរមានតែចុះអនុវត្តវិធានការទៅតាមផ្លូវច្បាប់ប៉ុណ្ណោះ៕