ភ្នំពេញ៖ រោងចក្រកាត់ដេរសម្លៀកបំពាក់ និងស្បែកជើងមួយចំនួននៅកម្ពុជា អាចនឹងត្រូវផ្អាកដំណើរការរយៈពេល១ ឬ២ខែ ចាប់ពីចុងខែកុម្ភៈនេះ ដោយសារខ្វះវត្ថុធាតុដើម ដែលត្រូវនាំចូលពីប្រទេសចិន ខណៈរោងចក្រនៅប្រទេសចិនបានផ្អាក ដោយសារការរីករាលដាល នៃជំងឺរលាកសួត បង្កឡើងដោយវីរុសកូរ៉ូណាមិនមែនដោយសារEBAទេ។
នេះបើតាមសេចក្ដីថ្លែងការណ៍របស់ខ្លួនចុះថ្ងៃទី១១ ខែកុម្ភៈសមាគមរោងចក្រកាត់ដេរនៅកម្ពុជា (GMAC)។GMAC បានបញ្ជាក់ថា បញ្ហាវីរុសកូរ៉ូណា ដែលបានរីករាលដាលនៅក្នុងប្រទេសចិន ធ្វើឲ្យរោងចក្រផលិតវត្ថុធាតុដើម និងក្រុមហ៊ុនផ្តល់សេវាជាច្រើន បានបិទដំណើរការជាបណ្តោះអាសន្ន ហើយប្រហែលជារហូតដល់ចុងខែកុម្ភៈនេះ ទើបអាចចាប់ផ្តើម ដំណើរការឡើងវិញ ដែលបញ្ហានេះនឹងបង្កឱ្យមានផលប៉ះពាល់ចង្វាក់ផ្គត់ផ្គង់ ដល់រោងចក្រនៅកម្ពុជា។
GMAC បានបញ្ជាក់ទៀតថា “សម្រាប់រោងចក្រមួយចំនួនវត្ថុធាតុដើមនៅក្នុងស្តុក សម្រាប់ផលិតកម្មអាចនឹងអស់ នៅត្រឹមសប្តាហ៍ក្រោយ ឬសប្តាហ៍បន្ទាប់ ហើយការបិទរោងចក្របណ្តោះអាសន្ន នៅប្រទេសចិនអាចនឹងធ្វើឱ្យរោងចក្រមួយចំនួនខ្វះវត្ថុធាតុដើម នៅចុងខែក្រោយនេះ និងក្នុងខែមីនាខាងមុខ។ ប្រឈមនឹងបញ្ហានេះ រោងចក្រគ្មានជម្រើសអ្វីក្រៅពីការផ្អាក ប្រតិបត្តិការផលិតកម្មជាបណ្តោះអាសន្ន ដែលមានរយៈពេញ១ខែពេញ ឬដល់២ខែ”។
សមាគមរោងចក្រ បានឲ្យដឹងទៀតថា ចំពោះនីតិវិធីនៃការផ្អាកបណ្តោះអាសន្ន គ្រប់រោងចក្រទាំងនោះនឹងត្រូវអនុវត្តតាមនីតិវិធីច្បាប់ជាធរមាន ដោយមានការចរចាពិភាក្សា និងព្រមព្រៀងគ្នារវាងកម្មករនិយោជិត និងថ្នាក់គ្រប់គ្រងរោងចក្រ ក្រោមការត្រួតពិនិត្យ និងការអនុញ្ញាតពីអធិការការងារ។
ទាក់ទងបញ្ហារោងចក្រផ្អាកសកម្មភាពនេះដែរសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍នៅក្នុងពិធីបើកការដ្ឋានស្តារ និងសាងសង់ផ្លូវជាតិលេខ២ និងលេខ២២ កាលពីព្រឹកថ្ងៃទី១១ ខែកុម្ភៈ ឆ្នាំ២០២០ថា៖ ប្រសិនបើប៉ុន្មានសប្តាហ៍ខាងមុខនេះ មានករណីបិទរោងចក្រកាត់ដេរមួយចំនួននៅកម្ពុជានោះ សូមប្រជាពលរដ្ឋកុំយល់ច្រឡំថា បិទដោយសារឥទ្ធិពលនៃទណ្ឌកម្មរបស់អឺរ៉ុប ឬការដក EBA ឲ្យសោះ រោងចក្រទាំងនោះបិទ ដោយសារតែខ្វះវត្ថុធាតុដើមបម្រើដល់ការផលិត នាំចូលពីប្រទេសចិន ព្រោះតែឥទ្ធិពលនៃវីរុសកូរ៉ូណា។
សូមកូន ក្មួយកម្មករ កម្មការិនី កុំមានការភិតភ័យចំពោះការផ្តាច់ការអនុគ្រោះពន្ធរបស់សហភាពអឺរ៉ុបឱ្យសោះ ព្រោះថាមិន ប៉ះពាល់ដល់កម្ពុជានោះទេ។ សម្តេចតេជោបានបញ្ជាក់ថា “សុំកុំមានការតក់ស្លត់ឱ្យសោះ យើងត្រូវពឹងដោយខ្លួនឯង បើគេឱ្យអុកស៊ីសែនជួយ យើងយក ប៉ុន្តែយើងពឹងខ្លួនគឺជាការល្អ”។ សម្តេចតេជោបានលើកឡើងថា ចំពោះការផ្តាច់EBAនេះ ប្រទេសជាសមាជិកសហភាព អឺរ៉ុបមួយចំនួនក៏មិនត្រូវគ្នាផងដែរ។ ក្នុងចំនួន២៨ប្រទេស គឺមាន២៣ប្រទេស ដែលកម្ពុជាបាននាំ អង្ករចូលទៅ ហើយប្រមាណ៣០ម៉ឺនតោននាំចូល។ ដូច្នេះទាំងមិនបង់ពន្ធ ក៏នាំចូល បង់ពន្ធក៏នាំចូល។
សម្តេចតេជោបានបន្ថែមថា ការផ្តាច់ប្រព័ន្ធអនុគ្រោះពន្ធនេះក៏ជាសង្គ្រាមចិត្តសាស្ត្រដែលកំពុងវាយប្រហារមកកម្ពុជា ប៉ុន្តែក្នុងនាមជានាយករដ្ឋមន្ត្រី សូមក្មួយៗកុំកត់ស្លុត ព្រោះថាបើមានរឿងអ្វីនោះរហូតដល់ខែសីហាខាងមុខឯណោះ។
សម្ដេចតេជោថា “រឿងដែលប៉ះពាល់មុនគេគឺរឿងចំពោះរោងចក្រនៅកម្ពុជាគឺជំងឺកូរ៉ូណា នៅប្រទេសចិន ដែលវត្ថុធាតុដើមអាចនឹងផ្គត់ផ្គង់មិនទាន់(ទី១) និង ទី២ គឺបណ្តាសណ្ឋាគារទាំងអស់អាចនឹងទេសចរណ៍ចិន មិនធ្វើ ដំណើរមក។ អីញ្ចឹងភោជនីយដ្ឋានលក់មិនដាច់ អីញ្ចឹង សុំកុំឆ្ងល់”។ សម្ដេចតេជោក៏បានកត់សម្គាល់ឃើញថា អ្វីដែលសំខាន់នៅពេលនេះគឺត្រូវរកថ្នាំសម្រាប់ព្យាបាលជំងឺ២ប្រភេទនេះគឺមួយប្រភេទរកឆ្នាំព្យាបាលជំងឺកូរ៉ូណាថ្មី ដែលអង្គការសុខភាព ពិភពលោក និងអ្នកឯកទេសចិន ក៏ដូចជាប្រទេសដ៏ទៀតកំពុងស្វែងរក។ ចំពោះប្រភេទថ្នាំទី២ ដែលត្រូវរក ហើយមានភាពងាយស្រួលទេគឺថ្នាំព្យាបាលជំងឺភ័យខ្លាចរបស់ប្រជាពលរដ្ឋ៕