ថៃ ៖ តារាម៉ូដែលកម្ពុជា កញ្ញា ភីយ៉ា វ៉េកា បានឈ្នះពានរង្វាន់តារាឆ្នើម Thailand Digital Awards 2020 នៅទីក្រុងបាងកក ប្រទេសថៃ កាលពីពេលថ្មីៗនេះ។ កញ្ញា ភីយ៉ា វ៉េកា ត្រូវបានជ្រើសរើសជាតារាកិត្តិយស លើកពានជាតារាបង្ហាញម៉ូតឆ្នើម មានទម្រង់មុខស្រស់ស្អាតបែបកូនកាត់អាស៊ី ប្រចាំ ២០២០ ជាមួយនឹង តារាប្រុសស្រីល្បីៗ នៃព្រះរាជាណាចក្រថៃឡង់ និងឡាវ។
តារាបង្ហាញម៉ូតរាងតូចស្រឡូន កញ្ញា ភីយ៉ា វ៉េកានិយាយថា៖ កញ្ញាពិតជាមានមោទនភាពក្នុងនាមជាកូនខ្មែរ និងជាតារាបង្ហាញម៉ូតខ្មែរមួយរូបដំបូងគេបង្អស់ ដែលបានលើកពានតារាបង្ហាញម៉ូតឆ្នើមឆ្នាំ ២០២០ ជាមួយតារាល្បីៗប្រចាំប្រទេសថៃ និងឡាវ។
«នាងខ្ញុំពិតជារំភើបរកអ្វីមកប្រៀបផ្ទឹមពុំបាន ព្រោះជាលើកទីមួយរបស់នាងខ្ញុំ ដែលមានឱកាសលើកពាន់រង្វាន់ខ្នាតអន្តរជាតិប្រចាំតំបន់អាស៊ីយើងក្នុងឆ្នាំ ២០២០ ។»
សូមរំលឹកថា កញ្ញា ភីយ៉ា វ៉េកា ប្រឡូកចូលវិស័យសិល្បៈនៅក្នុងកម្មវិធីប្រកួត Boy bands Girl Bands របស់ទូរទស្សន៍ ស៊ីធីអិន កាលពីឆ្នាំ ២០០៤។ កញ្ញាបានប្រឡូកនៅក្នុងការសម្តែងខ្សែភាពយន្ត ថតស្ពតពាណិជ្ជកម្ម និងវិស័យតារាបង្ហាញម៉ូតជាច្រើន។ កញ្ញាត្រូវបានគេដាក់ចំណាត់ថ្នាក់ជាតារាស្រី ដែលមានរូបសម្រស់ស្អាត ទម្រង់មុខកូនកាត់ និងមានប្រជាប្រិយបំផុត ដោយសារព័ត៌មានល្បីៗនៅក្នុងស្រុកខ្មែរ ៕
