ចិន៖ ទីក្រុងប៉េកាំងបានសម្រេចថានឹង បញ្ជូនយន្តហោះទៅដឹកជញ្ជូនប្រជាជនខ្លួន ដែលមានស្រុកនៅកំណើតនៅខេត្តហ៊ូប៉ី (Hubei) ពីបណ្តាប្រទេសនានា ត្រឡប់មកវិញក្រោយពីការប្រកាសរបស់អង្គការសុខភាពពីភពលោកហើយបណ្តាប្រទេសមួយចំនួនបានហាមប្រជាំជនខ្លួនមិនឲ្យទៅស្រុកចិន ។
ទីភ្នាក់ងារសារព័ត៌មាន Channel News Asia នារសៀលថ្ងៃទី៣១ ខែមករា ឆ្នាំ២០២០នេះ បានចុះផ្សាយឲ្យដឹងថាអ្នកនាំពាក្យក្រសួងការបរទេសចិនលោកស្រី ហួ ជុនយីង (Hua Chunying) បានលើកឡើងថា វាពិតជាភាពលំបាកសម្រាប់ប្រជាជនហ៊ូប៉ី (Hubei) ជាពិសេសអ្នកដែលមានស្រុកកំណើតនៅ វូហាន (Wuhan)។ ចិននឹងបញ្ជូនយន្តហោះពិសេស ទៅនាំយកប្រជាជនទាំងនោះត្រឡប់មកវិញ ឲ្យបានលឿនបំផុតតាមដែលអាចធ្វើទៅរួច។
សូមបញ្ជាក់ផងដែរថា ការប្រកាសរបស់ក្រសួងការបរទេសចិនខាងលើនេះ បានកើតមានឡើងបន្ទាប់ពីមានការប្រកាសរបស់អង្គការសុខភាពពីភពលោកហើយបណ្តាប្រទេសជាច្រើនរួមមាន សហរដ្ឋអាមេរិក ថៃ សិង្ហបុរី វៀតណាម និងបណ្តាប្រទេសមួយចំនួនទៀតនៅអឺរ៉ុបបានសម្រេចថា នឹងផ្អាកជើងហោះហើរ ទៅ-មកប្រទេសចិន ដោយសារតែការផ្ទុះឡើងនៃវីរុសផ្លូវដង្ហើមកូរ៉ូណាប្រភេទថ្មី កាន់តែធ្ងន់ធ្ងរ ហើយចិនបានបិទទីក្រុងជាង១០បណ្តាលឲ្យប្រជាជនរាប់លានជាប់គាំងមិនអាចទៅណាបាននិង មិនអាចត្រឡប់មកផ្ទះវិញបានផងដែរ។
ក្រសួងការបរទេសចិនមិនបានបញ្ជាក់អំពីចំនួនច្បាស់លាស់ និងបណ្តាប្រទេសណាខ្លះ ដែលចិនគ្រោងបញ្ជូនយន្តហោះ ទៅដឹកប្រជាជនខ្លួនត្រឡប់មកវិញនោះឡើយ។ បច្ចុប្បន្នអ្នកស្លាប់ដោយសារ វីរុសកូរ៉ូណាថ្មីបានកើនឡើងដល់ ២១៣នាក់ហើយ និងបានឆ្លងដល់មនុស្ស ៩,៦៨៩នាក់នៅប្រទេសចិន និងច្រើនជាង ៩០ករណីទៀតនៅទូទាំងពិភពលោក។
គួរម្លឹកផងដែរថា ក្រោយពីអង្គការសុខភាពពិភពលោក (WHO) បានប្រកាសអាសន្នថ្នាក់អន្តរជាតិ សម្រាប់វីរុសកូរ៉ូណាប្រភេទថ្មី ដែលកំពុងរីករាលដាលកាន់តែខ្លាំង ក្រសួងការបរទេសអាមេរិកទើបតែបានចេញសេចក្តីប្រកាស ដោយហាមមិនឲ្យប្រជាជនរបស់ខ្លួនធ្វើដំណើរទៅកាន់ប្រទេសចិនមូលហេតុគឺដោយសារតែការរីករាលនៃដាល វីរុសកូរ៉ូណាប្រភេទថ្មី (2019-nCoV) ហើយពលរដ្ឋអាមេរិកទាំងឡាយ ដែលកំពុងស្ថិតនៅក្នុងប្រទេសចិន គួរតែគិតគូរចាកចេញពីទីនោះ តាមរយៈជើងហោះហើរ។
ទាក់ទិននឹងការឆ្លងរីកតាលដាលនៃវីរុសកូរ៉ូណានេះ អាជ្ញាធរចិនកាលពីថ្ងៃព្រហស្បតិ៍សប្តាហ៍នេះ បានដកប្រធានមន្ទីរសុខាភិបាលនៃទីក្រុងមួយ ដែលនៅជាប់នឹងទីក្រុង Wuhan បន្ទាប់ពីមន្ត្រីម្នាក់នោះ ពេលកំពុងបង្ហញខ្លួនលើប៉ុស្តិ៍ទូរទស្សន៍រដ្ឋចិន មិនអាចឆ្លើយសំណួរសាមញ្ញ ពាក់ព័ន្ធនឹងស្ថានការណ៍វីរុសនេះ។
សារព័ត៌មាន CNA នៅរសៀលថ្ងៃសុក្រ ទី៣១ ខែមករា ឆ្នាំ២០២០បានឲ្យដឹងថា៖លោកស្រី Tang Zhihong ជាប្រធានមន្ទីរសុខាភិបាលនៃទីក្រុង Huanggang ដែលមានករណីអ្នកឆ្លងវីរុសផ្លូវដង្ហើមថ្មីប្រមាណជិត ៥០០នាក់ និងអ្នកស្លាប់១២ករណីនោះ បានបង្ហាញខ្លួនលើប៉ុស្តិ៍ទូរទស្សន៍រដ្ឋចិន កាលពីថ្ងៃព្រហស្បតិ៍ម្សិលមិញ។ នាពេលនោះ លោកស្រី ត្រូវបានក្រុមមន្ត្រីរបស់រដ្ឋាភិបាលទីក្រុងប៉េកាំង និងអ្នកកាសែតសួរសំណួរមួយចំនួនជុំវិញសភាពការណ៍ទូទៅនៃការឆ្លងវីរុសនៅក្នុងទីក្រុង Huanggang។ ក៏ប៉ុន្តែពេលសួរអំពីចំនួនអ្នកឆ្លងវីរុសនៅតាមមន្ទីរពេទ្យជាដើម លោកស្រី Tang បានឆ្លើយតបថា លោកស្រីមិនដឹង និងមិនប្រាកដនោះទេ។
