បន្ទាយមានជ័យ ៖ សកម្មភាពជីករករ៉ែមាសនៅភ្នំដូងព្រះនៅព្រំប្រទល់សង្កាត់អូរអំបិល និងសង្កាត់កំពង់ស្វាយក្រុងសិរីសោភ័ណខេត្តបន្ទាយមានជ័យបានក្លាយជាចលនាមួយហើយ ហើយករណីនេះកាន់តែចម្រូងចម្រាសជាមួយអាជ្ញាធរ។
ព្រោះក្រុមហ៊ុនទទួលវិនិយោគពង្រាបដីធ្វើស្តាត ថាត្រូវតែហាមឃាត់អោយបានដាច់ខាត ឯពលរដ្ឋដែលជីករុករកនៅតែមានៈចចេសធ្វើមិនស្តាប់សេចក្តីជូនដំណឹងចុះថ្ងៃទី៣០ ខែមករា ឆ្នាំ២០២០ រដ្ឋបាលក្រុងសិរីសោភ័ណ ដែល អំពាវនាវ ណែនាំ និងសំណូមពរដល់ប្រជាពលរដ្ឋបញ្ឈប់សកម្មភាពរុករករ៉ែ និងទៅលេងកសាន្តឬទៅមើលនៅតំបន់តំបន់ ភ្នំដូងព្រះឬកណ្តាលក្រុមប្រជុំកូនភ្នំ ស្ថិតនៅ ព្រំប្រទល់សង្កាត់អូរអំបិល និងសង្កាត់កំពង់ស្វាយ ក្រុងសិរីសោភ័ណ នោះតទៅទៀត។ ព្រោះវាប្រឈមនឹងគ្រោះថ្នាក់ពីការបាក់ដី និងផ្ទាំងថ្មសង្កត់ ។
ពលរដ្ឋដែលជីក រុករករ៉ែមាសអាណាធិបតេយ្យទាំងនោះភាគច្រើនមិនស្តាប់មន្ត្រីអាជ្ញាធរមានសមត្ថកិច្ច ហើយក៏មិនសហការឬព្រមផ្តល់ព័ត៌មានដល់អ្នកសារព័ត៌មានឡើយ ។ ប្រជាពលរដ្ឋម្នាក់ អាយុ៥០ឆ្នាំរស់នៅភូមិខ្លាកូនថ្មីសង្កាត់កំពង់ស្វាយ នៅក្បែរភ្នំនោះបានប្រាប់កាសែតកាលពីល្ងាចថ្ងៃទី៣០ខែមករាថា ៖ អ្នកស្រី និងពលរដ្ឋគ្មានបំណងប្រឆាំងឬមិនស្តាប់មន្ត្រីអាជ្ញាធរមានសមត្ថកិច្ចដែលទុកដូចជាមែ៉ឱនោះទេ ។ ប៉ុន្តែសូមអង្វរកមន្ត្រីថា ពួកខ្លួនមានជីវភាពក្រីក្រ ហើយសុំអនុញ្ញាតិជីករុករករ៉ែមាសធម្មជាតិនៅទីនោះ អោយ៣-៤ខែតទៅទៀតសិន៕
