បន្ទាយមានជ័យ៖ នៅថ្ងៃទី២៨ ខែមករា ឆ្នាំ២០២០ វេលាម៉ោង ៨ និង ០៥នាទី ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត សហការជាមួយ អាជ្ញាធរខេត្តបន្ទាយមានជ័យ ដឹកនាំដោយលោក អ៊ុ រាត្រី អភិបាលនៃគណ:អភិបាលខេត្ត អមដំណើរដោយលោក ង៉ោ ម៉េងជ្រួន អភិបាលរងខេត្ត លោក គាត ហ៊ុល អភិបាល នៃគណអភិបាលក្រុង និងមន្ត្រីមុខការចំណុះឲ្យខេត្ត មួយចំនួនទៀត ទទួលនិស្សិតអាហារូបករណ៍របស់ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា ចំនួន ៣០នាក់។
ប្រភពហ្វេសប៊ុកអគ្គនាយកដ្ឋានអន្តោប្រវេសន៍ បានឲ្យដឹងថា ក្រុមនិស្សិតអាហារូបករណ៍របស់លោក ស សុខារដ្ឋលេខាធិការក្រសួងអប់រំយុវជននិងកីឡា ទាំង ៣០នាក់( ស្រី៥នាក់) បានវិលត្រឡប់មកពីសិក្សានៅសកលវិទ្យាល័យហឺហ្វី ខេត្តអានហួយ ប្រទេសចិន តាមច្រកទ្វារព្រំដែនអន្តរជាតិប៉ោយប៉ែត។
លោក កែវ សុភក្ត្រា ប្រធានមន្ទីរសុខាភិបាលខេត្តបន្ទាយមានជ័យ បានឲ្យដឹង៖ បើយោងតាមការស្គែនដែលប្រចាំការនៅច្រកទ្វារព្រំដែនអន្តរជាតិប៉ោយប៉ែត ក្រុមនិស្សិតទាំងនេះ ពុំមាននរណាម្នាក់ មានផ្ទុកជំងឺកូរ៉ូណានេះឡើយ ។ បើសិនជាមានករណីនិស្សិត ឬប្រជាពលរដ្ឋ ភ្ញៀវជាតិ និងអន្តរជាតិណាមានផ្ទុកនោះ ក្រុមការងារនឹងធ្វើការឃាត់ទុកអ្នកដែលមានផ្ទុកនោះ មួយឡែក ស្ថិតនៅក្នុងការតាមដានរបស់ពេទ្យ ។
តាមប្រភពមន្ត្រីអន្តោរប្រវេសន៍ប្រចាំការនៅមាត់ច្រកនេះបានឲ្យដឹងថា៖ ក្រុមនិស្សិតទាំងនេះ ត្រូវបានពិនិត្យ និងស្គែនយ៉ាងហ្មត់ចត់ ហើយអាជ្ញាធរបានរៀបចំរថយន្តក្រុងដើម្បី ជូនទៅកាន់ផ្ទះស្រុកកំណើត និងស្ថិតនៅក្នុងការតាមដាន ក្នុងរយៈពេល១៤ថ្ងៃ
ក្រៅពីចូលរួមទទួលក្រុមនិស្សិតក៏ មានការចែកម៉ាស ជូនអ្នកដំណើរជាតិ-អន្តរជាតិ ឆ្លងកាត់តាមច្រកទ្វារព្រំដែនអន្តរជាតិប៉ោយប៉ែត ប្រកបដោយបរិយាកាសរីករាយផងដែរ។សូមបញ្ជាក់ដែរថាស្រុកចិនមាននិស្សិតខ្មែរជា២៤០០នាក់នៅរៀនសូត្រ។តែសមណាងល្អពួកគេប្រមាណ៧០ភាគរយបានមកលេងស្រុកបានមុន។
