ភ្នំពេញ៖ មន្ត្រីអ្នកនាំពាក្យអាជ្ញាធរអាកាសចរណ៍ស៊ីវិលកម្ពុជាលោក ជា អូន ឲ្យបណ្តាញផ្សព្វផ្សាយដឹងនៅរសៀលថ្ងៃទី២៨ខែមករាឆ្នាំ២០២០នេះថាកម្ពុជា បានផ្អាកជើងហោះហើរពីទីក្រុងWuhan ប្រទេសចិនជាបណ្ដោះអាសន្នហើយដើម្បីបង្ការការរីករាលដាលការឆ្លងវីរុស”កូរ៉ូណា” ចូលមកក្នុងប្រទេសកម្ពុជា។
តែលោកជាអូនបានបដិសេធថាមិនអាចបិទការហោះហើរពីចិន មកកម្ពុជា បានទេព្រោះកាលណាបិទអាចធ្វើឲ្យប៉ះពាល់ដល់សេដ្ឋជាតិទាំងមូល ។ លោកជាអូនបញ្ជាក់ថា ចំពោះជើងហោះហើរ ពីក្រុងវូហាន មកកាន់កម្ពុជា គឺបានបិទតាំងពីថ្ងៃទី២៣ ខែមករា ឆ្នាំ២០២០មកម្ល៉េះ។ មានពលរដ្ឋជាច្រើនបានសំណូមពរឲ្យរដ្ឋាភិបាលបិទជើងហោះហើរទាំងមូលពីប្រទេសចិន មកកម្ពុជាក្រោយពីមន្ត្រីសុខាភិបាលកម្ពុជា បានរកឃើញករណីឆ្លងជំងឺប្រភេទថ្មីនេះ កាលពីថ្ងៃ២៧ មករា ទៅលើបុរសជនជាតិចិនម្នាក់ អាយុជាង៦០ឆ្នាំ ដែលធ្វើដំណើរមកពីក្រុងវូហាន ប្រទេសចិន ជាទីដែលនាំឲ្យកើតជំងឺកូរ៉ូណា ដើម្បីបង្កាជំងឺប្រភេទថ្មីនេះ។
បើតាមការអះអាង របស់នាយកដ្ឋានប្រយុទ្ធប្រឆាំងនឹងជំងឺឆ្លង CDC រហូតដល់ថ្ងៃត្រង់២៨ មករា ស្ថានភាពសុខភាពល្អបុរសនោះ គ្មានរោគសញ្ញាធ្ងន់ធ្ងរអ្វីទេ ។ ក្នុងនោះ ក៏បានរកឃើញអ្នកប៉ះពាល់ និងជិះយន្តហោះជាមួយអ្នកជំងឺ ដោយរហូតពេលនេះ ពុំមានអ្នកចេញរោគសញ្ញាអ្វីនៅឡើយ ។
ចំពោះព័ត៌មានថា មានជនជាតិចិនប្រមាណជា៣ពាន់នាក់ មកពីក្រុងវូហានដែលបានផ្ទុះជំងឺកូរ៉ូណា ចូលមកក្នុងខេត្តព្រះសីហនុ លោកថា ពិតជាមានប្រាកដមែន ប៉ុន្តែភាគីពាក់ព័ន្ធបានយកចិត្តទុកដាក់ដើម្បីតាមដានអំពីស្ថានភាពនៃវិរុសនេះ ពីពួកគេយ៉ាងយកចិត្តទុកដាក់បំផុត។
យោងទៅតាមទីភ្នាក់ងារអន្តរជាតិចិន ស៊ិនហួរ ដែលបានចុះផ្សាយនារសៀលថ្ងៃទី២៨ ខែមករា ឆ្នាំ២០២០ នេះថា បើតាមមន្ត្រីសុខាភិបាលចិន បានបញ្ជាក់ថាអ្នកឆ្លងវីរុសកូរ៉ូណាផ្លូវដង្ហើម កើនឡើងដល់៤,៥១៥ រីឯ មនុ៦,៩៧៣ នាក់ផ្សេងទៀត សង្ស័យថាបានឆ្លង។ ហើយបើគិតចាប់ពីថ្ងៃផ្ទុះវីរុសដ៏កាចសាហាវនេះ មានតែជនរងគ្រោះ ៦០នាក់ប៉ុណ្នោះ បានជាសះស្បើយ។
មន្ត្រីដដែលនោះបានបញ្ជាក់ទៀតថា វីរុសនេះបានបណ្តាលឲ្យមានអ្នកស្លាប់ចំនួន ១០៦នាក់ និង៩៧៦នាក់ផ្សេងទៀត កំពុងស្ថិតក្នុងស្ថានភាពធ្ងន់ធ្ងរ។
ប្រភពពីអាជ្ញាធរនៃខេត្តហ៊ូប៉ី (Hubei)និងទីក្រុងអ៊ូហាន(Wuhan)ប្រទេសចិន ដែលជាទីកន្លែងផ្ទុះវីរុ.សកូរ៉ូណា បញ្ជាក់ថាមានមនុស្សសរុប២៤នាក់បន្ថែមទៀតបានស្លា.ប់និង១,២៩១នាក់ទៀតបានឆ្លងកាលពីថ្ងៃទី២៧ខែមករា សូមបញ្ជាក់ថា ក្រៅពីប្រទេសចិន មិនទាន់មានប្រទេសណាផ្សេងទៀត បានរាយការណ៍អំពីករណីស្លាប់ដោយសារវីរុសកូរ៉ូណានោះឡើយ ខណៈប្រទេសមួយចំនួន បានព្យាយាមព្យាបាលអ្នកឆ្លង ឲ្យបានធូរស្រាលឡើងវិញផងដែរ។
