ភ្នំពេញ៖ ប្រហែលអស់សង្ឃឹមនឹងវិធានការណ៍របស់អាជ្ញាធរក្នុងការការពារព្រៃឈើកាលពីព្រឹកថ្ងៃទី២៣មករាក្រុមយុវជន ព្រះសង្ឃ និងអ្នកសហគមន៏ដែលរស់នៅក្បែរនៅតំបន់ចំនុចអូរតាអោន ស្រុកជាំក្សាន្ដ ខេត្តព្រះវិហារ បានធ្វើពិធីបុណ្យកាន់ទុក្ខជូនដើមឈើ ដែលត្រូវពួកជនទុច្ចរិតលួចកាប់បំផ្លាញពីមួយថ្ងៃ ទៅមួយថ្ងៃ។
ប្រភពព័ត៌អ្នកចូលរួមមានបានឲ្យដឹងថា កម្មវិធីបុណ្យនេះ មានមនុស្សចូលរួមសរុបទាំងអស់ចំនួន៥៦នាក់ ក្នុងនោះមានព្រះសង្ឃ៥អង្គ មន្ត្រីបរិស្ថាន៤នាក់ និងប៉ូលិសម្នាក់។
តាមការកត់សម្គាល់របស់សហគមន៍ បានឲ្យដឹងថាភាគច្រើនឈើដែលគេលួចកាប់នេះគឺសម្រាប់លក់ឲ្យសិប្បកម្ម រួមមានដើមឈើទាល ដើមត្រាច និងដើមឈើផ្តៀក។
គួររំលឹកដែលថា ព្រៃព្រះរការ ត្រូវបានគេដាក់ចូលជាដែនជម្រកសត្វព្រៃកាលពីឆ្នាំ២០១៦ ដោយមានផ្ទៃដីសរុបចំនួន ៩០៣៦១ហិចតា ដោយគ្រប់ដណ្ដប់ស្រុកចំនួនបី គឺស្រុកត្បែងមានជ័យ ស្រុកឆែប និងស្រុកជាំក្សាន្ដ ត្រូវចាត់ទុកថាជាព្រៃធំទី២ របស់ប្រទេសខ្មែរ បន្ទាប់ពីព្រៃឡង់នៅក្នុងខេត្តកំពង់ធំ។ ក៏ប៉ុន្តែបច្ចុប្បន្ន ព្រៃព្រះរកា កំពុងទទួលរងការកាប់ធ្វើអាជីវកម្មខុសច្បាប់យ៉ាងធ្ងន់ធ្ងរពីក្រុមឈ្មួញ និងក្រុមអ្នកមានអំណាចខ្លះ។
