ខេត្តប៉ៃលិន ៖ មានការភ្ញាក់ផ្អើលមួយ បានកើតឡើងកាលពីវេលាម៉ោង ៦និង០០នាទីព្រឹក ថ្ងៃទី១៧ ខែសីហា ឆ្នាំ២០១៦ ខណៈប្រជាពលរដ្ឋដើរទៅចំការក៏ប្រទះឃើញសាកសពបុរសចំណាស់ម្នាក់ បានដេកស្លាប់យ៉ាងអាណោចអធ័ម ក្បែរគម្ពោធព្រៃ រួចក៏រាយការប្រាប់សមត្ថកិច្ចឲ្យចុះពិនិត្យ ។ ហេតុការខាងលើនេះ បានកើតឡើងនៅលើដីចំការមួយកន្លែង ត្រង់ចំណុចអូរជ្រៅ ក្នុងភូមិថ្នល់កែង ឃុំអូរអណ្តូង ស្រុកសាលាក្រៅ ខេត្តប៉ៃលិន ។
ជនរងគ្រោះមានឈ្មោះ ឃួត ឈឿន ភេទ ប្រុស អាយុ ៨៥ឆ្នាំ ជាអ្នកស្នាក់នៅវត្តសាលាក្រៅចាស់ ក្នុងភូមិទូលខ្ពស់ ឃុំស្ទឹងត្រង់ ស្រុកសាលាក្រៅ (ស្លាប់ដោយខ្យល់គ) ។
ប្រភពព័ត៌មាន ពីកន្លែងកើតហេតុ បានឲ្យដឹងថា៖ មុនពេលកើតហេតុ ជនរងគ្រោះជាមនុស្សចាស់ ហើយតែងដើរវង្វេងផ្ទះជាញឹកញាប់ ប៉ុន្តែនៅពេលថ្មីៗនេះ ជនរងគ្រោះបានបាត់ពីផ្ទះចំនួន១យប់ ១ថ្ងៃ ដោយពុំដឹងថាដើរទៅទីណាឡើយ ពេលនោះសាច់ញតិនិងអ្នកជិតខាង បានដើររកដែរតែរកមិនឃើញ លុះព្រឹកថ្ងៃទី១៧ ខែសីហា ឆ្នាំ២០១៦ វេលាម៉ោង៦និង០០នាទី ទើបប្រជាពលរដ្ឋបានប្រទះឃើញជនរងគ្រោះខាងលើ បានដេកស្លាប់ដែលគេសង្ស័យថាដោយសារខ្យល់គ រួចក៏រាយការប្រាប់សមត្ថកិច្ចឲ្យដឹងតែម្តង ។
លោក គង់ ណន អធិការរងស្រុកសាលាក្រៅ បានឲ្យអ្នកយកព័ត៌មានដឹងថា៖ គ្រាន់តែទទូលដំណឹងភ្លាម លោកក៏សុំយោលបល់ពីថ្នាក់លើ ព្រមទាំងបញ្ជាកម្លាំងឲ្យចុះទៅពិនិត្យមើលទីតាំងខាងលើ រួចទើបដឹងថា សពជនរងគ្រោះឈ្មោះ ឃួត ឈឿន ភេទ ប្រុស អាយុ ៨៥ ឆ្នាំ ជាអ្នកស្នាក់នៅវត្ត សាលាក្រៅចាស់ ក្នុងភូមិទូលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។ លោកបន្តឲ្យដឹងថា៖ បើយោងតាមប្អូនស្រីជនរងគ្រោះឈ្មោះ ស៊ុន ង៉ាំ ភេទស្រី អាយុ៦៨ឆ្នាំ រស់នៅក្បែរវត្តសាលាក្រៅចាស់ បាននិយាយប្រាប់សមត្ថកិច្ចថា ជនរងគ្រោះជាមនុស្សចាស់ ហើយតែងតែដើរវង្វេង ជាញឹកញាប់ ហើយនៅថ្ងៃកើតហេតុជនរងគ្រោះ បានបាត់ពីកន្លែងស្នាក់នៅមួយយប់មួយថ្ងៃ មិនដឹងទៅទីណានោះទេ ទើបតែថ្ងៃកើតហេតុក៏ប្រជាពលរដ្ឋប្រទះឃើញដេកស្លាប់តែម្តង ។
បើតាមសមត្ថកិច្ចជំនាញចុះពិនិត្យ និងធ្វើកោសល្យវិច័យសាកសព បានសន្និដ្ឋានថា៖ ជនរងគ្រោះស្លាប់ដោយសារខ្យល់គ ប្រាកដមែន ដោយសារដើរវង្វេង អត់អាហារហូប ។ បច្ចុប្បន្នសពជនរងគ្រោះ ត្រួវសមត្ថកិច្ចជំនាញ ប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕
ដោយ ៖ ទូច សុខន