បាត់ដំបង៖ នៅព្រឹកថ្ងៃទី១៦ ខែមករា ឆ្នាំ២០២២០មានពិធីចុះហត្ថលេខា រវាងលោក ងួន រតនៈ អភិបាលខេត្តបាត់ដំបង និង លោក តូគីហិរ៉ូ ណាកាម៉ូរ៉ា អភិបាល ខេត្តអិហ៊ិមិ ស្តីពីការផ្តល់អាហារូបករណ៍ ឱ្យនិស្សិតខេត្តបាត់ដំបង ទៅសិក្សានៅប្រទេសជប៉ុន ដើម្បីយកចំណេះដឹងមកអភិវឌ្ឍន៍ ខេត្តរបស់ខ្លួន ។
អភិបាលខេត្តអិហិមិ នៃប្រទេសជប៉ុន មានបំណង ជួយជំរុញភាពជឿនលឿនលើវិស័យឧស្សាហកម្ម ដោយផ្តោត សំខាន់លើការកែច្នៃចំណីអាហារ តាមរយៈការប្រើប្រាស់ផលិតផលក្នុងខេត្ត និង បច្ចេកវិទ្យានានានៅខេត្តបាត់ដំបង ។ ក្រៅពីការអភិវឌ្ឍន៍លើវិស័យឧស្សាហកម្ម ភាគីទាំងពីរ បានចុះកិច្ចព្រមព្រៀង ទៅលើការសហប្រតិបត្តិការផ្នែកសេដ្ឋកិច្ច ពាណិជ្ជកម្ម វិនិយោគ ការអភិវឌ្ឍន៍ធនធានមនុស្ស និង ចំណុចសំខាន់ៗមួយចំនួនទៀត ។
លោក តូគីហិរ៉ូ ណាកាម៉ូរ៉ា អភិបាលខេត្តអិហ៊ិមិ បានមានប្រសាសន៍ថា កិច្ចព្រមព្រៀង ដែលបានឯកភាពគ្នានេះ គឺបានផ្តល់នូវសារសំខាន់ និង ឧត្តមប្រយោជន៍ឱ្យគ្នាទៅវិញទៅមក និងបានរួមចំណែកក្នុងការពង្រឹងមិត្តភាព សាមគ្គីភាព ដូចដែលភាគីជប៉ុន ធ្លាប់បានជួយដល់ ខេត្តបាត់ដំបង កន្លងមកជប៉ុនបានជួយស្ថាបនាផ្លូវថ្នល់ វិស័យអប់រំ វិស័យទឹកស្អាត ការងាររំដោះដីចម្ការមីន និង អភិវឌ្ឍន៍សហគមន៍នៅមូលដ្ឋាន ជាដើម ៕