ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នាល្ងាចថ្ងៃទី១៤ ខែមករានេះ ថ្លែងទៅកាន់អ្នកសារព័ត៌មាន ជាង៥ពាន់នាក់ មកគ្រប់ស្ថាប័ន នៅក្នុងពិធីជួបជុំលើកទី៤ ជាមួយអ្នកសារព័ត៌មាន,។
ក្រៅពីការលើកឡើង អំពីការខិតខំប្រឹងប្រែង ក្នុងរយៈពេល១ឆ្នាំកន្លងទៅ ដែលអ្នកសារព័ត៌មាន បានចូលរួមចំណែក ក្នុងការអភិវឌ្ឍសង្គមជាតិនោះ ក៏បានលើកឡើង ពីការអន់ចិត្ត ដែលភាពអវិជ្ជមាន បានធ្វើឡើង ដោយអ្នកសារព័ត៌មានមួយចំនួនតូច ដោយបានផ្សព្វផ្សាយបំពាន ដល់អ្នកដទៃផងដែរ។
សម្តេចតេជោ ក៏បានដាក់ចេញនូវអនុសាសន៍ ដើម្បីឲ្យអ្នកសារព័ត៌មាន ចូលរួមអនុវត្តផងដែរ នោះគឺអ្នកសារព័ត៌មានទាំងអស់ ត្រូវធ្វើបន្ត ចូលរួមក្នុងការរក្សាសន្តិភាព, ចូលរួមចំណែករក្សា ស្ថេរភាពនយោបាយ សុវត្ថិភាពសង្គម ចូលរួមអនុវត្ត គោលនយោបាយ ភូមិឃុំមានសុវត្ថិភាព និងត្រូវចូលរួម ដើម្បីរក្សាម៉ាក្រូសេដ្ឋកិច្ច តាមរយៈការចូលរួមផ្សាយព័ត៌មានពិត ប្រឆាំងនឹងព័ត៌មានក្លែងក្លាយ។
សារគន្លឹះរបស់សម្ដេចតេជោ ហ៊ុន សែន ក្នុងជំនួបលើកទី៤ ជាមួយអ្នកសារព័ត៌មាន
១.សម្តេចតេជោ ហ៊ុន សែន ផ្តល់ពាក្យស្លោកជូនអ្នកសារព័ត៌មាន «កុំបំពានសិទ្ធិអ្នកដទៃ កុំបំភ្លៃការពិត» ដើម្បីពង្រឹងវិជ្ជាជីវៈ និងជំនឿទុកចិត្តពីសាធារណជន។
២.សម្តេចតេជោ ហ៊ុន សែនប្រកាសថា៖ ច្បាប់ស្តីពី «សិទ្ធិទទួលបានព័ត៌មាន» នឹងត្រូវចេញនៅក្នុងឆ្នាំ២០២០នេះ។
៣.សម្តេចតេជោ ហ៊ុន សែន សម្រេចផ្តល់ក្រុមមេធាវីរបស់សម្តេច ដើម្បីការពារក្តីដល់អ្នកសារព័ត៌មានដែលគោរពវិជ្ជាជីវៈ។
៤.សម្ដេចតេជោ ហ៊ុន សែន ប្រកាសកំណត់យកថ្ងៃទី១៤ ខែមករា រៀងរាល់ឆ្នាំ ដើម្បីជួបជុំអ្នកសារព័ត៌មាន។
៥.សម្តេចតេជោ ហ៊ុន សែន ប្រតិកម្មចំពោះភាពឆ្គាំឆ្គងរបស់អ្នកព័ត៌មាន Live តាម Facebook។ក្នុងនោះបានរិះគន់ចំៗចំពោះលោកសានប៊ុនធឿនសកម្មជនហ្វេប៊ុកដែលឡាយវិដេអូជេគេឯង។
៦.សម្តេចនាយករដ្ឋមន្ត្រី៖ ហ៊ុន ម៉ាណែត ទោះបីជាមានលទ្ធភាពគ្រប់គ្រាន់នឹងក្លាយជានាយករដ្ឋមន្ត្រី ក៏ត្រូវរង់ចាំពេលវេលា និងឆ្លងកាត់ការបោះឆ្នោតដែរ។បើតាមសម្តេចគឺអាចដល់ឆ្នាំ២០៣០ណោះ។
៧.សម្តេចតេជោ ហ៊ុន សែន ស្នើឱ្យអ្នកព័ត៌មានចូលរួមកាន់តែច្រើន ក្នុងការប្រយុទ្ធនឹងភាពអសកម្ម អំពើពុករលួយ និងអយុត្តិធម៌ក្នុងសង្គម។
៨.សម្តេចតេជោ ហ៊ុន សែន ប្រាប់មន្ត្រីកុំឱ្យយកអ្នកព័ត៌មានធ្វើសត្រូវ។
៩.សម្ដេចតេជោ ហ៊ុន សែន បញ្ជាឲ្យស៊ើបអង្កេតលើករណីមនុស្សស្លាប់ នៅខេត្តបន្ទាយមានជ័យ ដែលត្រូវបានអះអាងថា ស្លាប់ដោយការធ្វើទារុណកម្ម។
១០.សម្តេចតេជោ ហ៊ុន សែន ស្នើស្ថាប័នព័ត៌មាន-អ្នកព័ត៌មានធ្វើជាស្ពានចម្លងការពិតរវាងរាជរដ្ឋាភិបាល និងប្រជាពលរដ្ឋ។
