ប្រទេសចិន៖ នៅថ្ងៃពុធទី១៥មករាមន្ត្រីចិនបាននិយាយនៅក្នុងសន្និសីទកាសែតថាក្រុងប៉េកាំងនឹងមិនផ្លាស់ប្តូរគោលនយោបាយរបស់ខ្លួនក្នុងការបញ្ចូលកោះតៃវ៉ាន់មកក្នុងទឹកដីរបស់ខ្លួនតាមរយៈក្របខ័ណ្ឌ “ប្រទេសមួយប្រព័ន្ធដឹកនាំពីរ” ឡើយ បើទោះបីជាមានអ្នកបោះឆ្នោតយ៉ាងច្រើនបានបោះឆ្នោតគាំទ្របេក្ខជនគាំទ្រឯករាជ្យនៅក្នុងការបោះឆ្នោតប្រធានាធិបតីនៅក្នុងកោះតៃវ៉ាន់កាលពីសប្ដាហ៍មុនក៏ដោយ។
លោក ម៉ា ស៊ាវគ័ង (Ma Xiaoguang) អ្នកនាំពាក្យការិយាល័យកិច្ចការកោះតៃវ៉ាន់បាននិយាយថាប្រទេសចិននឹងបន្តប្រកាន់យកការព្រមព្រៀងគ្នាដែលទទួលស្គាល់ទាំងកោះតៃវ៉ាន់និងចិនដីគោកថាជាផ្នែកមួយនៃប្រទេសចិនតែមួយ។
លោក ម៉ា និយាយថារដ្ឋាភិបាលកោះតៃវ៉ាន់ចាំបាច់ត្រូវ “ពិចារណាឲ្យបានស៊ីជម្រៅ” ដោយបានអះអាងសាធារណជនចិនកាន់តែច្រើនឡើងបានអំពាវនាវឲ្យចិនធ្វើសកម្មភាពបែបនោះ។
លោកម៉ាបាននិយាយនៅក្នុងសន្និសីទសារព័ត៌មានក្នុងទីក្រុងប៉េកាំងថា ប្រព័ន្ធនយោបាយដែលមានលក្ខណៈខុសគ្នាមិនមែនជាឧបសគ្គក្នុងការបង្រួបបង្រួមកោះតៃវ៉ាន់ជាមួយចិននោះទេហើយក៏មិនមែនជាលេសសម្រាប់ការធ្វើជារដ្ឋឯករាជ្យរបស់កោះតៃវ៉ាន់នាពេលបច្ចុប្បន្ននេះដែរ។
លោកស្រី សៃ អ៊ីងវេន (Tsai Ing-wen) ដែលជាប្រធានាធិបតីគាំទ្រឯករាជ្យភាពរបស់កោះតៃវ៉ាន់បានជាប់ឆ្នោតជាប្រធានាធិបតីកោះតៃវ៉ាន់សាជាថ្មីដោយទទួលបានសម្លេងឆ្នោតគាំទ្រយ៉ាងភ្លូកទឹកភ្លូកដីកាលពីថ្ងៃសៅរ៍ខណៈដែលគណបក្សរបស់លោកស្រីបានរក្សាសំឡេងភាគច្រើននៅក្នុងសភា។
អ្នកស្រីសៃ( Tsai Ing-wen បានប្រកាសពីជំហរលោកស្រីថា អធិបតេយ្យភាពរបស់តៃវ៉ាន់ មិនមែនសម្រាប់ដាក់ចរចានោះឡើយ។
“ពួកយើងមិនចាំបាច់ត្រូវប្រកាសខ្លួនជារដ្ឋឯករាជ្យនោះឡើយ។ ពួកយើងគឺជាប្រទេសឯករាជ្យស្រាប់ទៅហើយ ហើយពួកយើងហៅខ្លួនឯងថា សាធារណរដ្ឋតៃវ៉ាន់”។
សូមបញ្ជាក់ថា តៃវ៉ាន់តែងចាត់ទុកខ្លួនជារដ្ឋឯករាជ្យ ប៉ុន្តែគ្រាន់តែមិនហ៊ានប្រកាសឯករាជ្យប៉ុណ្ណោះ ព្រោះចិនតែគំរាមវាយយកតៃវ៉ាន់វិញដោយប្រើកម្លាំងទ័ព ប្រសិនជាចាំបាច់៕