ភ្នំពេញ ៖ បេក្ខជនប្រឡងសិស្សចៅក្រមជំនាន់ទី១០ចំនួន៥រូប កើតទុក្ខ មិនសុខចិត្តចំពោះភាពមិនប្រក្រតីនៃការប្រឡងជ្រើសរើសសិស្សចៅក្រមជំនាន់ទី១០ ស្នើសូមការអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
បេក្ខជនទាំង៥រូបនោះ បានធ្វើលិខិត ស្នើដល់សម្តេចតេជោ ហ៊ុន សែនមេត្តាជួយអន្តរាគមន៍ទៅគណៈកម្មការនាយករៀបចំការប្រឡងប្រជែងជ្រើសរើសសិស្សចៅក្រមជំនាន់ទី១០ ក្នុងគោលបំណងជម្រុញឲ្យមានតម្លាភាពលើលទ្ធផលនៃការប្រទ្បងប្រជែងជ្រើសរើសសិស្សចៅក្រមជំនាន់ទី១០លើវិញ្ញាសាសរសេរ និងវិញ្ញាសាផ្ទាល់មាត់ដូចខាងក្រោម ៖
១-បង្ហាញអំពីនីតិវិធីនៃការដាក់ពិន្ទុលើវិញ្ញាសាសរសេរ។ ២-បង្ហាញអំពីលទ្ធផលពិន្ទុ ប្រៀបធៀប និងផ្ទៀងផ្ទាត់ចម្លើយលើឯកសារសរសេរនៅក្នុងដំណាក់កាលនៃការប្រទ្បងលើវិញ្ញាសាសរសេររបស់បេក្ខជនជាប់ជាស្ថាពរ៥០រូបជាមួយនឹង លទ្ធផលពិន្ទុ និងចម្លើយឯកសារសរសេររបស់ពួកយើងខ្ញុំ។ ៣-បង្ហាញអំពីនីតិវិធីនៃការដាក់ពិន្ទុលើវិញ្ញាសារផ្ទាល់មាត់។៤-បង្ហាញអំពីលទ្ធផលពិន្ទុ ប្រៀបធៀប និងផ្ទៀងផ្ទាត់សំនួរនិងចម្លើយផ្ទាល់មាត់នៅក្នុងដំណាក់កាលនៃការប្រទ្បងលើវិញ្ញាសារផ្ទាល់មាត់របស់បេក្ខជនជាប់ជាស្ថាពរ៥០រូប ជាមួយនឹងលទ្ធផលពិន្ទុ និងចម្លើយផ្ទាល់មាត់របស់ពួកគេ។
ពួកគាត់ចាត់ទុក ការប្រកាសលទ្ធផលវិញ្ញាសាសរសេរនៃការប្រទ្បងប្រជែងជ្រើសរើសសិស្សចៅក្រមជំនាន់ទី១០នៃរាជបណ្ឌិតសភាវិជ្ជាជីវៈតុលាការ ចុះថ្ងៃទី១២ខែធ្នូ ឆ្នាំ២០១៩ ដោយមិនមានចេញជាលទ្ធផលពិន្ទុតាមមុខវិជ្ជានីមួយៗដូចជំនាន់មុនៗ។ សេចក្តីប្រកាសអំពីលទ្ធផលស្ថាពរសម្រាប់ការប្រទ្បងប្រជែងជ្រើសរើសសិស្សចៅក្រមជំនាន់ទី១០ចុះថ្ងៃទី១៩ ខែធ្នូ ឆ្នាំ២០១៩។ពាក្យស្នើសុំរបស់យើងខ្ញុំទាំងប្រាំរូបចុះថ្ងៃទី ២០,២៣,២៤ ខែធ្នូ ឆ្នាំ២០១៩។
លិខិតបានជម្រាបជូនសម្តេចតេជោ ហ៊ុន សែន ថា យើងខ្ញុំជាបេក្ខជន បានដាក់ពាក្យ និងបានចូលរួមប្រទ្បងប្រជែងជ្រើសរើសសិស្សចៅក្រមជំនាន់ទី១០ ដោយមានការកើតទុក្ខមិនសុខចិត្តទៅនឹងលទ្ធផលស្ថាពរនៃការប្រឡងប្រជែងជ្រើសរើសសិស្សចៅក្រមជំនាន់ទី១០ កន្លងទៅថ្មីៗនេះដោយហេតុថា យើងខ្ញុំបានធើ្វការខិតខំ ប្រឹងប្រែងព្យាយាមសិក្សាស្រាវជ្រាវ ផ្នែកច្បាប់ជាច្រើនឆ្នាំមកហើយ ដើម្បីមានសមត្ថភាពគ្រប់គ្រាន់ ក្នុងការចូលរួមប្រឡងប្រជែងជ្រើសរើសសិស្សចៅក្រមមួយនេះ ដោយចំណាយពេលវេលា និងការលះបង់ទាំងកម្លាំងកាយទាំងកម្លាំងចិត្ត មិនតែប៉ុណ្ណោះ យើងខ្ញុំក៏ធ្លាប់មានបទពិសោធន៍ប្រឡងជាប់វគ្គសរសេរសិស្សចៅក្រមជំនាន់មុនៗផងដែរ។
ប្រភពបានអំពាវនាវថាសូមសម្តេចតេជោ ហ៊ុន សែន មេត្តាជួយជំរុញឲ្យគណៈកម្មការនាយករៀបចំការប្រឡងប្រជែងជ្រើសរើសសិស្សចៅក្រមជំនាន់ទី១០ ផ្តល់តម្លាភាពចំពោះលទ្ធផលនៃការប្រឡងប្រជែងជ្រើសរើសសិស្សចៅក្រមជំនាន់ទី១០នេះ ដោយក្តីអនុគ្រោះដ៏ខ្ពង់ខ្ពស់បំផុត។
