ចាប់ពីក្រោយថ្ងៃទី១៥មករាឆ្នាំ២០២០តទៅសង្គ្រាមពាណិជ្ជកម្មរវាងអាមេរិកនិងចិនដែលបង្កការព្រួយបារម្ភពាសពេញពិភពលោកនឹងបានធូស្រាលហើយ។ កាលពីថ្ងៃអង្គារ ៣១ធ្នូលោកប្រធានាធិបតីសហរដ្ឋអាម៉េរិក ដូណាល់ ត្រាំ បានប្រកាស ថា គាត់នឹងចុះហត្ថលេខាលើកិច្ចព្រមព្រៀងដំនាក់កាលទី១ ជាមួយមន្ត្រីចិននៅថ្ងៃ១៥មករា នៅសេតវិមាន។
សារមួយដែលបញ្ចេញតាមបណ្តាញសង្គម Twitter លោក ត្រាំ និយាយថា “តំណាង់ថ្នាក់ខ្ពស់នៃប្រទេសចិន នឹងមានវត្តមាន” នៅក្នុងពិធីចុះហត្ថលេខាថ្ងៃនោះ ហើយក៏បានសន្យាថាគាត់អាចនឹងទៅក្រុងប៉េកាំង នៅថ្ងៃក្រោយទៀត “ដើម្បីបើកការពិភាក្សាពីវគ្គពីរ”។ កិច្ចព្រមព្រៀង ត្រូវបានគេមើលឃើញថាជាការបន្ធូរបន្ថយយ៉ាងខ្លាំងដល់សង្គ្រាមពាណិជ្ជកម្ម រវាងចិន និងរដ្ឋបាល ត្រាំ។
សូមបញ្ជាក់ថា៖ កិច្ចព្រមព្រៀង ដែលចាប់ផ្តើមពីថ្ងៃ១មករាតទៅ នឹងបន្ទាបតារាងពន្ធគយលើការនាំចូលពីក្រៅប្រទេសជាង៨៥០មុខ រាប់តាំងពីសាច់ជ្រូកដល់គ្រឿងចម្លងអគ្គិសនី ដើម្បីជំរុញ “លំហូរសេរី” នៃពាណិជ្ជកម្ម។ កិច្ចព្រមព្រៀង ក៏នឹងដកចេញនូវតារាងពន្ធមិនបញ្ជាក់ លើទំនិញពីប្រទេសចិន ជាដំនាក់ៗ និងមានការសន្យាពីចិនថានឹងទិញទំនិញកសិកម្មសហរដ្ឋអាម៉េរិកវិញដែរ។ ដូណាល់ ត្រាំ ថានឹងនៅរក្សាតារាងពន្ធគយ២៥% លើទំនិញមានតម្លៃ២៥០ ពាន់លានដុល្លារ នៃទំនិញនាំចូលពីចិន ខណៈការដាក់ពន្ធលើទំនិញមានតម្លៃ១២០ពាន់លានដុល្លារ នៃទំនិញចិនផ្សេងទៀត នឹងត្រូវកាត់ដល់៧,៥%៕
