សៀមរាប៖ ភ្ញៀវទេសចរមានចំនួនប្រមាណជិត៣០ម៉ឺននាក់បាន ចូលរួមអបអរពីធីឆ្លងឆ្នាំសកលឆ្នាំ២០១៩ និងឆ្នាំ២០២០ នៅខេត្ដសៀមរាបគឺ បើធៀបនឹងឆ្នាំ២០១៨ កើនឡើងជាង៤%។ប៉ុន្តែអ្វីដែលជាការកត់សម្គាល់ ឆ្នាំនេះភ្ញៀវទេសចរអន្ដរជាតិបានថយចុះតិចជាងភ្ញៀវខ្មែរយើង។
របាយការណ៍របស់មន្ទីរទេសចរណ៍ខេត្ដសៀមរាបឲ្យដឹងថា ភ្ញៀវទេសចរជាតិ និងអន្តរជាតិចូលមកទស្សនាខេត្ត សៀមរាបក្នុងថ្ងៃឆ្លងឆ្នាំសាកល ២០១៩ ចូលឆ្នាំ២០២០ មានភ្ញៀវទេសចរសរុបមានចំនួនប្រមាណ២៩៦, ៣២២នាក់ មានការកើនឡើង+៤.៣៣% បើប្រៀបធៀបរយៈពេលដូចគ្នាឆ្នាំ២០១៨ ចំនួន ២៨៤,០៣១នាក់ ។
ក្នុងនោះ មានភ្ញៀវទេសចរអន្តរជាតិមានចំនួន ២៦,៣២២នាក់ មានការថយចុះ-២២.៦៥% បើប្រៀបធៀបរយៈពេលដូចគ្នាឆ្នាំ២០១៨ ចំនួន ៣៤,០៣១នាក់។ របាយការណ៍បានបន្ដថា ភ្ញៀវទេសចរជាតិមានចំនួនប្រមាណ២៧ ម៉ឺននាក់ មានការកើនឡើងប្រមាណ+៨.០០% បើប្រៀបធៀបរយៈពេលដូចគ្នាឆ្នាំ២០១៨ ចំនួនប្រមាណ២៥ ម៉ឺននាក់។
បញ្ហាសន្តិសុខអត់មានបញ្ហាអីទេបើតាមលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប។ កម្លាំងនគរបាលដែរឈរការពារនាឱកាសឆ្នាំសកលនេះ មានកម្លាំងចំនួន២០០នាក់ និងប្រជាការពារចំនួន២០០នាក់។ លោកបន្តថា បញ្ហាសន្តិសុខសណ្តាប់ធ្នាប់នៅក្នុងខេត្តសៀមរាប មានភាពល្អប្រសើរ។ ក្រុមចោរឆក់ ឬលូកហោប៉ៅអត់មាន.។
ដោយឡែកនៅខេត្តព្រះសីហនុវិញលោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានបញ្ជាក់ថា ស្ថានភាពភ្ញៀវទេសចរ ដែលមកកម្សាន្ដនៅខេត្តព្រះសីហនុ ក្នុងពិធីឆ្លងឆ្នាំនេះមាន ភ្ញៀវសរុបចំនួន ៣៥,០២៧នាក់ ថយចុះ ២៧.៦៣% ភ្ញៀវជាតិ ២៩.៤៤៥៧នាក់ ថយចុះ២៨.១៥% និងភ្ញៀវអន្តរជាតិ ៥.៥៧០នាក់ថយចុះ២៤.៧៩% ដែលក្នុងនោះរួមមាន៖
-ភ្ញៀវចូលតាមព្រលានយន្តហោះអន្តរជាតិក្រុងព្រះសីហនុ ១៨ជើង មានភ្ញៀវ ១,៨០០នាក់ ក្នុងនោះភ្ញៀវជាតិ ៥០នាក់ស្មើនឹង ២.៧៧% និងភ្ញៀវអន្តរជាតិ ១,៧៥០នាក់ ស្មើនឹង៩៧.២៧% ។
-ភ្ញៀវទេសចរទៅកម្សាន្តតាមកោះនានាសរុប ២,៦៩១នាក់ ភ្ញៀវជាតិ១.៧៥០នាក់ស្មើនឹង៦៥.០៣% និងអន្តរជាតិ ៩៤១នាក់ស្មើនឹង៣៤.៩៧%។
-ភ្ញៀវទៅកម្សាន្តតាមរមណីយដ្ឋាននានាសរុបរួម៖ ២.២២៦នាក់ ជាតិ ២.១៩៧នាក់ ស្មើនឹង៩៨.៦៩% អន្តរជាតិ ២៩នាក់ស្មើនឹង១.៣១%
-ភ្ញៀវកម្សាន្នមតាមបណ្តាឆ្នេរនានាក្នុងខេត្ត សរុបរួម ១៣.២៦៥នាក់ ជាតិ ១២.៨១៥នាក់ ស្មើនឹង ៩៦.៦០ និងអន្តរជាតិ ៤៥០នាក់ ស្មើនឹង ៣.៤០%។
