ភ្នំពេញ ៖ សណ្ឋាគារលំដាប់ផ្កាយ៥ ឌឹ ហ្គ្រេតឌុក(The Great Duke)អតីតសណ្ឋាគារអាំងទែកុងទីណង់តាល់ ឬហៅថា អ៊ិនធើខន បានប្រកាសបិទទ្វារឈប់ដំណើរការចាប់ពីថ្ងៃទី៣១ ខែធ្នូ ឆ្នាំ២០១៩នេះតទៅ។
ប្រភពពីបុគ្គលឹកឌឹ ហ្គ្រេតឌុក បានឲ្យដឹងថា ទីតាំងមួយនេះត្រូវបានបិទទាំងស្រុង និងមិនមានបុគ្គលិកណាម្នាក់មកធ្វើការទៀតទេ ក្រៅពីក្រុមសន្តិសុខប្រហែល ៥ទៅ៦នាក់ តែប៉ុណ្ណោះ។
ប្រភពដដែលបានឲ្យដឹងថា ពីមុនមកពេលសណ្ឋាគារឌឹ ហ្គ្រេតឌុក(The Great Duke)ដែលធ្លាប់ត្រូវបុគ្គលឹកតវ៉ាទាមទាបើកប្រាក់ខែបន្ទាប់មកនៅបន្តបើកដំណើរការ បុគ្គលិកខ្លះបើកប្រាក់ខែជាប្រាក់សុទ្ធ និងមួយចំនួនផ្សេងទៀតបើកតាមរយៈធនាគារដែរ។ តែការបិទលើកនេះ គឺមិនមែនមានការផ្លាស់ប្តូរថៅកែដូចមុននោះទេ គឺក្រុមហ៊ុនជាអ្នកសម្រេចបិទតែម្តង ព្រោះមិនសូវមានភ្ញៀវចូលមកស្នាក់នៅច្រើនដូចមុន ហើយក៏គ្មានភ្ញៀវចូលមកទទួលទានអាហារទៀតដែរ។
សេចក្ដីជូនដំណឹងរបស់ថ្នាក់ដឹកនាំសណ្ឋាគារខាងលើកាលពីពេលកន្លងទៅនេះ បានបញ្ជាក់ថា ចំពោះមូលហេតុនៃការបិទដំណើរការសណ្ឋាគារមួយនេះ ដោយសារតែបញ្ហាសេដ្ឋកិច្ច ហើយបុគ្គលិកទាំងអស់ត្រូវឈប់សម្រាកចាប់ពីថ្ងៃចេញសេចក្តីប្រកាស។ តែយ៉ាងណាក៏ដោយ សណ្ឋាគារនេះ អះអាងថា នឹងធ្វើការដោះស្រាយជូនបុគ្គលិករបស់ខ្លួនជាមួយក្រុមហ៊ុនមេធាវីនូវអត្ថប្រយោជន៍នានាផងដែរ។
ជុំវិញបញ្ហានេះ ឯកឧត្តម តុប សុភ័ក មន្ត្រីអ្នកនាំពាក្យក្រសួងទេសចរណ៍ បានឲ្យដឹងថា ក្រសួងមិនទាន់បានទទួលលិខិតពីការប្រកាសបិទទ្វារ ឬផ្អាកដំណើរការណាមួយពីសណ្ឋាគារមួយនេះនៅឡើយទេ ដោយសុំឲ្យទាក់ទាកទងទៅមន្ទីរទេសចរណ៍រាជធានីភ្នំពេញវិញ ព្រោះជាដែនរបស់មន្ទីរតែខាងមន្ទីរថាអត់ដឹងដែរ?។
សូមបញ្ជាក់ទៀតថា ចំនួនសណ្ឋាគារលំដាប់ផ្កាយ១ ដល់ផ្កាយ៥នៅកម្ពុជា មានចំនួនសរុប ១៥២សណ្ឋាគារ ក្នុងនោះមានបន្ទប់សរុបចំនួនជាង ១ម៉ឺន ៧ពាន់បន្ទប់ ។ ដោយឡែកសណ្ឋាគារផ្កាយ៥ទូទាំងប្រទេស មានចំនួន ៣៦សណ្ឋាគារ បន្ទប់សរុបចំនួនជាង ៨ពាន់បន្ទប់។ នៅភ្នំពេញមានសណ្ឋាគារផ្កាយ៥ មានចំនួន៧ គិតទាំងសណ្ឋាគារ ឌឹ ហ្គ្រេតឌុក ដែលមានបន្ទប់សរុបជិត ២ពាន់បន្ទប់ឯណោះ ៕