សៀមរាប ៖ សកម្មភាពបទល្មើសនេសាទ(ម៉ងម៉ាញ់)នៅតំបន់ចុងឃ្នៀសដែនឡូតិ៍លេខ៤ដែលជាដែនឡូតិ៍នេសាទបម្រុងរបស់រដ្ឋ ត្រូវបានគេរាយការណ៍ថា ផ្ទុះឡើងវិញវិញធ្វើឲ្យគេសង្ស័យថាមានការបើកភ្លើងខៀវពីសំណាក់សមត្ថកិច្ចពាក់ព័ន្ធនៅតំបន់នោះ ។
ប្រភពពីប្រជានេសាទបានឲ្យដឹងថា ក្រុមប្រព្រឹត្តបានប្រើឧបករណ៍នេសាទខុសច្បាប់ ប្រើអួនស្បៃមុង មានបណ្តាយ រាប់រយម៉ែត្រ សម្រាប់ចាប់ ត្រីខុសច្បាប់ ទាំងយប់ទាំងថ្ងៃបំផ្លាញ ធនធានមច្ឆជាតិ ចំណែកសមត្ថកិច្ចពាក់ព័ន្ធមិន ធ្វើការបង្ក្រាបនោះឡើយ។មួយរយៈពេល ចុងក្រោយនេះ បទល្មើសនេសាទប្រើ អួនស្បែមុងមាន បណ្តាយចាប់ពី៥០០ម៉ែត្រ ដល់១០០០ម៉ែត្រ និងបទល្មើសប្រើឧបករណ៍ នេសាទឆក់កំពុងកើតទ្បើងពេញបន្ទុកធ្វើឲ្យប៉ះពាល់យ៉ាង ខ្លាំងដល់ជីវភាព រស់នៅរបស់ ប្រជាពលរដ្ឋដែលប្រកបរបរ នេសាទជាលក្ខណៈគ្រួសារ ព្រោះពូជត្រីនៅក្នុងបឹងស្ទើរតែវិនាសសាបសូន្យអស់ទៅហើយ។
មន្ត្រីជលផល ចុងឃ្នៀស ជាអ្នកទទួល ខុសត្រូវ លើបទ ល្មើសនេសាទ នៅក្នុងតំបន់ គ្រប់គ្រង របស់ខ្លួន ប៉ុន្តែប្រជាពលរដ្ឋនិយាយថា៖ ក្រុមមន្ត្រីទាំងនោះមិនដែលចេញមុខបង្ក្រាបបទល្មើសនេសាទដែលកើតមាននៅក្រោមក្លៀករបស់ខ្លូន ម្ដងណាឡើយដែលធ្វើឲ្យគេគិតថា ក្រុមមន្ត្រីនៅទីនោះបានទទួល សំណូក ពីក្រុមឈ្មួញ ឬមិនបានឃើញ បទល្មើសនោះទេ?។
គួរបញ្ជាក់ថា អង្គភាព ប្រឆាំង អំពើពុករលួយ បានចាប់ខ្លួន នាយផ្នែកជលផល ដំដែក មួយរូប គឺលោករឹម សំអុន ពាក់ព័ន្ធ ទៅនិង ការប្រព្រឹត្ត អំពើពុកលួយ ឲ្យមាន បទល្មើសនេសាទ ដោយមានទំហំទឹកប្រាក់ជិត៤០ម៉ឺនដុល្លារកាលពីពេលកន្លងទៅថ្មីៗនេះធ្វើឲ្យបទល្មើសថយខ្លះៗដែរ។ ពាក់ព័ន្ធ នឹង ករណីនេះដែរ មិនអាចទាក់ទងសុំការពន្យល់ពីលោកព្រិន្ទ សាវិន នាយខណ្ឌរដ្ឋបាលជលផលខេត្តសៀមរាបបានទេនារសៀលថ្ងៃទី២៦ ខែធ្នូ ។
ចំណែកលោក ទា គឹមសុទ្ធ ប្រធានមន្ទីរកសិកម្មនិងរុក្ខាប្រម៉ាញ់និងនេសាទ ខេត្តសៀមរាប បានមានប្រសាន៍ប្រាប់កាសែតតាមទូរស័ព្ទ ថា ករណីម៉ងម៉ាញ់នេះលោកនៅមិនទាន់ដឹងនោះទេ។ហើយបើខាងណាអាចផ្តល់ព័ត៌មានច្បាស់លោកនឹងដឹកនាំកម្លាំងចុះទៅបង្ក្រាបដោយផ្ទាល់តែម្តង។
អ្នកព័ត៌មានបានទាក់ទងរាយការណ៍ផ្ទាល់ទៅ លោក ទៀសីហា អភិបាលនៃគណៈអភិបាលខេត្តសៀមរាប តាមប្រព័ន្ធតេឡេក្រាម លោកបានបញ្ជាក់តបថា (សូមអរគុណចំពោះដំណឹងនេះ លោកនឹងឲ្យសមត្ថកិច្ច ចុះពិនិត្យ) ?៕