ភ្នំពេញ ៖ នៅថ្ងៃទី២៦ ខែធ្នូ ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្ដអំពាវនាវជាថ្មីទៀតដល់ម្ចាស់បន្ទប់ជួល កុំដំឡើងថ្លៃឲ្យលើសពីអ្វី ដែលកម្មករ-កម្មការិនីទទួលបាន ។ខណៈដែលប៉ុន្មានថ្ងៃទៀត ប្រាក់បៀវត្សរ៍របស់កម្មករ-កម្មការិនី ដំឡើងបានត្រឹមតែ៨ដុល្លារប៉ុណ្ណោះ នៅក្នុងឆ្នាំ២០១៩នេះ។
ក្នុងឱកាសអញ្ជើញជា អធិបតីក្នុងពិធីប្រគល់សញ្ញាបត្រ ជូននិស្សិតបញ្ចប់ការសិក្សា នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) ប្រមាណ២,៧៩០នាក់ ក្នុងនោះនារី ១,៣៨០នាក់ ដែលរៀបចំធ្វើឡើង នៅវិទ្យាស្ថានជាតិអប់រំ នាព្រឹកថ្ងៃទី២៦ ខែធ្នូ ឆ្នាំ២០១៩នេះសម្ដេចតេជោ ហ៊ុន សែន បានថ្លែងថា «ឥឡូវនេះ សល់តែប៉ុន្មានថ្ងៃទៀត ប្រាក់បៀវត្សរ៍ឡើងកម្មករ-កម្មការិនីរបស់យើង ដំឡើងបានត្រឹមតែ៨ដុល្លារទេ នៅក្នុងឆ្នាំនេះ គឺពី១៨២ដុល្លារ ទៅកាន់១៩០ដុល្លារ ចំនួននេះគឺជាចំនួនមួយ ដែលអាចនឹងធ្វើឲ្យកម្ពុជាយើងក្នុងចំណោមប្រទេសមួយចំនួន…យើងឥលូវនេះ បានឡើងហួសពីកម្មករប្រទេសវៀតណាមទៅហើយ»។
សម្ដេចតេជោ ហ៊ុន សែន បានបន្ថែមទៀតថា «កម្មករវៀតណាម មានចែងជាតំបន់ តំបន់ខ្លះ១៣០ដុល្លារទេ ឯយើងមិនមានចែកជាតំបន់ទេ ១៩០ដុល្លារទាំងអស់ ប៉ុន្ដែខ្ញុំព្រះករុណាខ្ញុំ ក៏សូមនៅតែបន្ដអំពាវនាវចំពោះម្ចាស់ផ្ទះឈ្នួល ខិតខំធ្វើយ៉ាងម្ដេចកុំដំឡើងថ្លៃហួសពីអ្វី ដែលកម្មករទទួលបាន បើមិនចឹងទេ កម្មករឡើងប្រាក់ខែបានតែ៨ដុល្លារ ដល់តែបន្ទប់ឈ្នួលឡើងដល់១០ដុល្លារ វាចាប់ផ្ដើមរួច»។
សម្តេចនាយករដ្ឋមន្ដ្រីនៃកម្ពុជា ក៏បានតម្រូវឲ្យអាជ្ញាធរនៅតាមមូលដ្ឋាន ត្រូវធ្វើការជាមួយម្ចាស់ផ្ទះឈ្នួល ដើម្បីទប់ស្កាត់បញ្ហាឡើងឈ្នួលផ្ទះ និងបន្ទប់ ដើម្បីធានាថា កម្មករទទួលបានអត្ថប្រយោជន៍ ពីការដំឡើងប្រាក់ឈ្នួលយ៉ាងពិតប្រាកដ។ក្រៅពីកម្មករ មន្ដ្រីរាជការ កងកម្លាំងប្រដាប់វុធ ក៏នឹងចាប់ផ្ដើមឡើងប្រាក់បៀវត្សរ៍ នៅប៉ុន្មានថ្ងៃខាងមុខដែរ តែនេះជាការឡើងកម្រិតតិចតួច ដ៏ឡើងច្រើនគឺអំឡុងខែវិច្ឆិកា។
សម្ដេចតេជោបន្ដថា មួយឆ្នាំឡើង២ដង ឡើងទី១ គឺឡើងមួយចំនួនដល់ឡើងខ្លាំង គឺនៅក្នុងខែមេសា ដែលអនុវត្ដបែបនេះជារៀងរាល់ឆ្នាំ។
លោក ប៉ាវ ស៊ីណា ប្រធានសហព័ន្ធសហជីពចលនាកម្មករ បានថ្លែងវាយមត្លៃថាការតម្លើងប្រាក់ឈ្នួលដល់កម្មករសម្រាប់ឆ្នាំថ្មីនេះចំនួន៨ដុល្លារ នឹងមិនមានន័យអ្វីទេ ប្រសិនបើអាជ្ញាធរ មិនមានវិធានការណាមួយជួយទប់ស្កាត់ការតម្លើងថ្លែផ្ទះជួលស្រេចតែចិត្តដូច្នេះ។ តាមលោក ប៉ាវ ស៊ីណា ការតម្លើងថ្លៃជួលផ្ទះ១០ដុល្លារ លើសពីអ្វីដែលកម្មករទទួលបានចាប់ពីខែមករាឆ្នាំ២០២០ទៅ នឹងប៉ះពាល់ដល់ជីវភាពកម្មករយ៉ាងខ្លាំង ខណៈតម្លៃទំនិញនិងអតិផរណាផ្សេងៗ បានស្ថិតនៅជាបញ្ហាប្រឈម សម្រាប់កម្មករ វិស័យកាត់ដេរនៅឡើយ៕
