ខេត្តកណ្ដាល ៖ រថយន្តដឹកដីខ្នាតយក្ស ដែលតែតែបើកបរឆ្លងកាត់ទីនោះញឹកញាប់បានបំពានបើកលើស្ពានបាឡេដែលគេហាមឃាត់នៅ ក្នុងភូមិជ័យជំនះ ឃុំសៀមរាប ស្រុកកណ្ដាលស្ទឹង ខេត្តកណ្ដាល បណ្ដាលឲ្យបាក់ស្រុតភ្លាមៗតែម្ដង នៅរសៀលថ្ងៃទី២៦ ខែធ្នូ ឆ្នាំ២០១៩ ។
លោក វ៉ែន សុវិន ស្នងការរងខេត្តកណ្ដាលទទួលផែនចរាចរ បានប្រាប់ថា នៅចំណុចស្ពានទ្រុឌទ្រោមនេះ គេបានចាក់ដីពង្វៀងស្ពានជិតនោះដែរ ដើម្បីឲ្យឡានធំៗបើកបរចៀសវាងខ្លាចបាក់ ប៉ុន្តែតៃកុងឡានមួយនេះ មិនព្រមបើកតាមកំណត់ បែរជាមកបើកលើស្ពានចាស់ទៅវិញ ដែលជាហេតុធ្វើឲ្យស្ពានបាក់ស្រុតភ្លាមៗតែម្ដង។ លោកថា គេពុំទាន់កំណត់ច្បាស់លាស់ថា ឡានដឹកដីនេះជារបស់ក្រុមហ៊ុនណាទេ ប៉ុន្តែដំណឹងបឋម គឺជារបស់ក្រុមហ៊ុនកូរ៉េ ដែលកំពុងស្ថាបនា ផ្លូវជាតិលេខ២នេះឯង។
លោកសំណូមពរពលរដ្ឋ ដែលគ្រោងនឹងធ្វើដំណើរកាត់ម្ដុំនេះ បើសិនជាអាចសូមផ្អាក មួយរយៈសិន ឬមួយក៏ជិះវៀងផ្លូវសិនក៏បាន ព្រោះពេលនេះ ផ្លូវកំពុងកកស្ទះ ខណៈក្រុមការងារកំពុងសង្គ្រោះលើករណីនេះ។គួរជម្រាបជូនថា ផ្លូវជាតិលេខ២ តំបន់ភូមិសាស្ត្រ ស្រុកកណ្ដាលស្ទឹងនេះ សំបូរឡានដឹកដី ដឹកខ្សាច់ ដឹកថ្ម ដឹកទំនិញផ្សេងៗទៀតសំបូរប្រភេទឡានខ្នាតធំៗបើកបរមានល្បឿនលឿនៗណាស់ ហើយមិនគោរពសិទ្ធិអទិភាព ឬមានសីលធម៌ ក្នុងការបើកបរនោះឡើយ ដែលបង្កការព្រួយបារម្ភ ដល់ពលរដ្ឋអ្នកធ្វើដំណើរ ខណៈគេស្នើសុំលោក អ៊ាវ ចំរើន ស្នងការនគរបាលខេត្តកណ្ដាល គួរលៃលកចាត់ចែងហៅក្រុមបើកឡានធំៗទាំងនោះ មកអប់រំ ពិនិនិត្យទឹកនោម និងបង្រៀនច្បាប់ចរាចរដល់ពួកគាត់ផង ព្រោះតៃកុងឡានភាគច្រើន បើកបរព្រហើនណាស់អត់គិតដល់អ្នកធ្វើដំណើរតាមផ្លូផ្សេងទៀនោះទេ ៕