ភ្នំពេញ៖ នៅថ្ងៃទី២៣ ខែធ្នូ ឆ្នាំ២០១៩នេះការ សន្និធិគយបណ្តោះអាសន្ន និងមជ្ឈមណ្ឌលភស្តុភារកម្ម (Logistics Center) របស់ក្រុមហ៊ុន NIPPON EXPRESS (CAMBODIA)ត្រូវបានប្រកាសដាក់ឲ្យដំណើរការដោយលោកមេគយស្រុកខ្មែរ។
លោក គុណ ញឹម ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានឲ្យដឹងថាថា ក្នុងតំបន់សេដ្ឋកិច្ចពិសេសភ្នំពេញ មានក្រុមហ៊ុនវិនិយោគជប៉ុនចំនួន៤៣ក្រុមហ៊ុន បាន និងកំពុងដើរតួនាទី ឈានមុខគេក្នុងការផលិត និងនាំចេញ។«ក្នុងតំបន់សេដ្ឋកិច្ចពិសេសភ្នំពេញ មានវិនិយោគជប៉ុនចំនួន៤៣ក្រុមហ៊ុន បាននិងកំពុងដើរតួនាទីឈានមុខគេ ក្នុងការផលិត និងនាំចេញនូវផលិតផលអាហារ, សំលៀកបំពាក់, ស្បែកជើង, បង្គំខ្សែភ្លើង, ភាតបំណែកគ្រឿងរថយន្ត និងគ្រឿងអេឡិចត្រូនិចជាដើម -ល-»។
លោក គុណ ញឹម បានឲ្យដឹងទៀតថា ការវិនិយោគរបស់ធុរជនជប៉ុន ក្នុងតំបន់សេដ្ឋកិច្ចពិសេស បានចូលរួមចំណែកក្នុងទំហំពាណិជ្ជកម្ម រវាងជប៉ុននិងកម្ពុជា ជាង១៥៥លានដុល្លារអាមេរិក ក្នុងឆ្នាំ២០១៧ និងជាង១៨៣លានដុល្លារអាមេរិក ក្នុងឆ្នាំ២០១៨ កន្លងទៅនេះដោយមានកំណើនប្រមាណជា១៧%។
ការបើកឲ្យដំណើរការ សន្និធិគយបណ្តោះអាសន្ន និងមជ្ឈមណ្ឌលភស្តុភារកម្មនេះ គឺស្របពេលដែលរាជរដ្ឋាភិបាលកម្ពុជា, ដោយមានការគាំទ្រពីអង្គការ JICA កំពុងរៀបចំនូវផែនការមេថ្នាក់ជាតិស្តីពី ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម ដើម្បីធ្វើឲ្យប្រសើរឡើង នូវប្រព័ន្ធដឹកជញ្ជូនជាតិ និងជំរុញការតភ្ជាប់សេដ្ឋកិច្ចកម្ពុជា។
លោក គុណ ញឹមវាយតម្លៃថា សន្និធិគយបណ្តោះអាសន្ន និងមជ្ឈមណ្ឌលភស្តុភារកម្មនេះ នឹងដើរតួនាទីសំខាន់ ក្នុងការតភ្ជាប់ខ្សែច្រវ៉ាក់ផ្គត់ផ្គង់វិនិយោគ សេវាកម្ម និងពាណិជ្ជកម្ម ទាំងក្នុងក្របខណ្ឌជាតិ តំបន់ និងអន្តរជាតិ។ផែស្ងួត មជ្ឈមណ្ឌលភស្តុភារកម្មនេះ បង្កើតឡើងដោយក្រុមហ៊ុនដ៏ធំរបស់ជប៉ុន ឈ្មោះ នីបផន អេចប្រេស (ខេមបូឌា) ខូអិលធីឌី -NIPPON EXPRESS (CAMBODIA) CO., LTD. មានទីតាំងក្នុងតំបន់សេដ្ឋកិច្ចពិសេសភ្នំពេញ ស្ថិតនៅតាមបណ្តោយផ្លូវជាតិលេខ៤ ក្នុងខណ្ឌកំបូល រាជធានីភ្នំពេញ។
ពិធីសម្ពោធនេះ ធ្វើឡើងក្រោមអធិបតីក្រោមអធិបតី ឯកឧត្តម គុណ ញឹម ទទួកបន្ទុកអគ្គនាយកនៃអគ្គនាយកដ្ឋានគយ និងរដ្ឋាករ , ឯកឧត្តម មីកាមិ ម៉ាសាហ៊ីរ៉ូ (Mikami Masahiro) អគ្គរាជទូតជប៉ុន ប្រចាំកម្ពុជា ព្រមទាំងមានការអញ្ជើញចូលរួមពីថ្នាក់ដឹនាំក្រុមហ៊ុន និងអ្នកជំនួញជប៉ុននៅក្នុងព្រះរាជាណាចក្រកម្ពុជា ជាច្រើនរូប ៕
