ភ្នំពេញ៖ ក្រសួងមហាផ្ទៃ នៅថ្ងៃទី១៩ ខែធ្នូ នេះ បានចេញលិខិតមួយទូលថ្វាយ សម្តេចក្រុមព្រះ ព្រះប្រធានគណបក្សហ្វ៊ុនស៊ិនប៊ិច សម្របសម្រួលដោះស្រាយបញ្ហាផ្ទៃក្នុងបានសិនទើបឲ្យធ្វើសមាជវិសាមញ្ញ ។
យោងតាមលិខិតចុះហត្ថលេខាដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីមហាផ្ទៃ បានឲ្យដឹងថា ក្រសួងមហាផ្ទៃបានទទួលនូវលិខិតជូនដំណឹង ស្តីពីការរៀបចំធ្វើសមាជវិសាមញ្ញរបស់គណបក្សហ្វ៊ុនស៊ិនប៊ិច ដែលគ្រោងនឹងរៀបចំឡើងនៅថ្ងៃទី២៣ ខែធ្នូ ឆ្នាំ២០១៩ ខាងមុខនេះ ។
ពាក់ព័ន្ធនឹងករណីនេះ ក្រសួងមហាផ្ទៃស្នើឲ្យគណបក្សហ្វ៊ុនស៊ិនប៊ិច ពន្យារពេលនៃការរៀបចំសមាជវិសាមញ្ញរបស់គណបក្សជាបណ្តោះអាសន្នសិន រហូតដល់គណបក្សបានសម្របសម្រួលដោះស្រាយបញ្ហាផ្ទៃក្នុងរបស់គណបក្សចប់សព្វគ្រប់ជាមុនសិន ។
ទន្ទឹមនឹងនេះ ក្រសួងមហាផ្ទៃ ស្នើសុំឲ្យគណបក្សត្រូវអនុវត្តតាមប្រការ២៤ នៃលក្ខន្តិកៈរបស់គណបក្សដែលបានតម្កល់ទុកនៅក្រសួងមហាផ្ទៃ និង លិខិតលេខ១៥២៥ ចុះថ្ងៃទី១០ ខែកញ្ញា ឆ្នាំ២០១៨ របស់ក្រសួងមហាផ្ទៃ ។
សូមបញ្ជាក់ថាកាលពីរសៀលថ្ងៃទី១៧ ខែវិច្ឆិកាទ្រង់នរោត្តម ចក្រាវុឌ្ឍ ប្រធានស្តីទី គណបក្សហ្វ៊ុនស៊ិនប៉ិច បានចេញសេចក្តីសម្រេចបញ្ចប់សមាជិកភាព របស់សមាជិកបក្ស៤រូប។ សមជិកគណបក្សហ្វ៊ុនស៊ិនប៉ិច ដែលត្រូវបានបញ្ចប់សមាជិកភាពរួមមាន៖
១. លោក ពេជ្រ សូជេថ្ថា អគ្គលេខាធិការ,២. លោក រស់ សាផន ,៣. លោក ណុប សុធារិទ្ធិ អគ្គលេខាធិការរង៤. លោកស្រី កង បូរាណ នាយកខុទ្ទកាល័យសម្តេចក្រុមព្រះ នរោត្តម រណឫទ្ធិ។
បន្ទាប់ពីបញ្ចប់សមាជិកភាព មន្ត្រីទាំងបួនរូបនេះ រួមទាំងាំងមន្ត្រីមួយចំនួនទៀតបានប្រមូលផ្តុំគ្នាតវ៉ានៅមុខស្នាក់ការគណបក្សហ្វ៊ុនស៊ិនប៉ិច កាលពីព្រឹកថ្ងៃទី១៧ ខែវិច្ឆិកាដោយបានសម្តែងការមិនពេញចិត្តចំពោះការបញ្ចប់សមាជិកភាព របស់ពួកគេពីគណបក្សហ្វ៊ុនស៊ិនប៉ិច។
លោកណុប សុធារិទ្ធ អតីតអគ្គលេខាធិការរង និងជាអ្នកនាំពាក្យគណបក្សហ្វ៊ុនស៊ិនប៉ិច បានថ្លែងក្នុងសន្និសីទកាសែតនៅមុខស្នាក់ការបក្សហ្វ៊ុនស៊ិនប៉ិចកាលពីព្រឹកថ្ងៃទី១៧ វិច្ឆិកាថា “ព្រះអង្គម្ចាស់ នរោត្តម ចក្រាវុធ នៅតែប្រើអំណាចដែលខុសច្បាប់ និងខុសលក្ខន្តិកៈបក្សត្រង់ប្រការ២៤។ ខ្ញុំសោកស្តាយកាលពីព្រលប់ថ្ងៃទី១៦ វិច្ឆិកា ព្រះអង្គម្ចាស់ នរោត្តម ចក្រាវុធ ប្រធានស្ដីទីគណបក្សហ្វ៊ុនស៊ិនប៉ិច បានប្រើកងកម្លាំងមួយចំនួនឲ្យចូលមកហ៊ុព័ន្ធស្នាក់ការគណបក្សហ្វ៊ុនស៊ិនប៉ិច។
សេចក្តីសម្រេចបណ្តេញសមាជិកចេញពីបក្សនេះមិនបានបង្ហាញពីកំហុសអ្វីទេតែគេថាធ្វើចឹងបង្ហាញថា៖ហ្វុនស៊ិនប៉ិចចូលចិត្តធ្វើនយោបាយតាមវិធីដកលេខមិនមែនបូកលេខដូចគណបក្សប្រជាជនកម្ពុជារបស់សម្តេចហ៊ុនសែននោះទេ។
ប្រសិនបើគេមិនទាន់ភ្លេចតេកាលពីថ្ងៃទី២៣ ខែសីហា ឆ្នាំ២០១៨ មន្ត្រីជាន់ខ្ពស់៤រូបដែលធ្លាប់តស៊ូស្លាប់រសជាមួយសម្តេចក្រុមព្រះ៤០ឆ្នាំតាំងពីកកើតហ្វុនស៊ិនប៉ិចក៏ត្រូវបានប្រធានស្តីទីគណបក្សគឺ ទ្រង់នរោត្តម ចក្រាវុឌ្ឍ សម្រេចបណ្ដេញចេញពីគណបក្ស ដែរតាមសេចក្តីសម្រេចចុះថ្ងៃទី២៣សីហា។
ថ្នាក់ដឹកនាំជាន់ខ្ពស់ទាំង៤រូប ដែលត្រូវបានគេមើលឃើញថា ស្ម័គ្រស្មោះ និងដើរតាមសម្ដេចក្រុមព្រះ នរោត្តម រណឫទិ្ធ ក្នុងឆាកនយោបាយកម្ពុជា យូរឆ្នាំមកនោះ រួមមាន៖ លោក យូ ហុកគ្រី អតីតអនុប្រធានគណបក្ស, លោក ញ៉េប ប៊ុនជិន អតីតអនុប្រធានគណបក្ស និងជាអ្នកនាំពាក្យគណបក្ស, លោក ប៉ោ ប៊ុនស្រ៊ឺ អតីតអនុប្រធានគណបក្ស និងលោក វ៉ាន់ សុផាន់ណា អតីតអគ្គលេខាធិការរងគណបក្ស។
កាលនោះលោក ញ៉េប ប៊ុនជិន បានបញ្ជាក់ថា ការបណ្តេញចេញនេះ បានធ្វើឡើងដោយខុសច្បាប់គណបក្សទាំងស្រុង។បើតាមលោក ញ៉េប ប៊ុនជិនការបណ្តេញចេញសមាជិកអចិន្ត្រៃយ៍ណាម្នាក់ចេញពីគណបក្ស លុះត្រាតែមានការធ្វើសមាជពីគណបក្សទើបត្រូវតាមច្បាប់៕
