បាត់ដំបង ៖ ស្ពានថ្មចាស់មុខសាលាខេត្តបាត់ដំបងត្រូវបានរដ្ឋបាលខេត្តបាត់ដំបង ហាមឃាត់លែងឲ្យធ្វើដំណើរឆ្លងកាត់ បន្ទាប់ពីពិនិត្យឃើញថាស្ពាននេះមានសភាពចាស់ទ្រុឌទ្រោមនិងបែកប្រះស្រាំមិនអាចប្រើប្រាស់បាន។
សេចក្តីជូនដំណឹងរបស់រដ្ឋបាលខេត្តបាត់ដំបង បានឲ្យដឹងថា ស្ពានថ្មចាស់មុខសាលាខេត្តបាត់ដំបង ត្រូវបានសាងសង់នៅក្នុងសម័យអាណានិគមបារាំងឆ្នាំ ១៩១៦ ដែលមានអាយុកាល ១០៣ ឆ្នាំ ហើយដើម្បីថែរក្សាស្ពាននេះឲ្យបានគង់វង្សយូរអង្វែងសម្រាប់ទុកជាមរតកជូនប្រជាពលរដ្ឋក្នុងខេត្តបាត់ដំបង រដ្ឋបាលខេត្តបាត់ដំបងបានដឹកនាំមន្ត្រីជំនាញពាក់ព័ន្ធចុះពិនិត្យនិងវាយតំលៃអំពីភាពចាស់ជ្រុងរបស់ស្ថានភាពស្ពាននេះ ដោយគ្រោងធ្វើការជួសជុលថែទាំឲ្យបានល្អប្រសើរឡើងវិញ។
រដ្ឋបាលខេត្តបាត់ដំបងបន្តថា ប៉ុន្តែដោយសារអាយុកាលបេតុងនិងការប្រើប្រាស់ពុំបានត្រឹមត្រូវក្នុងសម័យសង្គ្រាម ដែលស្ពាននេះត្រូវបានរថយន្តធុនធ្ងន់និងនិងរថក្រោះបើកបរឆ្លងកាត់បានបណ្ដាលឲ្យស្ពាននេះត្រូវទទួលរងនូវការខូចខាតស្ទើរទាំងស្រុងទាំងតួស្ពាននិងសសរគ្រឺះដែលពុំអាចធ្វើការជួសជុលថែទាំវិញបាន។
ដូចនេះដើម្បីទប់ស្កាត់គ្រោះថ្នាក់ដែលអាចកើតមានឡើងជាយថាហេតុក្នុងការពុកផុយបាក់ស្រុតបានសម្រេចផ្អាកការធ្វើដំណើរឆ្លងកាត់លើស្ពានថ្មចាស់នេះចាប់ពីថ្ងៃទី១៣ ខែធ្នូ ឆ្នាំ២០១៩តទៅ៕
