រតនគិរី ៖ កម្លាំងរដ្ឋបាលព្រៃឈើថ្នាក់កណ្តាលសហការជាមួយកម្លាំងរដ្ឋបាលព្រៃឈើផ្នែកបរកែវនិងកម្លាំងអាវុធហត្ថមូលដ្ឋានស្រុកបរកែវនៅវេលាម៉ោង៨និង១០នាទីព្រឹកថ្ងៃទី១១ខែធ្នូឆ្នាំ២០១៩បានស្ទាក់ចាប់រថយន្តក្រុង១គ្រឿងលួចដឹកឈើប្រណិតធ្នង់ខណៈកំពុងធ្វើដំណើរលើកំណាត់ផ្លូវជាតិលេខ៧៨ស្ថិតក្នុងភូមិឃ្លិះឃុំស៊ើងស្រុកបរកែវខេត្តរតនគិរីមានទិសដៅទៅប្រទេសវៀតណាម។
នាយផ្នែករដ្ឋបាលព្រៃឈើបរកែវលោកហុង វណ្ណរានបានប្រាប់សារព័ត៌មាននៅព្រឹកថ្ងៃទី១១ខែធ្នូឆ្នាំ២០១៩នេះថារថយន្តក្រុងលួចដឹកឈើប្រណិតពាក់ស្លាកលេខវៀតណាម៨១B-០០១-១៣ឆែកឆេរឃើញឈើប្រណិតធ្នង់គីឡូមានទម្ងន់៧៨០គីឡូក្រាមស្មើនឹង០,៥៧៧ម៉ែត្រគូប។
លោកនាយផ្នែករដ្ឋបាលព្រៃឈើបរកែវរូបនេះបន្តថាអ្នកបើករថយន្តដឹកបទល្មើសរត់គេចខ្លួនបាត់,ពិនិត្យជាក់ស្តែងឃើញថាប្រមូលនិងដឹកជញ្ជូនព្រៃឈើខាងលើប្រាសចាកពីច្បាប់ស្តីពីព្រៃឈើ ។ បច្ចុប្បន្ន រថយន្តក្រុង១គ្រឿងនិងឈើប្រណិតធ្នង់ខាងលើត្រូវបាននាំមករក្សាទុកនៅខណ្ឌរដ្ឋបាលព្រៃឈើរតនគិរីដើម្បីចាត់ចែងតាមច្បាប់ព្រៃឈើ។
គួរកត់សម្គាល់ថាបើទោះបីសមត្ថកិច្ចជំនាញនិងស្ថាប័នពាក់ព័ន្ធខិតខំធ្វើការបង្ក្រាបការដឹកជញ្ជូនឈើយ៉ាងណាក៏ដោយនៅតែមានឈ្មួញខិលខូចលួចធ្វើសកម្មភាពដោយមិនខ្លាចច្បាប់ ។
ជាក់ស្តែងរថយន្តក្រុងវៀតណាមមានថៅកែជនជាតិវៀតណាមលួចដឹកឈើចេញពីស្រុកខ្មែរក្រោមរូបភាពដឹកភ្ញៀវទេសចរណ៍ដូច្នេះគួរតែច្បាប់ដាក់ទោសទណ្ឌឲ្យធ្ងន់ធ្ងរដើម្បីឲ្យអ្នកផ្សេងរៀងចាលតែម្តង៕
ដោយ៖ចាបសំអាន
