ក្រុងប៉ោយប៉ែត ច្រកទ្វារអន្តរជាតិដែលភ្ញៀវទេសចរណ៍អន្តរជាតិចូលមកទស្សនា ប្រាសាទអង្គរនៃប្រជាជាតិកម្ពុជាកំពុងត្រូវរងការ បំពុលបរស្ថានដោយសារធូលីដីហុយទ្រលោម បើពេលមានភ្លៀងគឺបែកផុក បង្កដោយក្រុមហ៊ុនឈ្មួញដឹកដីចាក់បំពេញទីតាំងក្រុមហ៊ុន ឬដីឯកជនរបស់អ្នកមានបុណ្យសក្តិ ឬអ្នកមានប្រាក់ដោយមិនគិតគូរអំពីការធ្វើឲ្យប៉ះពាល់ដល់សុខទុក្ខប្រជាពលរដ្ឋ និងភ្ញៀវទេសចរណ៍មានការលំបាកធ្វើដំណើរឡើយ ។
ប្រជាពលរដ្ឋដែលរស់នៅក្រុងប៉ោយប៉ែត បានសំណូមពរឲ្យអាជ្ញាធរក្រុង និងភូមិមេត្តាចាត់វិធានការលើករណីនេះផង សូមមេត្តាទប់ស្កាត់ ការដឹកដីយ៉ាងអនាធិបតេយ្យ នៅតាមផ្លូវលេខ៥ ក៏ដូចជាក្នុងក្រុង និងបញ្ហានេះក៏អាចជាបង្កឲ្យមានគ្រោះថ្នាក់ ដូចជារអិល ខណៈពេលមានភ្លៀងធ្លាក់មកម្ដងៗ។
ដោយសារតែកន្លងមកនេះ ទោះបីមានការដឹកដីយ៉ាងអនាធិបតេយ្យ បណ្ដាលឲ្យខូចខាតផ្លូវ បង្កការលំបាកដល់ពលរដ្ឋធ្វើយ៉ាងណាក្ដី ពុំដែលឃើញអាជ្ញាធរខាងណាចុះមកអន្តរាគមន៍សោះ ដូច្នេះហើយទើបពលរដ្ឋនៅក្រុងប៉ោយប៉ែត សុំស្នើទៅ លោកង៉ោ ម៉េងជ្រួន អភិបាលក្រុងប៉ោយប៉ែត មេត្តាគិតគូរចំណុចនេះផង សូមកុំសម្ងំចឺន ធ្វើមិនដឹងមិនឮបែបនេះតទៅទៀត មិនដឹងថា លោកអភិបាល មិនដឹងមែនដោយការងារមមាញឹកពេក ឬក៏ធ្វើមិនដឹងត្រង់ចំណុចនេះ? ។
ទន្ទឹមនឹងឡានដឹងដី ក៏នៅមានរថយន្តតូច-ធំ ឯកជនជាច្រើនទៀត បើកបរក្នុងល្បឿនលឿនដូចហោះ ធ្វើឲ្យធូលីដីលើផ្លូវជាតិហុយងងឹតសូន្យសុង មិនអាចមើលផ្លូវឃើញ បើឲ្យតែបែបៗនេះ នឹងមានគ្រោះថ្នាក់ចរាចរណ៍កើតឡើង ជាបន្តបន្ទាប់គ្នាចៀសមិនផុតឡើយ៕
