ក្រចេះ ៖ បុរសជាប្តីស្ត្រីរងគ្រោះម្នាក់ដែលស្លាប់កាលពីវេលាម៉ោង១៨ និង២០នាទី ថ្ងៃទី០៧ ខែធ្នូ ឆ្នាំ២០១៩ នៅភូមិក្រូច ឃុំដំរីផុង ស្រុកឆ្លូងព្រោះប្រើផលិតផលឱសថព្យាបាលជំងឺរបស់ក្រុមហ៊ុនយូ ស៊ីបានកើតទុក្ខមិនសុខចិត្ត រត់ទៅដាក់ពាក្យបណ្តឹងឲ្យសមត្ថកិច្ចជួយរកយុត្តិធម៌ ។
ស្ត្រីរងគ្រោះ មានឈ្មោះទាង ស៊ីធាង អាយុ៣៨ឆ្នាំ រីឯបុរសជាប្តីមានឈ្មោះចន ខេង ភេទប្រុស អាយុ៤០ឆ្នាំ ជនជាតិខ្មែរ ទីលំនៅក្នុងមូលដ្ឋានខាងលើ។សមត្ថកិច្ច បានឲ្យដឹងថា កាលពីចុងខែវិច្ឆិកា ឆ្នាំ២០១៩ ស្ត្រីរងគ្រោះ មានជំងឺទន់ដៃជើងម្ខាង ក៏ទិញឱសថជាផលិតផលរបស់ក្រុមហ៊ុន យូ ស៊ី ធី មានសាខានៅខេត្តក្រចេះ យកមកប្រើប្រាស់។ ពេលប្រើរួចស្ត្រីរងគ្រោះ មានអាការជំងឺរាករួសជាខ្លាំង ហើយពេលនោះ ស្ត្រីបានទំនាក់ទំនងទៅក្រុមហ៊ុន ប្រាប់អំពីអាការរបស់ស្ត្រីរងគ្រោះ តែខាងក្រុមហ៊ុន បានប្រាប់មកវិញថា ជាតិថ្នាំវាដេញជាតិពុលទេ និងប្រាប់ឱ្យប្រើបន្តទៀត។
លុះមកដល់ថ្ងៃទី០៦ ខែធ្នូ ឆ្នាំ២០១៩ ស្ថានភាពស្ត្រីរងគ្រោះ កាន់តែដុនដាបខ្លាំងទ្បើង ប្រភពបន្តថា ពេលនោះ បុរសជាប្តី បានទូរស័ព្ទសួរទៅក្រុមហ៊ុន ពេលនោះក្រុមហ៊ុន បានប្រាប់ថា ឲ្យយកទៅមន្ទីរពេទ្យព្យាបាល ពេលនាំស្ត្រីរងគ្រោះមកដល់មន្ទីរពេទ្យបង្អែកឆ្លូង ឃើញថាស្ត្រីរងគ្រោះមានសភាពធ្ងន់ធ្ងរហើយ ទើបខាងមន្ទីរពេទ្យបានបញ្ជូនបន្តទៅមន្ទីរពេទ្យកាល់ម៉ែត ជាអកុសលស្ត្រីរងគ្រោះ បានស្លាប់ នៅវេលាម៉ោង៣ទៀបភ្លឺ ឈានចូលថ្ងៃទី០៧ ខែធ្នូ ឆ្នាំ២០១៩។
សមត្ថកិច្ចបញ្ជាក់ថា ក្រោយកើតហេតុ កម្លាំងជំនាញអធិការដ្ឋានស្រុកឆ្លូង សហការជាមួយប៉ុស្តិ៍រដ្ឋបាលឃុំដំរីផុង បានចុះពិនិត្យសពស្ត្រីរងគ្រោះរួចប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ទើបស្រាវជ្រាវ ដើម្បីចាត់ការតាមនីតិវិធី ។
ជុំវិញនឹងការចោទប្រកាន់ខាងលើនេះមិនទាន់ឃើញមាន ក្រុមហ៊ុន យូ ស៊ី ធី បកស្រាយយ៉ាងណានៅឡើយទេ ៕
