ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃអាទិត្យ ទី០៨ ខែធ្នូ ឆ្នាំ២០១៩នេះ បានបង្ហោះរូបភាពលេងអុកជាមួយ ដៃគូលេងអុករបស់សម្តេច គឺនាយឧត្តមសេនីយ៍ មួង សារ៉ន កាលពី១០ឆ្នាំមុននិងបានសសេរសារប្រៀបធៀបរឿងវិន័យលេងអុកនិងរឿងនយោបាយនិងច្បាប់ផងដែរ។សម្តេចតេជោ បានរៀបរាប់យ៉ាងដូច្នេះ «ថ្ងៃអាទិត្យនេះសុំជូនរូបថតកាលពី១០ឆ្នាំមុន ពេលលេងអុកជាមួយដៃគូរដែលលេងខូច។
រូបភាពដែលកាន់ដៃគ្នានេះគឺដណ្តើមកូនគ្នាបណ្តាលមកដៃគូយកសេះ មកអុកបំបែកទូកខ្ញុំដោយមិនបានមើលឱ្យច្បាស់និងចំជើងត្រីបក ខ្ញុំក៏ប្រញ៉ាប់សុី តាមវិន័យកាន់មួយណាយកមួយហ្នឹងតែដៃគូមកដណ្តើមយកទៅវិញ។ ជាមួយខ្ញុំត្រូវតែស៊ីសេះយកដាក់ក្នុងកំប៉ុងដោយមិនយល់ព្រមឱយវិធាន នៃការលេងនេះត្រូវបានបំពាននោះឡើយ»។
សម្តេចបានលើកឡើងថា សម្តេចមិនបណ្តោយឱ្យអ្នកនយោបាយណា ឬក្រុមណាលេងខុសពីច្បាប់បានចែងនោះឡើយ។ ពោលអ្នកនយោបាយធ្វើខុសច្បាប់ ត្រូវតែអនុវត្តន៍ច្បាប់។«ការធ្វើនយោបាយមិនខុសពីការលេងអុកនោះទេ ខ្ញុំមិនបណ្តោយឱ្យអ្នកណាឬក្រុមណាលេងខុសពីច្បាប់បានចែងនោះឡើយ។ កូនអុកសុីដាក់ចូលកំប៉ុងអ្នកនយោបាយអនុវត្តន៍តាមច្បាប់»។
នាពេលកន្លងទៅអ្នកនយោបាយដែលមានទោសទាំងលោក កឹម សុខា និងលោក សម រង្ស៉ី សុទ្ធតែហាក់បង្ហាញសុទិដ្ឋិនិយមខ្ពស់ទៅលើការអន្តរាគមន៍ ឬការដាក់សម្ពាធពីឆាកអន្តរជាតិ ដើម្បីឱ្យពួកគេបានរួចផុតពីទោសទណ្ឌទាំងឡាយ។តែសម្តេចតេជោ ហ៊ុន សែន ក៏ធ្លាប់បានចេញមកអះអាងជារឿយៗផងដែរ នឹងគ្មានសម្ពាធ ឬការអន្តរាគមន៍ណាមួយមានអនុភាពទៅលើការអនុវត្តន៍ច្បាប់របស់កម្ពុជានោះឡើយ។
ជួនគ្នានិងសាររបស់សម្តេចនាយករដ្ឋមន្ត្រីនៅថ្ងៃទី ០៩ ធ្នូ តុលាការសាលាឧទ្ធរណ៍នឹងធ្វើការពិភាក្សាដេញដោលគ្នា លើបណ្តឹងប្រឆាំងនឹងការបញ្ជូនសំណុំរឿងរបស់លោក កឹម សុខា ទៅជំនុំជម្រះ។ ការសួរដេញដោលគ្នានេះ នឹងធ្វើឡើងដោយក្រុមប្រឹក្សាជំនុំជម្រះ៣រូបនៃសភាស៊ើបសួររបស់តុលាការសាលាឧទ្ធរណ៍ ជាមួយនឹងក្រុមមេធាវីការពារក្តីឲ្យលោក កឹម សុខា ចំនួន៤រូប។
នេះបើយោងតាមលិខិតរបស់តុលាការសាលាឧទ្ធរណ៍ដែលអញ្ជើញមេធាវីការពារក្តីលោក កឹម សុខា កាលពីថ្ងៃទី ០៥ ធ្នូ ពោលគឺនៅពីរថ្ងៃប៉ុណ្ណោះ ក្រោមពីក្រុមមេធាវីការពារក្តីបានដាក់ពាក្យប្តឹងឧទ្ធរណ៍នេះ កាលពីថ្ងៃទី ០៣ ធ្នូ។
គួររំលឹកជូនថា តុលាការក្រុងភ្នំពេញ កាលពីថ្ងៃទី ០២ ធ្នូ បានចេញសេចក្តីប្រកាសព័ត៌មានពីការបញ្ជូនសំណុំរឿងព្រហ្មទណ្ឌរបស់លោក កឹម សុខា អតីតប្រធានគណបក្សសង្គ្រោះជាតិទៅជំនុំជម្រះ តាមដីកាបញ្ជូនទៅជំនុំជម្រះ ចុះថ្ងៃទី ០២ ធ្នូ។ មួយថ្ងៃក្រោយមក ពោលគឺនៅថ្ងៃទី ០៣ ធ្នូ ក្រុមមេធាវីការពារក្តីលោក កឹម សុខា បានដាក់ពាក្យប្តឹងឧទ្ធរណ៍ ប្រឆាំងនឹងដីកាបញ្ជូនលោក កឹម សុខា ទៅជំនុំជម្រះ ដោយអះអាងថា កូនក្តីរបស់ខ្លួន គឺលោក កឹម សុខា កើតទុក្ខមិនសុខចិត្តឡើយ ចំពោះដីកាបញ្ជូនរឿងឲ្យទៅជំនុំជម្រះនេះ។
លោក ចាន់ ចេន មេធាវីការពារក្តីម្នាក់ក្នុងចំណោម៤នាក់បានអះអាងប្រាប់កាសែតថា ទោះបីជាលទ្ធផលយ៉ាងណាក៏ដោយ ក៏ប៉ុន្តែវាគឺជាការសម្តែងឆន្ទៈរបស់កូនក្តីនិងសហមេធាវីការពារសិទ្ធិលោក កឹម សុខា ក្នុងការតស៊ូលើសមរភូមិច្បាប់នេះ។ លោកមេធាវីក៏បានអំពាវនាវឲ្យអ្នកនយោបាយខ្មែរ ងាកមកស្វែងរកដំណោះស្រាយវិញ ដោយចាប់ផ្តើមរួមគ្នាដោះស្រាយនូវបញ្ហាណា ដែលបះពាល់ដល់ប្រទេសជាតិនិងប្រជាពលរដ្ឋខ្មែរជាអាទិភាព ដើម្បីមានឱកាសឈានទៅកសាងអនាគតយូរអង្វែងសម្រាប់អ្នកជំនាន់ក្រោយ។
ឯលោកមេធាវី សុក សំអឿន អ្នកជំនាញផ្នែកច្បាប់វិញ បានវាយតម្លៃថា នីតិវិធីរបស់កម្ពុជាហាក់មានភាពស្មុគស្មាញ ដោយថា ជាធម្មតាកាលណាចៅក្រមចេញដំណោះស្រាយហើយ ការសម្រេចស្ថិតនៅលើចៅក្រមជម្រះ។ ប៉ុន្តែ ច្បាប់ក៏បើកចំហរឲ្យភាគីម្ខាងទៀត សុំទៅសភាស៊ើបសួរ ជំទាស់លើដំណោះស្រាយរបស់ចៅក្រមស៊ើបសួរដែរ។ មេធាវីរូបនេះ ពន្យល់ទៀតថា ការប្តឹងជំទាស់នេះ ទំនងជាការសាកល្បងរបស់សហមេធាវីរបស់លោក កឹម សុខា ប៉ុន្តែ លោកថា ការតតាំងក្តីនេះ ពិបាកនឹងទទួលបានជោគជ័យ ៖ «ដោយសាររឿងហ្នឹងជារឿងនយោបាយ មិនមែនជារឿងច្បាប់ ម្ល៉ោះហើយយើងស្មានអត់ត្រូវទេ»។
សូមបញ្ជាក់ថាលោក កឹម សុខា ត្រូវបានសមត្ថកិច្ចឆ្មក់ចូលចាប់ខ្លួនទាំងយប់កាលពីថ្ងៃទី២ ខែកញ្ញា ឆ្នាំ២១៧ក្រោមការ ចោទថា ឃុបឃិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាលរបស់លោក ហ៊ុន សែន។ លោក កឹម សុខា ត្រូវបានបញ្ជូនទៅ ។ បទចោទនេះ លោក កឹម សុខា ត្រូវបានតុលាការបង្គាប់ឲ្យឃុំខ្លួនសរ៉ុបជាង២ឆ្នាំ ទាំងឃុំខ្លួនបណ្តោះអាសន្ននៅពន្ធនាគារត្រពាំងផ្លុង ជាប់ព្រំដែនវៀតណាម ស្ថិតក្នុងខេត្តត្បូងឃ្មុំក្នុងពន្ធនាគារ និងនៅក្នុងផ្ទះ។
ទើបតែថ្ងៃ១០ ខែវិច្ឆិកា ទើបសាលាដំបូងរាជធានីភ្នំពេញ សម្រេចបន្ធូរបន្ថយលក្ខខណ្ឌខ្លះបើកឱ្យលោក កឹម សុខា អាចជួបមន្ត្រីការទូតនានា និងអាចធ្វើដំណើរនៅទូទាំងប្រទេសបាន លើកលែងតែចេញទៅក្រៅប្រទេស និងធ្វើសកម្មភាពនយោបាយ។
លោក កឹម សុខា ត្រូវបានតុលាការក្រុងភ្នំពេញចោទប្រកាន់ពីបទត្រូវរ៉ូវគ្នាជាមួយបរទេសឬ «សន្ទិដ្ឋិភាពជាមួយបរទេស» ដើម្បីផ្តួលរំលំរដ្ឋាភិបាលកម្ពុជា តាមមាត្រា ៤៤៣ នៃក្រមព្រហ្មទណ្ឌកម្ពុជា៕
