ភ្នំពេញ ៖ នៅថ្ងៃទី១២ ខែធ្នូ ឆ្នាំ២០១៩ខាងមុខ គឺជាថ្ងៃឧសានុវាទ ដែលសហភាពអឺរ៉ុប(EU) បានទុកឱកាសឲ្យកម្ពុជា បញ្ចេញប្រតិកម្មតប មុននឹង EU សម្រេចផ្អាកប្រព័ន្ធអនុគ្រោះពន្ធ គ្រប់ប្រភេទ(EBA) ជាបណ្តោះអាសន្នពីកម្ពុជានៅខែកុម្ភៈខាងមុខនេះ។នេះបើតាម សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
គណៈកម្មការអឺរ៉ុប (EU) បានទុកពេលឲ្យកម្ពុជា១ខែ ដើម្បីបញ្ចេញប្រតិកម្មតប ចំពោះរបាយការណ៍បឋម ស្តីពីការផ្អាក EBA បណ្តោះអាសន្ន នៅថ្ងៃទី១២ ខែវិច្ឆិកា ឆ្នាំ២០១៩ កន្លងទៅនេះ។ ឆ្លើយតបទៅក្រុមអ្នកសារព័ត៌មាន ក្រោយបញ្ចប់សិក្ខាសាលាជាតិ ស្ដីពីការរៀបចំផែនការសកម្មភាព និងថវិកាឆ្នាំ២០២០ នៅថ្ងៃទី៥ ខែធ្នូ ឆ្នាំ២០១៩ សម្តេច ស ខេង បានថ្លែងថា “យើងនឹងឆ្លើយ ប៉ុន្តែតាមពេលវេលា ដូចជា យ៉ាងយូរថ្ងៃ១២ ធ្នូ “។
គេហទំព័រ របស់គណៈកម្មការអឺរ៉ុប បានឲ្យដឹងថា “អនុលោមតាមវិធាន មានចែងក្នុងបទប្បញ្ញត្តិ ស្តីពីគម្រោងអនុគ្រោះពន្ធទូទៅ របស់សហភាពអឺរ៉ុបបច្ចុប្បន្នកម្ពុជា មានរយៈពេល១ខែ ដើម្បីប្រតិកម្ម ចំពោះរបាយការណ៍បឋមនេះ ។ បន្ទាប់មកគណៈកម្មការ នឹងបញ្ចប់របាយការណ៍ និងធ្វើការសំរេចចិត្តនៅខែកុម្ភៈ ឆ្នាំ២០២០ ស្តីពីថាតើ ត្រូវដកការអនុគ្រោះពន្ធរបស់កម្ពុជា ជាបណ្តោះអាសន្ន ឬយ៉ាងណា?” ។
គោលបំណងនៃនីតិវិធី ដើម្បីដោះស្រាយបញ្ហាសិទ្ធិមនុស្ស(សំដៅទៅលើការដោះលែងលោកកឹមសុខានិងការបើកឲ្យគណបក្សសង្គ្រោះជាតិមានជីវិតឡើងវិញ) និងសិទ្ធិការងារនៅកម្ពុជា ស្របពេលសហភាពអឺរ៉ុប នៅតែប្តេជ្ញាធ្វើការជាមួយ អាជ្ញាធរកម្ពុជាកែលម្អពិតប្រាកដ និងគួរឲ្យទុកចិត្តលើបញ្ហា ដែលត្រូវព្រួយបារម្ភ គឺការចាំបាច់ចៀសវាងការដក EBA ។
