ភ្នំពេញ៖ លោក ពេជ្រ អង្គមេធាវីតំណាងឲ្យភរិយាលោក គង់ ប៊ុនឈឿន បានប្រកាសព្រមានចាត់ការតាមផ្លូវច្បាប់លើតារាចម្រៀង អ្នកនិពន្ធ ឬបុគ្គលណាដែលបានលួចចម្លងស្នាដៃមរតកដើមរបស់ កវី គង់ ប៊ុនឈឿន ទៅកែច្នៃក្រឡៃសាច់ភ្លេងឲ្យខុសពីទំនុកបទដើម ឬខូចលំនាំនៃបទចម្រៀង។
តាមលោកពេជ្រអង្គឲ្យដឹងថាការព្រមាននេះដោយសារសង្កេតឃើញតារាចម្រៀង និងអ្នកនិពន្ធខ្មែរបច្ចុប្បន្នបាននឹងកំពុងតែនាំគ្នាជ្រួលជ្រើមលួចចម្លង (Cover) បទចម្រៀងមរតកដើមដែលជាស្នាដៃរបស់កវីស្ទឹងសង្កែលោក គង់ ប៊ុនឈឿន ទៅក្រឡៃទំនុកច្រៀងនិងសាច់ភ្លេងយកទៅរកស៊ីតាម បណ្ដាញសង្គមយូធូប ឬតាមប្រពន្ធផ្សព្វផ្សាយជាសាធារណៈផ្សេងៗដែលជាទង្វើរំលោភលើសិទ្ធិបទចម្រៀងដែលស្ថិតនៅក្រោមការគ្រប់គ្រងរបស់ភរិយា លោក គង់ ប៊ុនឈឿន គឺលោកស្រី គាត គឹមលន ។
មេធាវីតំណាងភរិយាលោក គង់ ប៊ុនឈឿន ចាត់ទុកទង្វើនេះគឺជាការរំលោភដ៏ធ្ងន់ធ្ងរលើច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែលឆ្នាំ២០០៣ និងជាពិសេសលើសិទ្ធិបេតិកភណ្ឌ និងឬសិទ្ធិសីលធម៌របស់លោកស្រី គាត គឹមលន ដែលធ្វើឲ្យលោកស្រីមានការឈឺចាប់។លោក ពេជ្រ អង្គ បានប្រកាស ស្នើឲ្យអ្នកដែលបានរំលោភលើសិទ្ធិទាំងនេះបញ្ឈប់និងដកហូតបទចម្រៀងនិងបទភ្លេងទាំងនេះចេញពីប្រព័ន្ធចែកចាយនិងទីតាំងធ្វើអាជីវកម្មនានាជាបន្ទាន់។ក្នុងករណីបន្តលោក និងពិចារណាចាត់វិធានការតាមផ្លូវច្បាប់។
តែចំពោះអ្នកដែលមានបំណងទទួលសិទ្ធិក្នុងការធ្វើអាជីវកម្ម ការផលិតឡើងវិញ ក្នុងទម្រង់បែបណាមួយលើស្នាដៃទាំងនេះលោកស្រី គាត គឹមលន រីករាយនិងពិភាក្សាអំពីការផ្តល់សិទ្ធិធ្វើអាជីវកម្មតាមរយៈលោកមេធាវី ពេជ្រ អង្គ ឬអង្គភាពគ្រប់គ្រងសិទ្ធិរួមដូរ្យតន្ត្រីកម្ពុជាដែលនឹងចេញជារូបរៀងផ្លូវការនាពេលឆាប់ៗខាងមុខ។ សូមបញ្ជាក់ថារដ្ឋមន្ត្រីក្រសួងវប្បធម៍និងវិចិត្រសិល្បៈបានប្រគល់សិទ្ធិជូនលោកស្រី គាត គឹមលន គ្រប់គ្រងលើបទចម្រៀងចំនួនសរុប៥៥បទ ដែលជាការទទួលមរតកបន្តពីលោកកវី គង់ ប៊ុនឈឿន៕
