កណ្តាល៖ លោក ហួត ហ៊ាង ចៅក្រមស៊ើបសួរសាលាដំបូង ខេត្តកណ្តាល សម្រេចឃុំខ្លួនជនបង្កដែលបើករថយន្តបំបុក លោកអនុសេនីយ៍ឯក ទូច សៅហេង មន្ត្រីនគរបាលចរាចរណ៍កំពុងបញ្ជាចរាចរណ៍ការពារ ក្បួនថ្នាក់ដឹកនាំឆ្លងកាត់ បណ្តាលអោយរងរបួសធ្ងន់ធ្ងរ ដាក់ពន្ធនាគារបណ្តោះអាសន្នហើយ នៅល្ងាចថ្ងៃទី២៩ ខែវិច្ឆិកា នេះ ។
ប្រភពពីនគរបាលខេត្តកណ្តាលឲ្យដឹងថា៖អ្នកបើកបររថយន្តបុកមន្ដ្រីនគរបាលចរាចរណ៍នឈ្មោះ សំណាន សំណាង អាយុ៣៣ឆ្នាំ មានទីលំនៅស្រុកស្អាង ខេត្តកណ្តាល ត្រូវបានបងស្រីនាំខ្លួនយកមកប្រគល់ឲ្យសមត្ថកិច្ច នៅស្នងការដ្ឋាននគរបាលខេត្តកណ្ដាល ដើម្បីអនុវត្តតាមផ្លូវច្បាប់កាលពីវេលាម៉ោង៩នឹង៣០នាទីព្រឹកថ្ងៃទី២៩ ខែវិច្ឆិកា ឆ្នាំ២០១៩នេះ ដើម្បីទទួលទោសតាមផ្លូវច្បាប់ ក្រោយបើករថយន្ដបុកមន្ដ្រីនគរបាលម្នាក់បណ្ដាលឲ្យរងរបួស។
លោក អនុសេនីយ៍ឯក ទូច សៅហេង ជនរងគ្រោះក្នុងពេលបំពេញភារកិច្ចរហូតរបួសបាក់ជើងទាំងសងខាង បាក់ឆ្អឹងចង្កេះ និងស្រាំលលាដ៍ កកឈាមក្នុងខួរក្បាលទទួលបាន ការអញ្ជើញមកសាកសួរសុខទុក្ខ ដោយផ្ទាល់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅបន្ទប់សំរាកព្យាបាល នៅមន្ទីរពេទ្យកាល់ម៉ែត ក្នុងគ្រាដែលសម្តេច កំពុងបំពេញកាតព្វកិច្ចដ៏កតញ្ញូបំផុត គឺមើលថែទាំអ្នកម្តាយ នៅមន្ទីរពេទ្យកាល់ម៉ែតនេះស្រាប់ “។
សូមរំលឹកថា កាលពីវេលាម៉ោង២០និង១០នាទីថ្ងៃទី២៨ ខែវិច្ឆិកា ឆ្នាំ២០១៩ ត្រង់ចំណុចភ្លើងស្តុបស្ពានព្រែកហូរ ស្ថិតក្នុងសង្កាត់ព្រែកហូរ ក្រុងតាខ្មៅ ខេត្តកណ្តាល រថយន្តតាកូម៉ាមួយគ្រឿងបើកបរ ដោយជនមិនស្គាល់អត្តសញ្ញាណបានបើកបំបុក មន្ត្រីនគរបាលចរាចរណ៍ខេត្តកណ្តាលម្នាក់ កំពុងឈរបញ្ជាចរាចរណ៍លើដងផ្លូវ បណ្តាលឲ្យរងរបួសបាក់ជើងទាំងសងខាង និងបាក់ឆ្អឹងកង្កេះ ស្រាំលលាដ៏ កកឈាមក្នុងខួរក្បាលយ៉ាងធ្ងន់ធ្ងរ។ ក្រោយមានហេតុការណ៍កើតឡើង ជនបង្កបានព្យាយាមបើករថយន្តយកទៅប្លុងចោលរួចគេចខ្លួនបាត់។មន្ត្រីនគរបាលចរាចរណ៍ដែលត្រូវរថយន្តបើកបុកពេលបំពេញការងារនោះឈ្មោះ ទូច សៅហេង មានតួនាទីជា នាយរងផ្នែក មានឋានន្តរស័ក្តិថ្នាក់អនុសេនីយ៍ឯក។
ចំណែកឯរថយន្តបង្កម៉ាកតូយូតា តាកូម៉ា ពណ៌ខ្មៅ ពាក់ផ្លាកលេខភ្នំពេញ2S-3669 បើកបរដោយជនមិនស្គាល់អត្តសញ្ញាណ ព្រោះរត់គេចខ្លួន។
លោក ឆេង សំអឿន នាយការិយាល័យចរាចរណ៍ជើងគោក បានឲ្យដឹងថា លោកទូក សៅហេង និងមន្ត្រីនគរបាលចរាចរណ៍៥រូបទៀត ត្រូវបានចាត់ឲ្យឈរជើងនៅគោលដៅស្តុបស្ពានព្រែកហូរ លើកំណាត់ផ្លូវជាតិលេខ២ ដើម្បី សម្រួលចរាចរណ៍នៅទីនោះ។
