ភ្នំពេញ៖ លោកគន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃ ទី២៨ ខែវិច្ឆិកា ឆ្នាំ២០១៩បាន ចុះផ្ទាល់ដើម្បីស្វែងយល់ពីតម្រូវការចាំបាច់របស់លោកគ្រូ អ្នកគ្រូ និងសិស្សានុសិស្ស នៅសាលាបឋមសិក្សាអូរជុញ ក្នុងភូមិសែនរុងរឿង១ ឃុំទឹកក្រហម ស្រុកជាំក្សាន្ដ ខេត្តព្រះវិហារនិងសាងសង់អគារសិក្សាជាបន្ទាន់ជូនពួកគេ។
វត្តមានលោកគន់គីមបានកើតឡើង ក្រោយពីមានព័ត៌មាន និងរូបភាពសិស្សានុសិស្សមួយក្រុម នៃសាលាបឋមសិក្សាអូរជុញក្រាល កំរាលតង់រៀនក្រោមដើមឈើ ក៏ដោយសារពួកគេខ្វះបន្ទប់សិក្សា ហើយ ត្រូវបានគេបង្ហោះ និងចែករំលែកនៅតាមបណ្ដាញសង្គម Facebookដែលក្រោយមកគេដឹងថាជាស្នាដៃគ្រូបង្ហៀន។
លោក ទេសរដ្ឋមន្ដ្រី គន់ គីម បានបញ្ជាក់ប្រាប់កាសែតថា «សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត បានប្រើឲ្យខ្ញុំទៅមើលសាលាហ្នឹង ដើម្បីស្ដាប់ពីសេចក្ដីរាយការណ៍របស់លោកគ្រូ អ្នកគ្រូ សិស្សានុសិស្ស ត្រូវការប៉ុន្មាន។ គាត់ឲ្យសាងសង់អគារជូនពួកគេជាបន្ទាន់ ហើយពេលនេះ ខ្ញុំកំពុងធ្វើដំណើរទៅកន្លែងគោលដៅហ្នឹង»។
អភិបាលស្រុកជាំក្សាន្ដ លោក ជា គឹមសេង ទទួលស្គាល់ថា សាលាបឋមសិក្សាអូរជុញ ពិតជាខ្វះអគារសិក្សាប្រាកដមែន ដោយបច្ចុប្បន្នមានតែអគារឈើ ៥បន្ទប់ និងសិស្សានុសិស្សជាង៤០០នាក់។អាជ្ញាធរ និងក្រុមការងារបានទៅជួបផ្ទាល់ជាមួយលោកគ្រូ អ្នកគ្រូ សិស្សានុសិស្សនៅទីនោះ ដើម្បីស្ដាប់ពីតម្រូវការជាក់ស្ដែងផងដែរ។
