ខេត្តព្រះសីហនុ៖ លោក ជា សុផារ៉ាឧបនាយករដ្ឋមន្ត្រី និងជា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់នៅព្រឹកថ្ងៃទី២៨ ខែវិច្ឆិកា ឆ្នាំ២០១៩ បានដឹកនាំមន្ត្រីស្ថាប័នពាក់ព័ន្ធបន្តចុះពិនិត្យការដ្ឋានស្ថាបនាផ្លូវ ដែលស្ថិតក្នុងគម្រោង ផ្លូវត្រូវស្ថាបនាចំនួន៣៤ខ្សែ ក្នុងមូលដ្ឋានក្រុងព្រះសីហនុ។
ការចុះពិនិត្យផ្លូវទាំងនោះរួមមាន៖ ផ្លូវក្រវ៉ាត់ក្រុង ចេញពីព្រលានយន្តហោះអន្តរជាតិខេត្តព្រះសីហនុ ស្ថិតក្នុងឃុំរាម ស្រុកព្រៃនប់ ឆ្ពោះទៅកាន់ឆ្នេររាម។ពិនិត្យការស្ថាបនាផ្លូវ ភ្នំជំទាវម៉ៅ ចូលមកក្រុងព្រះសីហនុថែមទៀតផង។អមដំណើរលោក ជា សុផារ៉ា នាឱកាសចុះពិនិត្យការស្ថាបនាផ្លូវនោះគេឃើញវត្តមាន , លោក គួច ចំរើន អភិបាលខេត្តព្រះសីហនុ និងមន្ត្រីមន្ទីរជំនាញមួយចំនួនទៀត ផងដែរ។
លោក ជា សុផារ៉ា បានណែនាំដល់មន្ត្រីជំនាញ ស្ថាបនាផ្លូវក្រវាត់ ក្រុង និងផ្លូវក្នុងក្រុងព្រះសីហនុ ត្រូវតែមានបរិមាណ គុណភាពធានាការប្រើប្រាស់បានយូរ ព្រោះការស្ថាបនាផ្លូវទាំង៣៤ខ្សែនេះ ត្រូវប្រើពេល៨ខែ។ ដូច្នេះការស្ថាបនាផ្លូវនេះត្រូវបាន បង្កើនសោភណភាព បរិស្ថានល្អ ដើម្បីជាការទាក់ទាញអ្នកវិនិយោគទុន ក៏ដូចជាអ្នកទេសចរ ជាតិ-អន្តរជាតិ មកកាន់ខេត្តមាត់សមុទ្រកាន់តែច្រើនឡើង នាពេលខាងមុខ។
សូមរម្លឹកថា ការស្ថាបនាផ្លូវ ៣៤ខ្សែនោះ មានក្រុមហ៊ុន និងកងវិស្វកម្មចំនួន៨ គឺ ១.ក្រុមហ៊ុន រ៉ូយ៉ាល់មេគង្គ ខនស្ត្រាក់សិន & ឌីវេឡុបមិន, ២.កងវិស្វកម្មសម្តេចតេជោ ហ៊ុន សែន សៀមរាប, ៣.ក្រុមហ៊ុន ហេងសម្បត្តិ, ៤.កងវិស្វកម្មលេខ ១៧៨ ស្ពាន ថ្នល់ , ៥.ក្រុមហ៊ុន SCE, ៦.ក្រុមហ៊ុន VT Engineering & Construction, ៧. ក្រុមហ៊ុន សាជីវកម្មពិស្ណុការ អន្តរជាតិ , ៨. ក្រុមហ៊ុន K.B.H Construction Co Ltd៕
