បន្ទាយមានជ័យ៖ ម្ចាស់មន្ទីរសំរាកព្យាបាលមួយកន្លែងស្ថិតក្នុងភូមិភូមិបាលិលេយ្យ១សង្កាត់និងក្រុងប៉ោយប៉ែតខេត្តបន្ទាយមានជ័យ កំពុងរងការប្តឹងពីគ្រួសារសព ដ;ម្បីស្វែងរកយុត្តិធម៌ ។ មន្ទីរសំរាកព្យាបាលខាងលើយីហោ(សុខាប៉ោយប៉ែត)គ្រប់គ្រងដោយលោកវិជ្ជ បណ្ឌិត វ៉ាន់ ចេស ។
ស្ត្រីរងគ្រោះមានឈ្មោះទេព ចិន្តា អាយុ៤០ឆ្នាំ មុខរបរជាកម្មការនីរោងចក្រនៅបំតន់ឧស្សាហកម្មអូរនាង។ មានលំនៅដ្ឋានភូមិព្រៃព្រិចសង្កាត់និងក្រុងប៉ោយប៉ែតខេត្តបន្ទាយមានជ័យ បានស្លាប់នៅមន្ទីរពេទ្យបង្អែកដីថ្មីកាលពីម៉ោង២៣និង១០នាទី ថ្ងៃទី២០ខែវិច្ចិកា២០១៩បន្ទាប់ពីមន្ទីរព្យាបាលខាងលើចាក់ថ្នាំឲ្យរួចហើយបញ្ជូនចេញ។
កញ្ញា ខេន ផាន់ណារស្មី អាយុ១៩ឆ្នាំត្រូវជាកូនបង្កើតនៃសព បានអោយដឹងថាម្តាយរបស់នាង មានជម្ងឺរលាកច្រមុះ។ជារៀងរាល់ថ្ងៃគាត់ទៅធ្វើការនៅរោងចក្រជាធម្មតាទេ។ មុនពេលទៅសំរាកព្យាបាលនៅមន្ទីរសំរាកព្យាបាលសុខា ប៉ោយប៉ែតម្តាយនាង បានកោសខ្យល់ ព្រោះគាត់មានអាការៈអស់កម្លាំង ។
កញ្ញា ខេនផាន់ណារស្មី បន្តថា ម្តាយនាងបានជិះម៉ូតូទៅពេទ្យខាងលើកាលពីម៉ោង១២ថ្ងៃត្រង់ថ្ងៃទី២០វិច្ឆិកាលុះដល់ម៉ោង២២និង២៥នាទីម្ចាស់មន្ទីរសំរាកព្យាបាលសុខា ប៉ោយប៉ែត បានដឹកម្តាយនាងទៅកាន់ពេទ្យបង្អែកដីថ្មីវិញដើម្បីគេចវេសពីការទទួលខុសត្រូវ ។ពេលទៅដល់ពេទ្យដីថ្មីនោះ អាការៈម្តាយនាងពិតជាធ្ងន់ធ្ងរណាស់ទៅហើយជាហេតុធ្វើអោយម្តាយនាងដាច់ខ្យល់ស្លាប់តែម្តង ។ កញ្ញាថា៖ពេលនាងទៅរកម្តាយនាងបានឃើញសេរ៉ូមចំនួន០៣កំប្លោកដែលលោកគ្រូពេទ្យបានដាក់បញ្ចូលអោយម្តាយនិងមានការចាក់ថ្នាំតាមខ្សែសេរ៉ូមផងដែរ ។
លោក ធឿន ស្រស់ អាយុ៤០ឆ្នាំត្រូវជាប្តី ស្ត្រីរងគ្រោះបានអោយដឹងដែរថា ប្រពន្ធរបស់គាត់ពិតជាបានស្លាប់ដោយសារពេទ្យចាក់ថ្នាំខុសបច្ចេកទេសយ៉ាងពិតប្រាកដ ព្រោះមុនពេលទៅពេទ្យ ប្រពន្ធរបស់គាត់ដើរលេងពេញភូមិ ហាក់មិនមានអ្វីគួរអោយព្រួយបារម្ភទេ។ ប្តីសពថា គាត់នឹងប្តឹងម្ចាស់មន្ទីរសំរាកព្យាបាលនោះទៅសមត្ថកិច្ចដើម្បីស្វែងរកយុត្តិធម៌ជូនសពប្រពន្ធអោយខានតែបាន ។
ពាក់ពន្ធ័និងករណីប្តីសពស្ត្រីរងគ្រោះចោទប្រកាន់ជុំវិញការស្លាប់ អ្នកជំងឺឈ្មោះ ទេព ចិន្តានោះ លោកវិជ្ជ បណ្ឌិត វ៉ាន់ចេស ម្ចាស់មន្ទីរសំរាកព្យាបាលសុខាប៉ោយប៉ែត បានអោយដឹងថា ពិតជាមានអ្នកជំងឺ ឈ្មោះទេពចិន្តា មកសំរាកព្យាបាលនៅគ្លីនិករបស់លោកមែន។ លោកគ្រូពេទ្យដដែលថាតាមការសន្និដ្ឋានបឋម អ្នកជំងឺមានបញ្ហាខួរក្បាលធ្ងន់ធ្ងរ ហើយសំរាកព្យាបាលបានតែមួយភ្លេតក៏បញ្ជូនចេញវិញ ដោយនិយាយបែបស្ទាក់ស្ទើហើយក៏បិទទូរសព្ទ័តែម្តង ។
លោក កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យ បានឲ្យដឹងនៅថ្ងៃទី២១វិច្ឆិកា២០១៩នេះថា មន្ទីរសំរាកព្យាបាលសុខាប៉ោយប៉ែតហ្នឹងដូចជាមិនធ្លាប់ឮឈ្មោះនោះទេ?។ លោកថា ពាក់ព័ន្ធនិងលិខិតអនុញ្ញាតអាជីវកម្ម មានតែច្រកចេញចូលតែមួយក្រុងប៉ោយប៉ែតទេដែលមានសិទ្ធិ អនុញ្ញាតច្បាប់អាជីវកម្មនោះ។ ចំណែកលោកមិនមានសិទ្ធិដូចមុនទៀតឡើយ៕
