ភ្នំពេញ៖ លោកអភិបាលរាជធានីភ្នំពេញបានស្នើរសុំឯកអគ្គរាជទូតវិសាមញ្ញនិងពេញសមត្ថភាពជប៉ុនប្រចាំព្រះរាជាណាចក្រកម្ពុជានាំអ្នកវិនិយោគជប៉ុនមកវិនិយោគនៅកម្ពុជាបន្ថែមទៀតដើម្បីជំរុញប្រទេសកម្ពុជាមានការអភិវឌ្ឍរីកចំរើនមួយកម្រិតថែមទៀត។
ជាការឆ្លើយតបលោកមិកាមិម៉ាស្សាហិរូ(H.E.Mr.MIKAMIMasahiro)ឯកអគ្គរដ្ឋទូតវិសាមញ្ញនិងពេញសមត្ថភាពជប៉ុនប្រចាំព្រះរាជាណាចក្រកម្ពុជាលោកក៏នឹងជួយជំរុញឱ្យមានអ្នកវិនិយោគជប៉ុនមកធ្វើការវិនិយោគលើបញ្ហាការគ្រប់គ្រងនិងប្រមូលសំរាមក្នុងរាជធានីភ្នំពេញនេះផងដែរ។
កាលពីរសៀល ថ្ងៃទី២០ខែវិចិ្ឆកាឆ្នាំ២០១៩លោកឃួង ស្រេង អភិបាលរាជធានីភ្នំពេញនិង លោកមិកាមិម៉ាស្សាហិរូ(H.E.Mr.MIKAMIMasahiro)ឯកអគ្គរដ្ឋទូតវិសាមញ្ញនិងពេញសមត្ថភាពជប៉ុនប្រចាំព្រះរាជាណាចក្រកម្ពុជានៅសាលារាជធានីភ្នំពេញបានជួបពីភាកក្សាគ្នាដើម្បីស្វែងយល់អំពីការគ្រប់គ្រងសំណល់នៅក្នុងរាជធានីភ្នំពេញការទាញយកថាមពលពីសំណល់(Waste Energy) ។
លោកអភិបាលរាជធានីបានជម្រាបទូតថាទន្ទឹមនឹងការរីកចំរើននេះភ្នំពេញក៏បានលេចចេញជាបញ្ហាប្រឈមជាច្រើនផងដែរដូចជាបញ្ហាកកស្ទះចរាចរណ៍ដែលបញ្ហានេះជប៉ុនក៏បានជួយយ៉ាងច្រើនផងដែរមានទាំងការជួយលើការសិក្សាលើបញ្ហាលំហូរចរាចរណ៍ការផ្តល់នូវរថយន្តក្រុងនិងការផ្តល់ជាបង្គោលភ្លើងស្តុបថ្មីចំនួន១០០ដើម្បីតម្លើងក្នុងរាជធានីភ្នំពេញ។បញ្ហាការកកស្ទះសំរាមនិងបញ្ហាស្ទះលូជាដើមប៉ុន្តែបញ្ហានេះយើងបានធ្វើការដោះស្រាយជាបណ្តើរៗហើយហើយជប៉ុនក៏បានជួយផងដែរដោយមកដល់ពេលនេះជប៉ុនតាមរយៈអង្កការចៃកាបាននឹងកំពុងអនុវត្តគម្រោងការពារទឹកជំនន់និងកែលម្អប្រព័ន្ធប្រឡាយលូជំហានទី៤។
លោកមិកាមិម៉ាស្សាហិរូឯកអគ្គរាជទូតជប៉ុន បានសម្តែងការកោតសរសើរយ៉ាងខ្លាំងចំពោះការអភិវឌ្ឍន៍ខ្លួនបានយ៉ាងលឿនក្នុងវិស័យសេដ្ឋកិច្ចពាណិជ្ជកម្មវិស័យសំណង់ហេដ្ឋារចនាសម្ព័ន្ធអាគារខ្ពស់ៗក្នុងរាជធានីភ្នំពេញនាប៉ុន្មានឆ្នាំចុងក្រោយនេះ។
លោកអគ្គរាជទូតបានបញ្ជាក់ថាការគ្រប់គ្រងសំរាមក្នុងរាជធានីភ្នំពេញជារឿងមួយដែលលោកបានចាប់អារម្មណ៍ខ្លាំងដោយនៅពេលខាងមុខនេះជប៉ុននិងជួយលើបញ្ហានេះតាមរយៈជួយផ្សព្វផ្សាយនិងអប់រំប្រជាពលរដ្ឋឱ្យបានយល់ពីការទុកដាក់និងផលប៉ះពាល់ពីបញ្ហាសំរាមនេះ។ជាងនេះទៅទៀតលោកក៏នឹងជំរុញឱ្យមានអ្នកវិនិយោគជប៉ុនមកធ្វើការវិនិយោគលើបញ្ហាការគ្រប់គ្រងនិងប្រមូលសំរាមក្នុងរាជធានីភ្នំពេញនេះផងដែរ៕
