ភ្នំពេញ ៖ នេះគឺជាដំណឹងដ៏រីករាយមួយ សម្រាប់ប្រជាពលរដ្ឋកម្ពុជា ។ ប្រសិនបើប្រទេសកម្ពុជាអាចបូមយកប្រេងរបស់ខ្លួននៅដើមឆ្នាំ ២០២០នោះពិតប្រាកដមែន វានឹងជួយធ្វើឱ្យសេដ្ឋកិច្ចប្រទេសកម្ពុជាកាន់តែមានការអភិវឌ្ឍន៍ និង រីកចម្រើនបន្ថែមមួយកម្រិតទៀត ។សម្តេចហ៊ុនសែននាយករដ្ឋមន្ត្រីធ្លាប់បានអះអាងថាលុយដែលបានពីប្រេងកាតនឹងយកទៅចំណាយតែលើការកសាងហេដ្ឋារចនាសម្ពន្ធ័តែប៉ុណ្ណោះ!។
លោក ស៊ុយ សែម រដ្ឋមន្ត្រីក្រសួងរ៉ែ និង ឋាមពលបានឱ្យកាសែតដឹងថា៖ ក្រុមហ៊ុនគ្រីសអេនើជី(អប្សរា) ឯ.ក បានចុះកិច្ចសន្យាជាមួយនឹងក្រុមហ៊ុនPT Profabដើម្បីផ្គត់ផ្គង់ផ្លាតហ្វមក្បាលអណ្តូងផលិតកម្មខ្នាតតូច សម្រាប់តំបន់ប្រេងអប្សរា ដែលជាតំបន់អភិវឌ្ឍន៍ប្រេងដំបូងគេបង្អស់របស់កម្ពុជា។ កម្ពុជានឹងផលិតដំណក់ប្រេងទី១ក្នុងពេលដ៏ខ្លីខាងមុខនេះ ។ ទន្ទឹមនឹងច្បាប់ប្រេងកាត ដែលទើបបានអនុម័ត និង ដាក់ឱ្យប្រើប្រាស់នាពេលថ្មីៗនេះយើងមានគម្រោងប្រេងកាតប្លុក(A)ដែលវិនិយោគដោយក្រុមហ៊ុនគ្រីសអែននីជី(KrisEnergy)មកពីប្រទេសសិង្ហបុរីកំពុងស្ថិតក្នុងដំណាក់កាលអភិវឌ្ឍន៍ និង ផលិតកម្ម ។
ក្រុមហ៊ុនគ្រីសអែននីជី(KrisEnergy)របស់ប្រទេសសិង្ហបុរី ដែលទទួលបានសិទ្ធិវិនិយោគគម្រោងប្រេងកាតប្លុក(A)របស់កម្ពុជាបានប្រកាសឲ្យដឹងថា ការបូមប្រេងកាតចេញពីតំបន់អប្សរា គ្រោងនឹងត្រូវធ្វើឡើងនៅឆមាសទី១ឆ្នាំ២០២០ខាងមុខនេះ ដែលមានអត្រាផលិតកម្មខ្ពស់បំផុត៧៥០០បារ៉ែលក្នុង១ថ្ងៃ។
ការអះអាងបែបនេះរបស់ក្រុមហ៊ុនKrisEnergyធ្វើឡើងក្នុងសេចក្តីប្រកាសព័ត៌មានចុះកិច្ចសន្យាសាងសង់ផ្លាតហ្វមបូមប្រេងសម្រាប់តំបន់ប្រេងអប្សរា។ KrisEnergy បានបញ្ជាក់យ៉ាងដូច្នេះថា«ប្រេងពីតំបន់អប្សរាត្រូវបានគ្រោងនឹងផលិតក្នុងឆមាសទី១ឆ្នាំ២០២០ ហើយតំបន់នេះត្រូវបានគេរំពឹងទុកថានឹងឈានដល់អត្រាផលិតកម្មខ្ពស់បំផុត៧៥០០បារ៉ែលក្នុង១ថ្ងៃ» ៕
