ភ្នំពេញ ៖ លោកប៉ាទ្រិកមឺហ្វី( W. Patrick Murphy) ឯកអគ្គរដ្ឋទូត សហរដ្ឋអាមេរិក ប្រចាំកម្ពុជា បានសម្តែងក្តីសង្ឃឹម យ៉ាងមុតមាំថា នៅក្នុងរយៈពេល ដ៏ខ្លីខាងមុខនេះ ប្រជាពលរដ្ឋខ្មែរ នឹងស្តាប់ឮការផ្សាយ របស់វិទ្យុ(សម្លេងសហរដ្ឋអាមេរិក)VOA និងអាស៊ីសេរី ផ្សាយនៅតាមវិទ្យុក្នុងស្រុក ដូចដើមវិញ ។ នេះបើតាមការបង្ហោះ លើហ្វេសប៊ុកផេករបស់ទូតអាមេរិកប្រចាំកម្ពុជា។
ការលើកឡើងនេះ គឺក្រោយពីមានជំនួបជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នាព្រឹកថ្ងៃទី១៥ ខែវិច្ឆិកា ឆ្នាំ២០១៩។លោករដ្ឋមន្ត្រីក្រសួងព័ត៌មានបានឯកភាពនៅក្នុងការអនុញ្ញាតជាគោលការណ៍ឲ្យវិទ្យុសំឡេងសហរដ្ឋអាម៉េរិកឬវីអូអេ (VOA) អាចជួលម៉ោងផ្សព្វផ្សាយឡើងវិញបាននៅក្នុងវិទ្យុសំបុកឃ្មុំ និងវិទ្យុសំឡេងស្ត្រី (១០២) ប៉ុន្តែត្រូវធ្វើយ៉ាងម៉េចឲ្យម្ចាស់ស្ថានីយទាំងពីរបបំពេញបែបបទ និងធ្វើលិខិតស្នើសុំជាផ្លូវការមកក្រសួងព័ត៌មានដើម្បីបំពេញក្របខ័ណ្ឌគតិយុត្តិ ដើម្បីអាចផ្សព្វផ្សាយកម្មវិធីរបស់វិទ្យុសំឡេងសហរដ្ឋអាម៉េរិកបាន។
លោកមាស សោភ័ណ្ឌ អនុរដ្ឋលេខាធិការក្រសួងព័ត៌មាន និងជាអ្នកនាំពាក្យបានឲ្យដឹងថាលោក រដ្ឋមន្ត្រីក្រសួងព័ត៌មានបានបញ្ជាក់អំពីជំហររបស់រាជរដ្ឋាភិបាលផងដែរ ដោយសារតែវិទ្យុនេះ (អាស៊ីសេរី) នៅតែប្រើពាក្យ “របបក្រុងភ្នំពេញ” ដែលប្រាសចាកពីលិខិតបទដ្ឋានក៏ដូចជាច្បាប់នៃព្រះរាជាណាចក្រកម្ពុជា។
អ្នកនាំពាក្យក្រសួងព័ត៌មានបានឲ្យដឹងថា ឯកអគ្គរដ្ឋទូតអាម៉េរិកក៏បានលើកសំណើមួយមករដ្ឋមន្ត្រីក្រសួងព័ត៍មានថា ដោយសារតែសប្តាហ៍ក្រោយនេះ អ្នកតំណាងវិទ្យុអាស៊ីសរីនឹងមកធ្វើទស្សនកិច្ចនៅកម្ពុជាហើយក៏សុំការអនុញ្ញាតពីលោករដ្ឋមន្ត្រីសុំឲ្យតំណាងវិទ្យុអាស៊ីសេរីអាចមកជួបពិភាក្សាការងារជាមួយលោករដ្ឋមន្ត្រី។ជាការឆ្លើយតបលោករដ្ឋមន្ត្រីបានអនុញ្ញាតឲ្យតំណាងវិទ្យុអាស៊ីសេរីជួបពិភាក្សា។
យោងតាមផេកផ្លូវការរបស់ស្ថានទូតអាម៉េរិកបានឲ្យដឹងថា លោកឯកអគ្គរដ្ឋទូត W. Patrick Murphy បានជួបជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដើម្បីពិភាក្សាពីតួនាទីដ៏សំខាន់នៃប្រព័ន្ធផ្សព្វផ្សាយឯករាជ្យ នៅក្នុងដំណើរការលទ្ធិប្រជាធិបតេយ្យ និងពីរបៀបដែលសហរដ្ឋអាម៉េរិក និងប្រទេសកម្ពុជាអាចធ្វើការជាមួយគ្នាបាន ដើម្បីជួយស្តារវិស័យសារព័ត៌មាននៅកម្ពុជាឲ្យមានភាពរស់រវើក និងសេរីភាពពេញលេញ ។
លោកឯកអគ្គរដ្ឋទូតមូហ្វី ថា ការចុះបញ្ជីឡើងវិញ ក្នុងពេលថ្មីៗនេះ របស់វិទ្យុសម្លេងសហរដ្ឋអាម៉េរិក គឺជាជំហានសំខាន់មួយទៅមុខ ហើយលោកបានសម្តែងក្តីសង្ឃឹមថា ក្នុងពេលដ៏ខ្លីខាងមុខនេះ ប្រជាពលរដ្ឋកម្ពុជាទាំងអស់នឹងអាចស្តាប់ឮការផ្សាយតាមវិទ្យុក្នុងស្រុក នូវកម្មវិធីនៃវិទ្យុសំឡេងសហរដ្ឋអាម៉េរិក និងសេចក្តីរាយការណ៍ពីព័ត៌មានដ៏សំខាន់ទាំងក្នុងស្រុក និងអន្តរជាតិពីវិទ្យុអាស៊ីសេរី៕
