ខេត្តបាត់ដំបង៖ នៅព្រឹកថ្ងៃទី១៣ ខែសីហា ឆ្នាំ២០១៦ ក្រុមការគណៈបក្សប្រជាជនកម្ពុជាបានចុះជួយ ស្រុកសង្កែ ខេត្តបាត់ដំបង ដែលដឹកនាំដោយលោក ឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សារធារណៈ នៃក្រសួងមហាផ្ទៃ អមដំណើរដោយលោក ឧត្តមសេនីយ៍ទោ ទី ឡុង លោកឧត្តមសេនីយ៍ត្រី ហេង វណ្ណថា លោកឧត្តមសេនីយ៍ត្រី ម៉ែន ស៊ីថា លោកវរសេនីឯក ស៊ុយ វុឌ្ឍី អនុប្រធាននាយកដ្ឋាន ព្រមទាំងមន្ត្រីក្រោម ឳវាតបានចុះសួរសុខទុក្ខ ប្រជាពលរដ្ឋចំនួន០៣ ឃុំ មានឃុំអន្លង់វិល ឃុំរកា និងឃុំអូរដំបង១ ស្ថិតនៅក្នុងស្រុកសង្កែ ។
ឳកាសនោះផងដែរ ឯកឧត្តម ឧត្តមសេនីយ៍ឯក រុន រ័ត្នវាសនា បាននាំយកអំណោយ សប្បុរសធម៌ របស់មូលនិធិ សម្តេចក្រឡាហោម ស ខេង ទៅចែកជូនបងប្អូន ប្រជាពលរដ្ឋយើង ដែលទើបនឹងសម្រាលកូន ក៏ដូចជាក្រុមគ្រួសារប្រជាពលរដ្ឋ ដែលមានសមាជិកបានទទួលមរណៈភាពដោយ សរុបទាំងអស់មានចំនួន៨៩គ្រួសារ ។ ដោយក្នុងនោះ អ្នកសម្រាលកូន ក្នុងឃុំអន្លង់វិលមាន ចំនួន៣២គ្រួសារ ក្នុងមួយគ្រួសារៗទទួលបានថវិកាចំនួន២០ម៉ឺន សរុបទាំងអស់ចំនួន៦,៤០០,០០០(ប្រាំមួយលានបួនសែន)រៀល។
ឃុំរកា មាន២៣គ្រួសារក្នុងមួយគ្រួសារៗទទួលបានថវិកាចំនួន២០ម៉ឺន សរុបទាំងអស់ចំនួន៤,៦០០,០០០ (បួនលានប្រាំមួយសែន)រៀល ឃុំអូរដំបង១ មានចំនួន៣៤ គ្រួសារ សរុបទាំងអស់ ចំនួន ៦,៨០០,០០០(ប្រាំមួយលានប្រាំបីសែន)រៀល និងជូនដល់ស្នាក់ការគណៈបក្សទាំងបីឃុំ ក្នុងឃុំនិមួយៗថវិកាចំនួន ៤លាន សរុបថវិកាទាំងអស់១៧,៨០០,០០០(ដប់ប្រាំពីរលានប្រាំបីសែន)រៀល។
ថ្លែងក្នុងពិធីជួបសំណេះសំណាលជាមួយសមាជិក សមាជិការគណៈបក្ស ប្រជាជនកម្ពុជា ឃុំរការ និងឃុំអន្លង់វិល ស្ថិតក្នុងស្រុកសង្កែ ឯកឧត្តមសេនីយ៍ឯក បានមានប្រសាសន៍ទៅកាន់ប្រជាពលរដ្ឋនៅទីនោះថា សូម បងប្អូនប្រជាពលរដ្ឋទាំងអស់ មេត្តាបើកបរដោយមានការគោរពច្បាប់ចរាចរណ៍ និងបង្កើនការប្រុងប្រយ័ត្នបង្ការ ដើម្បីជាសវាង កុំឲ្យមានគ្រោះថ្នាក់បង្កឲ្យមានរបួសស្នាម ឬក៏អាចប៉ះពាល់ដល់អាយុជីវិតដោយសារតែបញ្ហាគ្រោះថ្នាក់ចរាចរណ៍ដល់ខ្លួន ក្រុមគ្រួសារ និងមនុស្សជុំវិញខ្លួន និងជាពិសេសក្នុងឳកាសនោះ លោកឧត្តមសេនីយ៍ឯក ក៏បានផ្ដាំផ្ញើទៅកាន់ពលរដ្ឋបន្តទៀតថា សូមបងប្អូនដែលគ្រប់អាយុបោះឆ្នោតទាំងអស់គ្នាកុំភ្លេច ទៅចូលរួមចុះឈ្មោះ បោះឆ្នោតដែលនឹងប្រព្រឹត្តទៅ ចាប់ពីថ្ងៃទី០១ ខែកញ្ញា ដល់ថ្ងៃទី ២៩ ខែវិច្ឆិកា ឆ្នាំ២០១៦ ខាងមុខឲ្យបានគ្រប់ៗគ្នា៕