ភ្នំពេញ ៖ សកម្មជនអតីតគណបក្សសង្គ្រោះជាតិ២នាក់ដែលចូលរួមធ្វើយុទ្ធនាការថ្ងៃ៩វិច្ឆិកាតាមការអូសទាញរបស់លោកសមរង្ស៊ី ត្រូវបានដោះលែងពីពន្ធនាគារខេត្តកំពត ជាបណ្ដោះអាសន្នយោងតាមពាក្យសុំនៅក្រៅឃុំ របស់ជនត្រូវចោទទាំង២នាក់ នៅព្រឹកថ្ងៃទី១៤វិច្ឆិកានេះបន្ទាប់ពីមានការបញ្ជារបស់នាយករដ្ឋមន្ត្រីពេលសម្ភោធរោងចក្រស៊ីម៉ង់ថៃ បុនរ៉ុង។
សកម្មជនពីរនាក់នោះមាន ស្ដ្រីឈ្មោះ ប៉ែន មុំ ដែលត្រូវបានចាប់ឃុំខ្លួនក្នុង ពន្ធគាររយៈពេលជាង ១ខែ និងលោក នុត ពេជ ដែលជាប់ឃុំឃាំងក្នុងពន្ធនាគារ ជាង ៣ខែ ត្រូវបានតុលាការខេត្ដកំពត សម្រេចដោះលែងឲ្យនៅក្រៅ ឃុំបណ្ដោះអាសន្នសិន ប៉ុន្ដែស្ថិតក្រោមការត្រួតពិនិត្យរបស់តុលាការដដែល។
នៅថ្ងៃទី១៤ ខែវិច្ឆិកា ឆ្នាំ២០១៩នេះ ពួកគេបានសន្យា នឹងមិនចូលរួមសកម្មភាពនានា ដែលបង្កឡើងដោយទណ្ឌិត សម រង្ស៉ី ឬអតីតគណបក្សសង្គ្រោះជាតិ នោះឡើយ ហើយសន្យាចូលមកតុលាការគ្រប់ពេលវេលា នៅពេលដែលកោះហៅ។
លោក ឯក ឆេងហួតព្រះរាជអាជ្ញាអមសាលាដំបូងខេត្តកំពត បានប្រាប់ឲ្យកាសែតដឹងថា ក្រោយពីមានការអំពាវនាវ របស់សម្ដេចតេជោ ហ៊ុន សែន និងបទបញ្ជា ពីរដ្ឋមន្ត្រីក្រសួងយុត្តិធម៌ តំណាងអយ្យការ បានធ្វើការជាមួយស្ថាប័នតុលាការជាបន្ទាន់ ហើយឈានទៅដល់ការចេញដីកាបង្គាប់ឲ្យដោះលែង ជនត្រូវចោទទាំង ២នាក់ នៅថ្ងៃនេះតែម្ដងទៅ។
ក្នុងពិធីសម្ភោធរោងចក្រស៊ីម៉ង់ថៃ បុនរ៉ុងខាងលើ សម្តេចតេជោ ហ៊ុន សែន ក៏បានអំពាវនាវឱ្យប្រជាពលរដ្ឋខ្មែរ ដែលចាញ់បោកការញុះញង់ របស់ក្រុមក្បត់ជាតិ សម រង្ស៉ី ហើយរត់ទៅប្រទេសថៃនោះ វិលត្រឡប់ចូលប្រទេសកម្ពុជាវិញ ដោយរាជរដ្ឋាភិបាលនឹងមិនយកទោសពៃអ្វីនោះទេ។ក្រៅពីនេះបានបញ្ជារឲ្យលោកអងង្គវង្គវឌ្ឈនារដ្ឋមន្ត្រីក្រសូងយុត្តិធម៍ធ្វើការជាមួយរាជអាជ្ញាដោះស្រាយរឿងអ្នកជាប់ឃុំ។សម្តេចតេជោ ហ៊ុន សែន បានថ្លែងយ៉ាងដូច្នេះថា៖ «អ្នកដែលយើងបានចាប់ខ្លួន ខ្ញុំសូមឱ្យរដ្ឋមន្ត្រីក្រសួងយុត្តិធម៌ ធ្វើការជាមួយនឹងព្រះរាជអាជ្ញា ធ្វើការជាមួយតុលាការ ដើម្បីដោះលែងឱ្យនៅក្រៅឃុំ តាមរយៈនៃការស្នើសុំរបស់សាមីខ្លួន របស់មេធាវី ឬរបស់ក្រុមគ្រួសារ ព្រោះបើគ្មានការស្នើសុំទេ យើងមិនអាចដោះលែងឱ្យនៅក្រៅឃុំទេ»។
សូមបញ្ជាក់ថា រោងចក្រផលិតស៊ីម៉ង់តិ៍ «ថៃប៊ុនរ៉ុង»មាន តម្លៃប្រមាណ១១០លានដុល្លារសហរដ្ឋអាមេរិក ដែលសម្ពោធដាក់ឱ្យដំណើរការជាផ្លូវការនៅព្រឹកថ្ងៃនេះ ជារបស់ក្រុមហ៊ុនថៃប៊ុនរ៉ុង មានទីតាំងស្ថិតនៅតំបន់ភ្នំល្អាង ឃុំល្អាង ស្រុកដងទុង ខេត្តកំពត។ រោងចក្រស៊ីម៉ង់តិ៍ថៃប៊ុនរ៉ុង សាងសង់លើផ្ទៃដីទំហំជិត ៧០០ហិកតា បំពាក់ដោយឧបករណ៍បច្ចេកទេសទំនើប ហើយមានសមត្ថភាពផលិតស៊ីម៉ង់បានប្រមាណ ២,៥០០តោនក្នុងមួយថ្ងៃ ស្មើនឹងជិត១លានតោនក្នុងមួយឆ្នាំ។សម្តេចតេជោ ហ៊ុន សែន បានថ្លែងថា រោងចក្រផលិតស៊ីម៉ង់តិ៍ចំនួន៥ នៅស្រុកខ្មែរបានផ្តល់ការងារជូនប្រជាពលរដ្ឋផ្ទាល់បានចំនួន ២,៧០០នាក់ តែផ្តល់ការងារដោយប្រយោលរាប់ម៉ឺននាក់បន្ថែមទៀត។
