ខេត្តក្រចេះ៖ ស្នងការនគរបាលខេត្តក្រចេះ លោកឧត្តមសេនីយ៍លន់ សុផាត នៅថ្ងៃទី១២ ខែសីហា បានដឹកនាំកិច្ចប្រជុំផ្សព្វផ្សាយអនុសាសន៍របស់សម្តេចអគ្គមហា សេនាបតីតេជោ ហ៊ុន សែន នាយរដ្ឋមន្ត្រី និងផ្សព្វផ្សាយខ្លឹមសារសន្និបាតឆមាសទី១ លើកទិសដៅអនុវត្តបន្តឆមាសទី២ របស់អគ្គស្នងការនគរបាលជាតិ។
ការប្រជុំផ្សព្វផ្សាយអនុសាសន៍សម្តេចតេជោហ៊ុន សែន របស់លោកឧត្តមសេនីយ៍ លន់ សុផាត ស្នងការនគរបាលខេត្ត បានធ្វើឡើងបន្ទាប់ពីលោកឧត្តមសេនីយ៍បានអញ្ជើញ ចូលរួមប្រជុំនៅសាលាខេត្តក្រចេះកាលពីថ្ងៃទី២៨ កក្កដា កន្លងទៅ ក្រោមអធិបតីភាព ដ៏ខ្ពង់ខ្ពស់របស់សម្តេច តេជោ ហ៊ុន សែន ។
មានប្រសាសន៍ថ្លែង នៅក្នុងកិច្ចប្រជុំផ្សព្វផ្សាយទៅកាន់នាយប៉ុស្តិ៍នគរបាលរដ្ឋបាល និងមន្ត្រីនគរបាលចរាចរណ៍ដែលកំពុងតែអនុវត្តច្បាប់ និងរៀបចំសណ្តាប់ធ្នាប់តាមដងផ្លូវ នៅទូទាំងខេត្ត ដែលបានធ្វើឡើងពេញមួយព្រឹក លោកឧត្តមសេនីយ៍លន់ សុផាត ស្នងការ បានមានប្រសាសន៍ជម្រុញឲ្យនគរបាលធ្វើយ៉ាងណា គោរពវិន័យជាកងកម្លាំងនគរបាល ឲ្យបាន និងជម្រុញឲ្យមានការការផ្តល់សេវាសាធារណៈជូនពលរដ្ឋឲ្យបានទាន់ពេល។
លោកឧត្តមសេនីយ៍លន់ សុផាត បានសង្កត់ធ្ងន់ថា នគរបាលត្រូវរួមគ្នា ធ្វើយ៉ាងណា បំបាត់ឲ្យអស់នូវភាពអសន្តិសុខ ដើម្បីឆ្លើយតបការអនុវត្តគោលនយោបាយភូម-ឃុំ មាន សុវត្ថិភាពឲ្យមានប្រសឹទ្ឋភាព។
លើសពីនេះទៀតលោកឧត្តមសេនីយ៍លន់ សុផាត បានជម្រុញឲ្យលោកស្នងការ រងអត្តសញ្ញាកម្ម និងអធិការរងទទួលបន្ទុកស្ថិតិ ត្រូវពន្លឿនការធ្វើអត្តសញ្ញាណប័ណ្ណឲ្យ បានឆាប់រហ័យជូនដល់ពលរដ្ឋឲ្យទាន់ផែនការ និងត្រូវនាំយកអត្តសញ្ញាណប័ណ្ណទាំងនោះ ទៅប្រគល់ជនពលរដ្ឋដល់លំនៅឋាន។ លោកឧត្តសេនីយ៍ស្នងការ បានលើកឡើងថា នគរ បាលទូទាំងខេត្ត ត្រូវធ្វើយ៉ាងណាឲ្យមជ្ឈដ្ឋានប្រជាពលរដ្ឋវាយតម្លៃដល់មន្ត្រីនគរបាល ប៉ុស្តិ៍រដ្ឋបាលរបស់យើងមានភាពសកម្មនិងការងារ មានមុខប្រចាំការជាប់ជាប្រចាំនៅប៉ុស្តិ៍ រដ្ឋបាល ដោយត្រៀមលក្ខណះអន្តរាគមនឲ្យទាន់ពេលជូនពួកគាត់នៅរាល់បទល្មើស ធ្វើ ឲ្យពួកគាត់មានជំនឿមកលើនគរបាល។
មានប្រសាសន៍លើកឡើងបន្តលោកឧត្តមសេនីយ៍ លន់ សុផាត បានដាក់ចេញ នូវ ទិសដៅផែនការដល់នគរបាលជំនាញព្រហ្មទណ្ឌ លើកិច្ចការងារស្រាវជ្រាវបទល្មើស ឧក្រិដ្ឋ ឬមជ្ឈឹមដែលនៅសេសសល់ពិសេសករណីគ្រឿងញៀន ត្រូវកំណត់លើមុខសញ្ញា បង្ក្រាបត្រៀមលក្ខណះ ឲ្យបានគ្រប់គ្រាន់ដើម្បីជួយអន្តរាគមពលរដ្ឋរួមគ្នាធ្វើយ៉ាងណាកាត់ បន្ថយបទល្មើសនៅក្នុង ឆមាសទី២ខាងមុខនេះ។
លោកឧត្តមសេនីយ៍ លន់ សុផាត បានដាក់ទិសដៅផែនការយ៉ាងតឹងរឹងបន្ថែម ដូច ជាកិច្ចការងារចុះយាមល្បាត នៅតាមតំបន់គោលដៅដែលងាយ កិច្ចការងារបង្ក្រាបបទ ល្មើសគ្រឿងញៀន បង្ក្រាបបទល្មើសព្រហ្មទណ្ឌ និងកិច្ចការអន្តរាគមន៍ ៕
