ម៉ាឡេស៊ី ៖ លោក សម រង្ស៊ី ប្រធានស្ដីទីអតីតគណបក្សប្រឆាំងដែលបរាជ័យមិនអាចចូលស្រុកវិញចាប់នាយករដ្ឋមន្ត្រីហ៊ុនសែនតាមការឃោសនារបស់ខ្លួន បានលើកឡើងនូវ្រប្រធានបទថ្មីមួយកាលពីថ្ងៃ ទី១២វិច្ឆិកាក្នុងសន្និសីទកាសែតមួយ នៅទីក្រុងគូឡាឡាំពួរ ប្រទេសម៉ាឡេស៊ីដែលជាប្រទេសសមាជិកអាស៊ាន ថា រាជរដ្ឋាភិបាលកម្ពុជាកំពុងតែប្រឡែងជាមួយភ្លើង តាមរយៈទំនាក់ទំនងដ៏ស្អិតល្មួតជាមួយប្រទេសចិន។
តែលោក សម រង្ស៊ី បានបញ្ជាក់ថា គេមិនអាចបន្ទោសចិនបានឡើយ អ្នកដែលត្រូវទទួលខុសត្រូវចំពោះរឿងនេះ គឺអ្នកដឹកនាំប្រទេស ដែលបណ្ដោយឲ្យឥទ្ធិពលរបស់ចិនគ្របដណ្ដប់លើកម្ពុជាដូចសព្វថ្ងៃ។ នេះបើតាមការចុះផ្សាយរបស់កាសែតម៉ាឡេស៊ី Malaysiakini។
លោក សម រង្ស៊ី ថាវត្តមានជនជាតិចិននិងហេដ្ឋារចនាសម្ព័ន្ធរបស់ចិនលើទឹកដីកម្ពុជា ត្រូវបានលោក សម រង្ស៊ី ពន្យល់ថា មិនមែនជាប់ពាក់ព័ន្ធតែក្នុងបញ្ហាសេដ្ឋកិច្ចមួយមុខទេ។ គឺវាមានជាប់ពាក់ព័ន្ធទៅនឹងអព្យាក្រឹត្យភាពនិងឯករាជ្យភាពរបស់កម្ពុជា នៅចំពោះមុខមហាយក្សចិន។ មិនត្រឹមតែប៉ុណ្ណោះ វាថែមទាំងអាចគំរាមកំហែងដល់សន្តិភាពនិងស្ថិរភាពនៅក្នុងតំបន់ទៀតផង។ សម្រាប់លោក សម រង្ស៊ី អ្នកដែលត្រូវទទួលខុសត្រូវចំពោះរឿងនេះ គឺអ្នកដឹកនាំប្រទេស ដែលបណ្ដោយឲ្យឥទ្ធិពលរបស់ចិនគ្របដណ្ដប់លើកម្ពុជាដូចសព្វថ្ងៃ។
លោក សម រង្ស៊ីនៅតែបន្តអះអាងពីការប្ដេជ្ញាចិត្តត្រឡប់មកស្ដារលទ្ធិប្រជាធិបតេយ្យនៅកម្ពុជាឲ្យរស់ឡើងវិញ។ លោក សម រង្ស៊ី ថា នៅពេលដែលការស្ដារលទ្ធិប្រជាធិបតេយ្យនៅកម្ពុជាទទួលបានជោគជ័យ នោះលោកនឹងមិនអនុញ្ញាតឲ្យចិនសាងសង់មូលដ្ឋានទ័ពនៅលើទឹកដីកម្ពុជាឡើយ។
លោកសមរង្ស៊ីដែលប្រកាសថាជាប្រធានស្ដីទីអតីតគណបក្សប្រឆាំង បានផ្ដល់បទសម្ភាសដល់ទូរទស្សន៍ Al Jazeera កាលពីថ្ងៃទី១១វិច្ឆិកាថា កម្ពុជាកំពុងធ្លាក់ទៅក្នុងនឹមអាណានិគមរបស់ប្រទេសចិន ដោយចិនបានបញ្ជូនពលរដ្ឋរបស់គេជាច្រើនពាន់នាក់ មកកាន់ប្រទេសកម្ពុជា។ បើតាមលោក សម រង្ស៊ី ជនជាតិចិនទាំងនោះបានចូលមករស់នៅកម្ពុជា ធ្វើខ្លួនដូចជាម្ចាស់ទឹកម្ចាស់ដី ហើយការណ៍នេះបានបង្កជាក្ដីបារម្ភយ៉ាងខ្លាំង។
ការលើកឡើងរបស់លោក សម រង្ស៊ីធ្វើឡើង ក្នុងពេលដែលលោកមានវត្តមាននៅក្នុងតំបន់អាស៊ាន ដែលក្នុងនោះប្រទេសជាសមាជិកអាស៊ានមួយចំនួន កំពុងមានទំនាស់ស្រួចស្រាល់ជាមួយប្រទេសចិន ក្នុងសំណុំរឿងសមុទ្រចិនខាងត្បូងទំនងចង់បានសមានចិត្តពីប្រទេសទាំងនោះ។
សម្រាប់វត្តមានលោកសមរង្ស៊ីនៅក្នុងប្រទេសម៉ាឡេស៊ីនេះវិញលោកកុយ គួង អ្នកនាំពាក្យក្រសួងការបរទេសកម្ពុជាបានថ្លែង ប្រាប់កាសែត ថា កម្ពុជាមិនបានយកចិត្តទុកដាក់ធំដុំទេចំពោះសកម្មភាពរបស់លោកសម រង្ស៊ី នៅក្នុងប្រទេសម៉ាឡេស៊ីនេះ។ លោកបានគូសបញ្ជាក់ថា សកម្មភាពរបស់លោកសម រង្ស៊ី មិនអាចធ្វើឱ្យស្ថានភាពនៅកម្ពុជាប្រែប្រួលនោះឡើយ។
