កំពង់ឆ្នាំង៖ កុងត្រូល ដ៍រឹងមាំ របស់សមត្ថកិច្ច ចំរុះខេត្តពោធិសាត់ ដឹកនាំបង្កើត ដោយ លោក សួន រិនឌី អភិបាលរង ខេត្ត ទទួល បន្ទុកបង្ក្រាប បទល្មើស ព្រៃឈើ ដែលឈរជើង ចាំការស្ទាក់ចាប់ បង្ក្រាបរថយន្តដឹក ឈើប្រណិត គ្មានច្បាប់អនុញ្ញាតនៅចំណុចក្បាលដំរី ព្រំប្រទល់ខេត្ត កំពង់ឆ្នាំង-ពោធិសាត់កំពុងត្រូវប៉ាន់ ដោយសព្វថ្ងៃនេះ ស្របពេលឈើប្រណិតប្រភេទឈើគ្រញូង នាងនួន បេង និងធ្នង់ កំពុងតែត្រូវប៉ាន់នៅលើទីផ្សារនោះ ឈ្មួញបានបញ្ចេញសកម្មភាពដឹកជញ្ជូនធ្វើអាជីវកម្មលក់ទៅក្រៅប្រទេស ដោយប្រើគ្រប់រូបភាព និងល្បិចកលបន្លំភ្នែក សមត្ថកិច្ច ដោយប្រើប្រាស់រថយន្តទំនើបៗ និងរថយន្តដឹកឥវ៉ាន់សំពីងសំពោងពីលើបង្កប់ឈើពីក្រោម ដូចជាករណីស្រូវពីលើឈើពីក្រោម ដំឡូងមីពីលើឈើពីក្រោម និងរថយន្ត ស៊ីទែន ប្រេងឥន្ធនៈជាដើម ឆ្លងកាត់ទឹកដីខេត្តកំពង់ឆ្នាំង ឆ្ពោះទៅកាន់រាជធានីភ្នំពេញ ឬ ទៅកាន់ទឹកដីខេត្តកំពង់ចាម ជាប់ព្រំប្រទល់វៀតណាម ទាំងយប់ទាំងថ្ងៃ។ ប៉ុន្តែការបង្រ្កាប គឺមានតិចតួចបំផុត ហើយការបង្ក្រាបបានសម្រេចលុះត្រាតែ រថយន្តបែកកង់ ឬក្រឡាប់ ឬជួបគ្រោះថ្នាក់ចរាចរណ៍ ឬចរចារតម្លៃជាមួយសមត្ថកិច្ចមិនត្រូវរ៉ូវគ្នា ។ ការចរាចរណ៍ឈើប្រណីតខាងលើ សមត្ថកិច្ចចំរុះខេត្តពោធិសាត់បានដាក់កុងត្រូលរឹងមាំ ចាំស្ទាក់ចាប់នៅចំណុចក្បាលដំរីព្រំប្រទល់ខេត្តពោធិសាត់-កំពង់ឆ្នាំង អស់រយៈពេលជាង៣ខែមកហើយ ប៉ុន្តែពុំឃើញមានលទ្ធផលបង្ក្រាបបានម្តងឡើយ ដោយបណ្តោយអោយរថយន្តដឹកឈើចរាចរណ៍នៅលើដងផ្លូវជាតិលេខ ៥ បានយ៉ាងរលូន ។ មន្ត្រីសមត្ថកិច្ចចំរុះដែលឈរជើងនៅចំណុចកុងត្រូលដែលមានរបាំងចំរូងដែក ដូចបង្អោងឡើងត្នោត ដាក់កាត់ទទឹងផ្លូវ ឬបោះដែកបន្លាកែច្នៃអោយមុតបែកកង់រថយន្ត សម្រាប់ឃាត់រថយន្តដឹកបទល្មើសពេលយប់ដើម្បីជំរិតយកប្រាក់មកចែកគ្នា ដាក់ហោប៉ៅរៀងៗខ្លួន។
ប្រភពខាងលើបន្តអោយដឹងថារថយន្តដឹកឈើប្រណីត គ្មានច្បាប់អនុញ្ញាតឆ្លងកាត់កុងត្រូវនេះ ត្រូវបង់លុយអោយសមត្ថកិច្ចចំរុះក្នុងមួយរថយន្តចាប់ពី១០០ដុល្លា ឡើងទៅដល់១ពាន់ដុល្លាតាមរថយន្តតូចឬធំ មួយយប់ៗរថយន្តធ្វើចរាចរណ៍ដឹកឈើប្រណិតទាំងតូចទាំងធំ មិនក្រោមពី៥០គ្រឿង។
ជាក់ស្តែង រថយន្តដឹកដំឡូងមីពីលើបង្កប់ឈើប្រណីតពីក្រោម មួយគ្រឿងត្រូវបានកម្លាំងរដ្ឋបាលព្រៃឈើខេត្តកំពង់ឆ្នាំង ធ្វើការស្ទាក់ចាប់បាននៅវេលាម៉ោង៨និង៣០នាទីយប់ថ្ងៃទី១១ ខែកុម្ភៈ ឆ្នាំ២០១៤ នៅលើកំណាត់ផ្លូវជាតិលេខ៥ ឡើងទួលទំនាបស្រែហង្ស ក្នុងឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ។
កម្លាំងរដ្ឋបាលព្រៃឈើដែលដឹកនាំដោយលោក ហោ ដារ៉ា នាយផ្នែកស្តីទីកំពង់ឆ្នាំង បានដឹកនាំកម្លាំងបង្ក្រាបរថយន្តខាងលើទាំងយប់រួចនាំយកមកកាន់ ខណ្ឌរដ្ឋបាលព្រៃឈើខេត្តកំពង់ឆ្នាំង ក្រោមបញ្ជាផ្ទាល់ពីនាយខណ្ឌរដ្ឋបាលព្រៃឈើ លោក ស៊ិន កុសល រថយន្តបន្លំដឹកឈើប្រណីតប្រភេទនាងនួន ដោយដាក់បាវដំឡូងមីពីលើនេះ ចំណុះ ២ តោនកន្លះ ក្បាលពណ៌ខៀវ ឆ្នូតស ទ្រុងពណ៌លឿង ឆ្នូតស ខៀវ ពាក់ស្លាកលេខ ក្រចេះ 3A- 0009 ផ្ទុកឈើនាងនួនចំនួន ៦៥ ដុំខ្នាតត្រូវប៉ាន់ ដឹកចេញពីព្រំប្រទល់ខេត្តបាត់ដំបង-ពោធិសាត់ ឆ្ពោះទៅកាន់ ព្រំប្រទល់វៀតណាម ក្នុងទឹកដីខេត្តកំពង់ចាម ខណៈឆ្លងកាត់ខេត្តកំពង់ឆ្នាំង មកដល់ចំណុចខាងលើ បន្ទាប់ពីមានការសង្ស័យ សមត្ថកិច្ចក៍បើករថយន្តតាមពីក្រោយ ស្ទាក់ចាប់បានតែម្តង ។ ក្រោយពីស្ទាក់ចាប់រថយន្តដឹកឈើខាងលើ អ្នកបើកបរបាត់គេចខ្លួនបាត់ស្រមោល។
លោក សុទ្ធ ផល្លី នាយរងផ្នែករដ្ឋបាលព្រៃឈើ កំពង់ឆ្នាំង បានអោយដឹងថា បន្ទាប់ពីទទួលពត៌មានថា មានរថយន្តដឹកដំឡូងមីបង្កប់ឈើ ឈើឆ្លងកាត់ខេត្តកំពង់ឆ្នាំង លោកក៍បានធ្វើការតាមដាននូវភិនភាគរថយន្ត រហូតឈានដល់ការ ស្ទាក់បានរថយន្តខាងលើតែម្តង ។ បន្ទាប់មករាយការជូនថ្នាក់លើ អោយកម្លាំងទៅ ជួយនាំវត្ថុតាង និង រថយន្តយកមកខណ្ឌរដ្ឋបាលព្រៃឈើកំពង់ឆ្នាំង ឈើទាំងនោះ មានចំនួន៦៥កំណាត់ ស្មើនឹង ៧,២០៩ម៣ ។
វត្ថុតាង រថយន្តនិង ឈើប្រណីត ត្រូវបានរក្សាទុកនៅខណ្ឌរដ្ឋបាលព្រៃឈើខេត្តកំពង់ ឆ្នាំងដើម្បីរៀបចំកសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង តាមនីតិវិធីច្បាប់ ។
ពាក់ព័ន្ធនឹងការឃាត់រថយន្តខាងលើ នាពេលនេះ ត្រូវបានគេមើលឃើញថាជាគំរូល្អ ដោយសមត្ថកិច្ចមិនបានប៉ះពាល់ដកហូត ឬយកឈើក្រៅផ្លូវការទុកលក់ដូចពេលមុនៗឡើយ ៕
