ភ្នំពេញ៖គណបក្សហ្វ៊ុនស៊ិនប៉ិចសម្តេចក្រុមព្រះនិងគណបក្សខ្មែររួបរួមជាតិលោកញឺកប៊ុនឆៃដែលរកមិនបាន១ជើងម៉ាក្នុងការបោះឆ្នោតជ្រើសតំណាងរាស្ត្រឆ្នាំ២០១៨នឹងធ្វើសមាជច្របាច់បញ្ចូលគ្នាទៅជាគណបក្សតែមួយនៅចុងខែវិច្ឆិកាឆ្នាំ២០១៩ខាងមុខនេះ។
នេះបើតាមលោកញឹកប៊ុនឆៃប្រធានគណបក្សខ្មែររួបរួមជាតិបានប្រាប់ក្រុមអ្នកកាសែតនៅថ្ងៃទី១ខែវិច្ឆិកាបន្ទាប់ពីក្រុមការងារនៃគណបក្សទាំងពីរជជែកពិភាក្សាគ្នារួចពីការបង្រួបបង្រួមគ្នាកាលពីថ្ងៃទី៣០ខែតុលាឆ្នាំ២០១៩នៅក្នុងភោជនីយ៍ដ្ឋានមួយក្នុងរាជធានីភ្នំពេញ ។ នៅក្នុងជំនួបនេះភាគីទាំងពីរបានផ្តោតសំខាន់ទៅលើការបង្រួបបង្រួមគ្នាឡើងវិញរវាងអ្នករាជានិយមនិងអ្នកសីហនុនិយមនៅក្នុងពេលឆាប់ៗខាងមុខនេះ។ហើយបានសម្រេចបង្កើតគណៈកម្មការដោយម្ខាងមានសមាសភាពចំនួនបីរូបដើម្បីពិនិត្យលក្ខន្តិកៈនិងបទបញ្ជាផ្ទៃក្នុងរួមទាំងគោលការណ៍មួយចំនួនទៀត ដើម្បីជៀសវាងកុំឲ្យបញ្ហាដូចលើកមុនៗ។
លោកញឺកប៊ុនឆៃបញ្ជាក់ថា “ការធ្វើសមាជច្របាច់បញ្ចូលគ្នានេះ គឺយើងធ្វើខុសពីបីដងលើកមុន លើកមុនយើងចែកកូតាគ្នាលើកនេះយើងបានដាក់គោលការណ៍ប្រាំយ៉ាងហើយយើងមានក្រុមប្រឹក្សាវិន័យយើងជាការសង្ឃឹមមួយជឿជាក់ថាវាមិនអាចបែកបាក់គ្នាទៀតទេព្រោះយើងមានលក្ខន្តិកៈបទបញ្ជាផ្ទៃក្នុង”។
លោកញឹកប៊ុនឆៃបានអះអាងថាសមាជនាពេលខាងមុខនឹងថ្វាយតួនាទីប្រធានគណបក្សហ្វ៊ុនស៊ិនប៉ិចដល់សម្តេចក្រុមព្រះនរោត្តមរណរឫទ្ធិដើម្បីដឹកនាំ។ចំពោះក្បាលម៉ាស៊ីនផ្សេងទៀតមិនទាន់សម្រេចនៅឡើយទេតែ ជាគោលការណ៍អនុប្រធានគណបក្សមានតែពីររូបទេ។
គួរបញ្ជាក់ថាការបង្រួបបង្រួមរវាងគណបក្សរាជានិយមទាំងពីរនេះបានកើតឡើងបន្ទាប់ពីជំនួបរវាងសម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច ជាមួយលោកញឹក ប៊ុនឆៃ ប្រធានគណបក្សខ្មែររួបរួមជាតិ ចំនួនបួនលើក។ គឺនៅថ្ងៃទី១៣-១៨-២៤ ខែតុលា ឆ្នាំ២០១៩ នៅដំណាក់វាលស្បូវ។លើកទី៤ កាលពីថ្ងៃទី៣០ ខែតុលា ឆ្នាំ២០១៩ សម្តេចក្រុមព្រះ និងលោកញឹកប៊ុនឆៃបានជួបគ្នាម្តងទៀត៕
