ភ្នំពេញ៖ ល្បែងស៊ីសង ប្រភេទហ្គេមបាញ់ត្រីនៅក្នុងរាជធានីភ្នំពេញ ដែល ធ្វើឲ្យក្មេងៗសិស្សានុសិស្សគេចសាលារៀន បង្កផលប៉ះពាល់យ៉ាងធ្ងន់ធ្ងរ ដល់ធនធានមនុស្សដែលជាទំពាំងស្នងឫស្សី និងជាសសរទ្រូងរបស់ប្រទេសជាតិនឹងត្រូវលុបបំបាត់ចោលឲ្យអស់ពីក្នុងរាជធានីភ្នំពេញ។
នេះជាការសន្យារបស់លោកឃួង ស្រេងអភិបាលរាជធានីភ្នំពេញកាលពីព្រឹកថ្ងៃទី១ វិច្ឆិកា ២០១៩ ពេលអញ្ជើញចូលរួមជាអធិបតីភាព ក្នុងពិធីបើកបវេសនកាលឆ្នាំសិក្សា ២០១៩-២០២០ និង ពិធីចែករង្វាន់ដល់សិស្សពូកែរាជធានីភ្នំពេញ សម្រាប់ឆ្នាំសិក្សា២០១៨-២០១៩ នៅវិទ្យាល័យជាស៊ីមសន្ធរម៉ុក ក្នុងសង្កាត់ទឹកល្អក់ទី១ ខណ្ឌទួលគោក ។
លោកឃួង ស្រេង បញ្ជាក់ថា ក្នុងនាមលោកជាអាជ្ញាធរដែនដី រាជធានីភ្នំពេញ លោកសន្យាថា នឹងលុបបំបាត់ល្បែងស៊ីសង ប្រភេទហ្គេមបាញ់ត្រី ឲ្យអស់នៅក្នុងរាជធានីភ្នំពេញ ព្រោះវាបានធ្វើឲ្យសិស្សានុសិស្សគេចសាលារៀន ។ លោកបានស្នើឲ្យ អាជ្ញាធរខណ្ឌទាំង១៤ និងសមត្ថកិច្ចពាក់ព័ន្ធទាំងអស់ ត្រូវមានវិធានការលុបបំបាត់ល្បែងប្រភេទនេះ ឲ្យអស់ពីក្នុងអាណាចក្ររបស់ខ្លួន ។
លោកឃួងស្រេង៖ “កន្លងមកនេះយើងបានអនុវត្តរួចហើយ ជុំវិញការបង្ក្រាបល្បែងហ្គេមបាញ់ត្រីនេះ ហើយរាល់ការបង្ក្រាប កម្លាំងមានសមត្ថកិច្ចរបស់យើង បានត្រឹមតែដកហូតទូរហ្គេម និងបិទទីតាំងប៉ុណ្ណោះ។ ប៉ុន្តែចាប់ពីពេលនេះតទៅ យើងត្រូវតែមានវិធានការក្តៅជាងមុន ពោលគឺត្រូវចាប់ម្ចាស់ទូរហ្គេមនោះឲ្យបាន ទោះជាអ្នកមើលការខុសត្រូវស៊ីប្រាក់ខែគេក៏ដោយ យើងត្រូវតែឃាត់យកមកសួរនាំ ដើម្បីឈានទៅដល់ការចាប់ម្ចាស់ទូរហ្គេម មកដាក់ទោសទៅតាមច្បាប់។
