ថៃ៖អាជ្ញាធរថៃប្រទះឃើញសាកសពពលករខ្មែរម្នាក់បានស្លាប់យ៉ាងអាណោចអាធ័មទក់រាងកាយកាលពីថ្ងៃទី៣០ ខែតុលា ឆ្នាំ២០១៩ នៅក្នុងតំបន់ ចម្ការដើមប្រេងខ្យល់មួយកន្លែង ស្ថិតនៅភូមិ ១២ ឃុំថាតាក់កៀប ស្រុកថាតាក់កៀប ខេត្តឆាកឈីងសៅ ប្រទេសថៃ ។
ជនរងគ្រោះជាពលករខ្មែរមាន ឈ្មោះ អាត សុខ ភេទប្រុស អាយុ ២៩ឆ្នាំ កាន់លិខិតឆ្លងដែនធ្វើការ លេខ T0434011 មានស្រុកកំណើត រស់នៅខេត្តព្រៃវែង បានស្លាប់បាត់បង់ជីវិត ។
បើតាមព័ត៌មានបឋមបានឱ្យដឹងថា នៅកន្លែងកើតហេតុមានពលករខ្មែរ ចូលមកធ្វើការដាំដើមប្រេងខ្យល់ និង កាប់ដើមប្រេងខ្យល់ ចំនួន ៨នាក់ ក្មេង ០២នាក់ ស្នាក់នៅក្នុងខ្ទមបួនខ្នង។ក្នុងករណីនេះ គេសង្ស័យជនរងគ្រោះអាចត្រូវសត្វដំរីព្រៃព្រិចជាន់ ស្លាប់បាត់បង់ជីវិត ពីព្រោះគេឃើញខ្ទមស្នាក់នៅក៏ត្រូវសត្វដរីព្រៃជាន់ខ្ទេចខ្ទីដែរ ។បច្ចុប្បន្នសាកសពជនរងគ្រោះត្រូវបានសមត្ថកិច្ចថៃបញ្ជូនយកទៅរក្សាទុកនៅមន្ទីរពេទ្យថាតាក់កៀប ដើម្បីធ្វើការកោសល្យវិច័យតាមនីតិវិធី ៕
