ភ្នំពេញ៖ កូនប្រុសរបស់លោក គង់ គាំ ម្នាក់ក្នុងចំណោមបីនាក់គឺលោក គង់ បូរ៉ា អតីតតំណាងរាស្ត្រមណ្ឌល ខេត្តព្រៃវែង របស់អតីតគណបក្សសង្គ្រោះជាតិ នៅពេលនេះ ត្រូវបានព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ត្រាស់បង្គាប់ តែងតាំងជាអនុរដ្ឋលេខាធិការនៃក្រសួងមហាផ្ទៃ។
ព្រះរាជក្រឹត្យ តែងតាំងលោក គង់ បូរ៉ា ជាអនុរដ្ឋលេខាធិការក្រសួងមហាផ្ទៃ ត្រូវបានព្រះករុណា ព្រះមហាក្សត្រ ឡាយព្រហស្ថលេខា កាលពីថ្ងៃទី២៦ ខែតុលា ឆ្នាំ២០១៩ តាមការក្រាបបង្គំស្នើសូមរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាក្រោយពីលោកគង់បូរ៉ាចុះចូលជាមួយគណបក្សប្រជាជនកម្ពុជា កាលពីរសៀលថ្ងៃទី១០ ខែតុលា ឆ្នាំ២០១៩ នៅទីស្នាក់ការគណបក្សប្រជាជនកម្ពុជា រាជធានីភ្នំពេញ។
លោក គង់ បូរ៉ា និងឪពុករបស់លោក គឺលោក គង់ គាំលោកទាំងពីរ ស្ថិតក្នុងចំណោមអ្នកនយោបាយ ១១៨ នាក់ ដែលជាថ្នាក់ដឹកនាំអតីតគណបក្សសង្គ្រោះជាតិ ដែលតុលាការកំពូល បានហាមឃាត់សិទ្ធិធ្វើនយោបាយ ៥ឆ្នាំតាមអំណាចសាលដីកា លេខៈ ៣៤០ ( ឆ ) ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូលហើយ បានទទួលសិទ្ធិធ្វើនយោបាយឡើងវិញ ដោយព្រះករុណា ព្រះមហាក្សត្រ បានចេញព្រះរាជក្រឹត្យ ពីរដាច់ដោយឡែកពីគ្នា ចុះថ្ងៃទី១៥ ខែមករា ឆ្នាំ២០១៩ ត្រាស់បង្គាប់ ផ្តល់នីតិសម្បទាឡើងវិញ។
លោក គង់ គាំ បានចូលធ្វើនយោបាយវិញបានទទួលតួនាទីជាប្រធានកិត្តិយសគណបក្សឆន្ទៈខ្មែរ ដែលមានលោក គង់ ម៉ូនីកា ជាប្រធាន។ ក្រៅពីគង់មុនីគង់បូរ៉ា លោកគង់គាំមានកូនប្រុសម្នាក់ទៀតឈ្មោះ លោក គង់ សភា អតីតតំណាងរាស្ត្រអតីតគណបក្សសង្គ្រោះជាតិ គិតត្រឹមខែតុលា ឆ្នាំ២០១៩ នេះ កំពុងនៅធ្វើនយោបាយជាមួយលោកសមរង្ស៊ី។គង់សុភាគឺជាតំណាងរាស្ត្រដែលរងការប្រើហឹង្សាវាយតប់នៅក្បររដ្ឋសភាពីក្រុមជើងកាង។
លោក គង់ បូរ៉ាកើតនៅថ្ងៃទី២០ ខែកញ្ញា ឆ្នាំ១៩៧៤ បានចូលធ្វើនយោបាយ ជាមួយគណបក្សសមរង្ស៊ី ដោយនៅឆ្នាំ១៩៩៨ លោកបានជាប់ឆ្នោតជាតំណាងរាស្ត្រមណ្ឌល ខេត្តព្រៃវែង។ លោក គង់ បូរ៉ា បានបន្តជាប់ឆ្នោត ជាអ្នកតំណាងរាស្ត្រគណបក្សសមរង្ស៊ី និងបន្តជាតំណាងរាស្ត្រ នៅគណបក្សសង្គ្រោះជាតិ នៅឆ្នាំ២០១៣។ រីឯលោក គង់ សភា បានក្លាយជាតំណាងរាស្ត្ររបស់គណបក្សសង្គ្រោះជាតិ នៅឆ្នាំ២០១៣។ លោក គង់ ម៉ូនីកា ជាកូនប្រុសពៅរបស់លោក គង់ គាំ បានចេញប្រឡូកក្នុងឆាកនយោបាយ ដោយបង្កើតគណបក្សឆន្ទៈខ្មែរ នៅខែមេសា ឆ្នាំ២០១៨តែមិនទទួលបានអាសនៈនៅរដ្ឋសភាទេ៕