រតនគិរី ៖ នៅព្រឹកថ្ងៃទី២៣ខែតុលាឆ្នាំ២០១៩នេះលោកថង សាវុនប្រធានគណៈកម្មាធិការសាខាបានអញ្ជើញជាអធិបតីភាពក្នុងពិធីប្រកាសទទួលស្គាល់សមាសភាពគណៈកិត្តិយសនិងសមាសភាពគណៈកម្មាធិការអនុសាខាកាកបាទក្រហមកម្ពុជាក្រុងបានលុង។ពិធីនេះក៏មានការអញ្ជើញពីសំណាក់លោក -លោកស្រីសមាជិកសមាជិកាគណៈកម្មាធិការសាខា លោកនាយកសាខា អនុសាខាក្រុមកាកបាទក្រហមសង្កាត់និងស្ថាប័នពាក់ព័ន្ធជុំវិញក្រុងបានលុងជាច្រើនរូបទៀតផងដែរ។
បន្ទាប់ពីលោកឌឹម ណាតនាយកសាខាបានអានសេចក្តីប្រកាសទទួលស្គាល់សមាសភាពអនុសាខាក្រុងបានលុងរួចមកលោកងិន ណែលប្រធានគណៈកម្មាធិការអនុសាខាតំណាងអោយគណៈកិត្តិយសនិងគណៈកម្មាធិការ អនុសាខាក្រុងបានលុងដែលទើបទទួលបានការតែងតាំងថ្មីបានធ្វើការប្តេជ្ញាចិត្តយ៉ាងមុតមាំ ក្នុងការបំពេញការងារមនុស្សធម៌ជួយជនងាយរងគ្រោះនិងជនរងគ្រោះ ដោយគ្រោះមហន្តរាយផ្សេងៗ ជាពិសេសបន្តគាំទ្រសម្តេចចកិត្តិព្រឹទ្ធបណ្តិតប៊ុនរ៉ានី ហ៊ុនសែនជាប្រធានកាកបាទក្រហមកម្ពុជានៅអាណត្តិក្រោយៗទៀតដើម្បីបានបន្តដឹកនាំបេសកកម្មមនុស្សធម៌ឱ្យកាន់តែរីកចម្រើនថែមទៀតនិងប្តេជ្ញាគោរពយ៉ាងខ្ជាប់ខ្ជួននូវគោលការណ៍គ្រឹះទាំង៧របស់ចលនាអន្តរជាតិកាកបាទក្រហម អឌ្ឍចន្ទក្រហម។
មានប្រសាសន៍សំណេះសំណាលក្នុងឱកាសនោះលោកប្រធានគណៈកម្មាធិការសាខាបានពាំនាំនូវប្រសាសន៍ផ្ដាំផ្ញើរសួរសុខទុក្ខ ការកោតសរសើរនិងអំណរគុណយ៉ាងជ្រាលជ្រៅពីសំណាក់សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែនប្រធានកាកបាទក្រហមកម្ពុជាជូនចំពោះសមាជិកសមាជិកាសាខា-អនុសាខាអង្គភាពនានាអាជ្ញាធរខេត្តគ្រប់លំដាប់ថ្នាក់ទាំងអស់ដែលតែងតែផ្តល់នូវការយកចិត្តទុកដាក់និងផ្តល់កិច្ចសហប្រតិបត្តិការជួយសម្រួលគ្រប់បែបយ៉ាងដល់សកម្មភាពរបស់សាខាកាកបាទក្រហមកម្ពុជាខេត្តនិងអនុសាខា ។
ជាមួយគ្នានោះលោកបានផ្តាំផ្ញើដល់គណៈកិត្តិយសគណៈកម្មាធិការអនុសាខាគ្រប់ជាន់ថ្នាក់សូមមេត្តាបន្តរក្សាពង្រឹងសាមគ្គីភាពឱ្យបានជិតស្និទ្ធនិងសុខដុមនីយកម្មរវាងសាខា អនុសាខាជាមួយអង្គភាពពាក់ព័ន្ធនានា ជាពិសេសបន្តនិងពង្រីកកម្លាំងយុវជន អ្នកស្ម័គ្រចិត្តកាកបាទក្រហមតាមសហគមន៍និងគ្រឹះស្ថានសិក្សា ដើម្បីរក្សាបាននូវកម្លាំងសរុបនិងមធ្យោបាយសរុបដើម្បីជួយសម្រាលរាល់ទុក្ខលំបាករបស់ជនរងគ្រោះនិងងាយរងគ្រោះតាមវិស័យការងារមនុស្សធម៌ អោយទទួលបានជោគជ័យពោលគឺផ្តល់នូវភាពកក់ក្តៅដល់ជនរងគ្រោះនិងងាយរងគ្រោះស្របតាមប្រធានបទ”កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា មិនទុកនរណាម្នាក់ចោល”៕
ដោយ ៖ ចាប សំអាន