វិធានការក្ដៅប្រយុទ្ធ និងបង្ក្រាបបទល្មើសព្រៃឈើ ដែលរាជរដ្ឋាភិបាលកម្ពុជាចែងចេញមួយចំអិនកំពិស ហាក់ត្រូវសាបរលាប ហើយបទល្មើសបានរើជម្ងឺចាស់លើសដើម ដោយសារយើងមើលឃើញថា ឈ្មួញរកស៊ីឈើ និងមន្ដ្រីយោធា ប៉ូលិសមានសក្តិមួយចំនួនអាចមានការពាក់ ព័ន្ធយ៉ាងជ្រាលជ្រៅ អំពីមុខរបរមួយនេះ។
ជាក់ស្តែងនាថ្ងៃទី ០៧ ខែសីហា ឆ្នាំ២០១៦ កន្លងទៅថ្មីៗនេះ ឈើប្រណិតត្រូវបានមន្ត្រីនគរបាលខេត្តរតនៈគីរីមួយរូប ដែលអ្នកឆ្លងឆ្លើយពត៌មានយើងដឹងអត្តសញ្ញាណយ៉ាងច្បាស់ កំពុងតែធ្វើសកម្មភាពដឹកឈើប្រណិតទៅប្រទេសវៀតណាមតាមច្រកល្បៀង ភូមិភិ ឃុំប៉ក់ញ៉ៃ ស្រុកអូរយ៉ាដាវ យ៉ាងគគ្រឹកគគ្រេងដូចហែលកឋិត ដោយពុំមានការរំខានពីមន្ត្រីរដ្ឋបាលព្រៃឈើ ឬមន្ត្រីបរិស្ថានសូម្បីតែបន្តិច។
មធ្យោបាយដឹកជញ្ជូនឈើប្រណិតទាំងនេះ គឺពួកឈ្មួញឈើបានប្រើប្រាស់រថយន្តទំនើបដូចជារថយន្ត Lexus រថយន្តបាឡែន ឬករថយន្តទំនើបៗផ្សេងទៀត ដើម្បីជាល្បិចកលបន្លំភ្នែកសមត្តកិច្ច។
រថយន្តដឹងឈើប្រណិតទាំងនោះ បើកបរក្នុងល្បឿនលឿនជាងខ្យល់ព្យុះដោយពុំបានគិតគូរថាពួកគេ និងបង្ករគ្រោះថ្នាក់ដល់អ្នកដទៃសោះឡើយ នេះប្រហែលពួកគេជាកូនជើងឧកញ៉ា ឯកឧត្តម មន្ត្រីអន្ទ្រើសណាមួយជាខ្នងបង្អែកដ៏រឹងមាំដល់ពួកគេ ទើបគេហ៊ានបើកឡានព្រហើនមិនគោរពច្បាប់ចរាចរណ៍ ដោយប្រហែលពេលគេបើកបុកមនុស្ស គិតថាជនរងគ្រោះមានតម្លៃមិនស្មើឆ្កែរបស់ឯកឧត្តម ឧកញ៉ា ទេដឹងបានជាធ្វើដូច្នេះ។
អនិច្ចាព្រៃឈើប្រទេសជាតិដែលកំពុងរងក្ដីវិនាសអន្តរាយស្នាដៃក្រុមឈ្មយញ ឧកញ៉ា ឯកឧត្តមបំផ្លាញព្រៃឈើធម្មជាតិ របស់ខ្មែរដោយមិនខ្ចីគិតដែលនេះជាអត្តចរិកដ៏ស្មោកគ្រោករបស់ក្រុមជនប្រព្រឹត្តបទល្មើសព្រៃឈើ៕
